Цæгат Иристони Сæргълæууæги ихæстæ рæстæгмæ æнхæстгæнæг Сергей Меняйло æрæги республики агропромышленнон къабази минæвæртти хæццæ ци фембæлд исаразта Алагири райони Хæтæлдони акционерон хæдзарадæ «Мастер-Прайм. Березка»-йи, уоми бæлвурд дзубанди цудæй аци ахсгиаг къабази абониккон уавæри, нури уæнгæ растауйнагæй ци арæзт æрцудæй æма идарддæр уæлдай бæлвурддæр æргом ци гъуддæгутæмæ раздахун гъæуй, уой фæдбæл.

Фембæлди архайгутæ лæмбунæг базонгæ ‘нцæ  акционерон æхсæнадæ «Мастер-Прайм. Березка»-йи æхсири продукци уадзуни фæлтæрддзийнади хæццæ. Æрзилдæнцæ, гъоцитæ, уæдта уæситæ кæми дарунцæ, еци фермитæбæл, æхсири продукци уадзæг цехтæбæл.

Акционерон æхсæнадæ «Мастер-Прайм. Березка» -йæн бундор æвæрд æрцудæй 2002 анзи. Æ сæйраг архайд баст æй хуари культурити, уæдта «Монбельярд», зæгъгæ, Францийæй ласт сторвонси куст кæнуни хæццæ. Нуртæккæ хæдзаради ес фонси 1748 сæри, уой хæццæ, гъоцитæ – 761. Евгъуд анзи кустуати æхсир æрдугътонцæ 4,1 тонни. Æхсæнадæн æхемæ ци æхсири завод ес, уоми алли суткæмæ дæр кустгонд æрцæуй æхсири дууадæс тонни. Æхсирæй ма сæмæ уæлдай ци байзайуй, уой ба сæ бон æй республики базарти уæйæ кæнун. Завод уадзуй æхсири продукций аст æма дууинсæй хузи.

Æмбурди архайгутæ, ку зæгъæн, дзубанди кодтонцæ, агропромышленнон къабази, еумæ райсгæй, уæдта алкæмæн дæр æ хæдзаради ци лухкæнуйнаг фарстатæ ес, уонæбæл, æма сæ гъæугæ хузи райаразуни мадзæлттæбæл.

– Нæ дзубанди абони æй, уæ хæдзарæдтæ размæ ирæзти надбæл цæмæй цæуонцæ, гъомусгиндæр æма никки æнтæстгиндæр уонцæ, уомæн агъази фæрæзнитæ æма мадзæлттæ исбæлвурд кæнун, æма, уæ еци размæцуди уæ размæ ци къулумпидзийнæдтæ æвзура, уони райеуварс кæнунæн æма тухстаг фарстатæ ралух кæнунæн нæмæ ци гæнæнтæ ес, уони фæббæрæг кæнун, – загъта Сергей Меняйло.

Æмбурди архайгутæй алкедæр загъта æ фæндитæ, æ гъудитæ, æ феппайуйнæгтæ. Акционерон хæдзарадæ «Мастер-прайм. Березка»-йи генералон директор Беккузарти Ларисæ радзурдта агрохолдингæн æ нæуæг проекти туххæй. Куд загъта, уотемæй сæ зæрди ес, адæймаги бæсти си алли куст дæр роботтæ кæми кæндзæнæнцæ, уæдта, VIP-цихтитæ уадзæн цех кæми уодзæнæй, сторвонси уæхæн кустгæнæг комплекс нæ республики исаразун.

Сæ зæрди ма ес царди рауадзун нæуæг инвестицион проект, кæций нисан æй «Мастер-Прайм. Березка»-йи бундорбæл Уæрæсей Хонсари агъазиаудæр æма хъаурæгиндæр агропромышленнон комплекс исаразун. Проект æнхæстгонд цæудзæнæй дууæ къæпхæнемæй. Фиццаг бал байархайдзæнæнцæ, сторвонси бæрцæ фæффулдæр кæнунбæл роботтæ кæми косдзæнæй, цуппар уæхæн демо-ферми исаразунбæл. Дуккагæй ба, арæзт æрцæудзæнæй æхсиргустгæнæг, уой хæццæ, цихтитæ уадзæг завод. Проект ци хæрзтæ домуй, етæ фæстæмæ раздæхдзæнæнцæ дæс анзей фæсте.

Æ радзубандий Беккузарти Ларисæ куд баханхæ кодта, уотемæй син нури уæнгæ хуарз бастдзийнадæ æма æмгустадæ ес «Россельхозбанк»-и хæццæ. Æ хæццæ арази адтæй æмбурди архайæг, «Россельхозбанк»-и регионалон филиали директор Георгий Ходоковский дæр.

Æнæнхæст бæрнондзийнади æхсæнадæ «Остров-аквакультуры» кæнуй балеркæсалги куст. Æхсæнади бундорæвæрæг Данилæ Дюдневи гъудимæ гæсгæ, Цæгат Иристони гæнæнтæ амонунцæ, еумæ райсгæй, еугур Уæрæсей дæр ци кæсалги куст цæуй, уомæн æ инсæй проценти республики æнхæст кæнун.

– Еумæ еци куст æй нуриккон æмвæзадæбæл райаразуйнаг, – загъта амалгъон. – Нæ кусти нин хуарз агъаз кæнуй Сбербанк.

Æмбурди архайгути гъудитæ æма феппайуйнæгтæ сæ фулдæр адтæнцæ æргом раздахун кæмæ æнгъезуй æма, царди сæ рауадзгæй, зингæ пайда ка æрхæсдзæнæй, уæхæнттæ. Уомæ гæсгæ ба уони бундорбæл гъæуама арæзт æрцæуа агропромышленнон къабази райрæзти надбæл размæцуд фæгъгъомусгиндæр кæнунæн агъазгæнæг хъæппæрестæ.

Нæ уацхæссæг.