2021-2025 ӕнзтӕмӕ Республикӕ Цӕгат Иристон-Аланий ӕнӕнездзийнадӕ гъӕуайкӕнуйнади къабази фиццаградон агъаз райаразун»-и программи фӕлгӕти ӕрӕги республики медицинон косӕндӕнттӕ райстонцӕ нӕуӕг хуӕдтолгитӕ «Ладӕ-Грантӕ» ӕма «Нивӕ». Дӕгъӕлтӕ медицинон косӕндӕнтти сӕйраг дохтиртӕн равардта республики Хецауади Сӕрдар Тускъати Таймораз.

Аци ӕхцӕуӕн цау адтӕй, фидбилизи медицини Центр кӕми ӕрбунат кодта, еци рауӕн. Медицинон косӕндӕнтти сӕйраг дохтиртӕн, фиццагидӕр, арфӕ ракодта республики Хецауади Сӕрдари хуӕдӕййевӕг, ӕнӕнездзийнадӕ гъӕуайкӕнуйнади министр Годжицати Тамерлан. Уой фӕсте ба радзубанди кодта Тускъати Таймораз ӕма е загъта:

– Аци хуарз гъуддаг къохи бафтудӕй республики Хецауади ӕнхӕстгӕнӕг еугур оргӕнти ӕнгом кусти фӕрци. Медицинон агъаз размӕ ракӕнуни туххӕй нӕ республики ци программитӕ ӕнхӕстгонд цӕунцӕ, уони фӕлгӕти аци нисани хӕццӕ мадзӕлттӕ фулдӕрӕй-фулдӕр кӕнунцӕ. Уӕлдай устурдӕр ӕздӕхт цӕуй ӕнӕнездзийнадӕ гъӕуайкӕнуйнади къабази фиццаградон агъаз фӕххуӕздӕр кӕнунмӕ, уомӕн ӕма уомӕй аразгӕ ‘й медицини еумӕйаг уавӕр. Е уӕлдай ахсгиаг ӕй, фӕстаг рӕстӕг нӕуӕг хуӕцгӕ нез ке рахӕлеу ӕй, еци гъуддаг хинцгӕй.

Нӕуӕг хуӕдтолгитӕ лӕвӕрд ӕрцудӕй: Хонсайраг поселокки 1-аг поликлиникӕ ӕма Карцай амбулаторийӕн, Ӕрӕдони ӕма Рахесфарси районти центрон сӕйгӕдӕнттӕн ӕма Хумӕллӕги амбулаторийӕн. Горӕтгӕрон райони центрон сӕйгӕдонӕ ӕма Хъобани фельдшерон-акушерон пункттӕн, Ӕрхонки, Гизӕли, Майскийи ӕма Михайловски гъӕуи амбулаторитӕн, Мӕздӕги райони центрон сӕйгӕдонӕн, уӕдта Терски, Троицки ӕма Виноградныйи станицити амбулаторитӕн.

Тускъати Таймораз куд загъта, уотемӕй, уӕлдӕр ранимад медицинон косӕндӕнттӕн аци нӕуӕг гӕнӕнтӕ сӕ кустбӕл гъӕуама хуарзӕрдӕмӕ фӕббӕрӕг уонцӕ.

– Медицинон агъаз никки хуӕздӕр ке фӕууодзӕнӕй ӕма адӕммӕ никки тагъддӕр ке хъӕртдзӕнӕй, е ни федарӕй ӕруагӕс кӕнуй.