Уӕрӕсей 2007 анзӕй фӕстӕмӕ 9 декабри бӕрӕггонд фӕццӕуй Фидибӕсти бӕгъатӕрти Бон. Еци зӕрдӕбӕлдарӕн бон Цӕгат Иристони дӕр цитгинӕй бӕрӕггонд ӕрцудӕй берӕ аллихузон мадзӕлттӕй. Сӕ  сӕйрагдӕртӕй еу иссӕй ветеранти Республикон хӕдзари фембӕлд, кӕцими архайдта нӕ республики Сӕргълӕууӕг Сергей
Меняйло. Ӕ радзубандий е бӕрӕгбони фӕдбӕл зӕрдиагӕй райарфӕ кодта, аци ӕмбурдмӕ ка ‘рбацудӕй, уонӕн. Уӕлдай арфитӕ ба ракодта, ӕ уодуӕлдай ӕма хъазауатон архайди туххӕй бӕрзонд паддзахадон хуӕрзеугутӕ кӕмӕн исаккаг кодтонцӕ ӕма аци фембӕлди ка архайдта, еци зундгонд адӕймӕгутӕн. Уони нимӕдзи – Уӕрӕсей Федераций Бӕгъатӕртӕ Валерий Куков ӕма Руслан
Нальгиев, Цӕгат Иристони Фӕллойни Бӕгъатӕр Гӕздӕнти Булат ӕма иннетӕ.

Уомӕй уӕлдай, республики Сӕргълӕууӕг ӕнӕргъудигӕнгӕ нӕ фӕцӕй, ӕ ихӕс ӕнхӕстгӕнгӕй ка фӕммард ӕй, еци Бӕгъатӕрти хеуӕнтти дӕр – Уӕрӕсей Федераций Бӕгъатӕрти мадтӕлтӕ Верӕ Семенова ӕма Тамарӕ Якимкинай, Уӕрӕсей Федераций Бӕгъатӕри фурт Мурад Мусалаеви, Уӕрӕсей Федераций Бӕгъатӕрти ниййергутӕ Валентинӕ Нестеренкой, Татьянӕ Днепровскаяйи ӕма Берозти Зӕлини.

Ӕ радзубандий ма Сергей Меняйло сӕрмагондӕй баханхӕ кодта:

– Иристони алкӕддӕр бӕрӕг дардтонцӕ Фидибӕстӕмӕ ӕгӕрон уарзондзийнадӕй, Райгурӕн бӕсти сӕрбӕлтау сӕ уодтӕ нӕ бавгъау кӕнунӕй. Уомӕн ирд ӕвдесӕн ӕй е дӕр, ӕма Устур Фидибӕстон тугъди рӕстӕг Советон Цӕдеси Бӕгъатӕри ном ци адӕмти минӕвӕрттӕн аккаггонд ӕрцудӕй, уони ӕхсӕн, нӕ республики еугур цӕргути нимӕдзӕ хинцгӕй, фиццаг бунати ӕй Иристон. Гъулӕггагӕн, ахид уотӕ рауайуй, ӕма Бӕгъатӕри ном кӕмӕндӕрти аккаггонд ӕрцудӕй ӕ фӕсмӕрдӕ. Фал мах алкӕддӕр нӕ зӕрдӕбӕл дарӕн нӕ Бӕгъатӕр ӕмзӕнхонти рохс нӕмттӕ – етӕ ӕностӕмӕ уодзӕнӕнцӕ Фидибӕстӕбӕл еузӕрдиуондзийнади дӕнцӕгтӕ.

Уонӕй еуей – Советон Цӕдеси Бӕгъатӕр Калоти Александри фурт Геуӕргий туххӕй ӕрмӕг ба кӕсетӕ  нӕ газети абониккон номери дуккаг фарсбӕл.