01 декабря 2022

РАВДИСТ

30.09.2022 | 14:15

ЭРМИТАЖИ БÆНТТÆ – ЦÆГАТ ИРИСТОНИ

Нæ республики Сæргълæууæг æма Хецауади хъæппæреси фæрци Дзæуæгигъæуи фиццаг хатт арæзт æрцудæнцæ номдзуд Эрмитажи бæнттæ. Аци ахсгиаг цау иссæй,  Аланибæл дзиуарæ бафтауни 1100 анзи Цæгат Иристони ци мадзæлттæй бæрæг кæнунцæ, уонæн сæ агъазиаудæртæй еу.

Эрмитаж нæмæ иссудæй ирд рохситауæн æма профессионалон программи хæццæ: равдист «Реликвии Аланского царства», лекцитæ æма реставрацион мастер-класстæ, кинотеатр «Эрмитаж VR» æма музейти кусти туххæй кинонивæ равдистонцæ.

Республикæ Цæгат Иристонмæ æрбацудæй Паддзахадон Эрмитажи генералон директор Михаил Пиотровский. Е Хетæгкати Къостай номбæл Паддзахадон университети бакастæй æргом лекци. Æ радзубандий загъта:

– Мах зæрдирайгæй аци анз игон кæнæн Эрмитажи бæнттæ Республикæ Цæгат Иристони. Кавказ æй,  хъæбæр ахсгиаг бунат Эрмитажæн, хъæбæр æхцæуæн мин æй, Аланибæл исаргъуди 1100 анземæ махæн нæ бон ке исуодзæнæй равдесун æма радзорун, ци æй Эрмитаж, уой. Фегъосдзинайтæ айдагъ лекцитæ нæ, фал ма фендзинайтæ, Эрмитажи ци адæм косуй, уони, ке къохти æма  зунди фæрци хецæн дзаумæуттæ исунцæ, æмбал кæмæн нæййес, уæхæн музейон экспонаттæ. Циртитæ æма историон зæрдæбæлдаруйнæгтæ ка гъæуай кæнуй, уони хæццæ базонгæ уодзинайтæ, – загъта Михаил Пиотровский.

Ахсгиагдæр  гъуддæгутæй еу иссæй равдист «Реликвии Аланского царства. Из собрания Государственного Эрмитажа». Уой Михаил Пиотровский æма Дзæуæгигъæуккаг æма Алайнаг епископ Герасими хæццæ бабæрæг кæнгæй, нæ республики Хецауади Сæрдар Дзанайти Барис загъта:

– Нæ республики царди аци хабар æй хъæбæр ахсгиаг – ауæхæн алæмæти равдист нæмæ байгон æй фиццаг хатт, уой дæр нæ адæми цардарæзти ахсгиаг цауи фæдбæл – Аланибæл дзиуарæ бафтаунбæл 1100 анзи ке исæнхæст æй, уой кадæн. Мах Михаил Пиотровскийæн ба арфæ кæнæн, ке нæмæ иссудæй æма нæ ке зонгæ кæнуй Паддзахадон Эрмитажи алæмæттаг дзаумæутти хæццæ.

ЦÆГÆРАТИ Эльмирæ