Æхцæуæн æма нифсдæттæг æй, нæ кæстæртæ берæ аллихузон арфиаг гъуддæгути сæрæнæй ке фескъуæлхунцæ, е. Сæрустур си ан, фæнзуйнаг æнцæ се ’мгæрттæн.

Æрæги ба си сæхе сæрæнæй равдистонцæ, æвзарæн баради æма æвзарæн гъуддаги фæдбæл скъоладзаути Еугуруæрæсеуон олимпиадæ «Софиум»-и мах республикæй ка архайдта, етæ – цалдæремæй си иссæнцæ уæлахезонтæ. Уой фæдбæл сæ хæццæ æрæги фембæлгæй сæ исбоц кодта нæ республики Сæргълæууæги æма Хецауади Администраций разамонæг Гобети Ибрагим.

– Сумах алæмæти хуарз бацæттæ кодтайтæ еци вазуггин фæлварæнтæмæ æма  сæ æнтæстгинæй раттунмæ исарæхстайтæ, æвзарæн барадæзонуйнади равдистайтæ  бæрзонд ацъагъуæдзийнадæ. Уæхæн æнтæстдзийнадæ хъæбæр бæлдтаг æй. Цуппаремæй си иссайтæ уæлахезонтæ. Аци анз еци олимпиади Цæгат Иристонæй архайдтонцæ Дзæуæгигъæуи 27-аг скъолай еуæндæсæймаг къласи ахурдзау Цорати Валерийæ, Горæтгæрон райони Октябрьскийи 1-аг скъолай дæсæймаг къласи ахурдзау Гогичати Софийæ.

Олимпиади уæлахезон къæпхæнтæ байахæстонцæ ахуради центр «Интеллект»-и еуæндæсæймаг кълæсти ахурдзаутæ Мæргъити Валерийæ æма Фæрниати Барис дæр.

Еугуруæрæсеуон олимпиадæ «Софиум» арæзт æрцудæй дууæ фæлтæремæй. Архайдтонцæ си дæсæймаг-еуæндæсæймаг кълæсти ахурдзаутæ нæ бæсти аст æма цуппаринсæй регионемæй. Кæронмæ си рахъæрттæнцæ дæс æма цуппаринсæй архайæги цуппар регионемæй. Уæлахездзаути нæмттæ исбæлвурд æнцæ 19 мартъий Мæскуй Уæрæсей Центрон æвзарæн къамиси æмбурди.

– Уал уæлахезони еу регионæй иссæй, зæгъгæ, уæхæн регионтæ, мæнмæ гæсгæ, берæ нæ адтæй. Уомæ гæсгæ ба зæрдибунæй арфæ кæнун сумахæн дæр æма уæ ахургæнгутæн дæр, – загъта Гобети Ибрагим.

Фембæлди ма архайдта нæ республики æвзарæн къамиси сæрдар Моргуати Жаннæ дæр.

Æма е æ радзубандий куд баханхæ кодта, уотемæй нæ ахурдзаутæ еци олимпиади архайунмæ цæттæгонд цудæнцæ цалдæр мæйей дæргъи, равдистонцæ федар бухсундзийнадæ æма фæразондзийнадæ. Æма син уой туххæй райарфæ кæнгæй, загъта:

– Нæ республики номæй олимпиади архайгæй, уæхе нæ аккаг минæвæрттæй равдистайтæ. Æма уин уæ къохи ци бафтудæй, уæхе уобæл ма ниууагътæ, идарддæр тундзетæ никки бæрзонддæр нисантæмæ. Уе ’нтæститæ айдагъ уæхе нæ ’нцæ. Етæ ’нцæ нæ сахари, нæ еугур республики уæлахезтæ дæр. Цийфæнди нæдтæ ку равзарайтæ уæ цардвæндагбæл цуди, уæддæр еузæрдиуон уотæ нæ Иристонбæл. Мах æрдигæй ци аразгæ уа, уомæй уæмæ фæккæсунбæл ба архайдзинан, цæмæй уæ къохи никки бæрзонддæр уæлахезтæ æфтуйа, уой туххæй.

Фембæлди рæстæги е ’мбæлтти номæй радзубанди кæнгæй, Моргуати Валерийæ загъта:

– Махæй алке рагъбæл дæр бæрнон ихæс æрæнцадæй, нæ Иристони номæй олимпиади ке архайдтан, уомæй. Арфæ кæнæн, мах ка ахур кодта, уонæн сæ еугуремæн дæр, Республики æвзарæн къамиси косгутæн, сæ ауодундзийнадæ æма сæ устур агъази туххæй. Нæ зонундзийнæдти хæццæ зонгæ кæндзинан иннæ ахурдзаути дæр, цæмæй, еуемæй зононцæ, æвзарæн кусти закъæнттæ дæр, цæмæй лæдæронцæ, еци архайд цæмæдесаг ке æй, уой дæр.

Зæгъун гъæуй уой дæр, æма олимпиади уæлахезонтæй еуæндæсæймаг кълæсти ка ахур кæнуй, уонæй Мæскуй О.Е.Кутафини номбæл паддзахадон юридикон академимæ ахур кæнунмæ бацæун ка иснет кæна, уомæн ма уæлæнхасæн баллтæ æфтуд æрцæудзæнæй. Уæлахезонтæ еугурæй дæр каст æрцæудзæнæнцæ алæмæти ацъагъуæдзийнæдтæ ка бавдиста, еци адæймæгути паддзахадон информацион ресурсмæ. Дæсæймаг кълæсти ахурдзаутæ си ка ’й, уонæн ба фадуат уодзæнæй номдзуд фæлладуадзæн «Артек»-и фæуун, уæдта регионалон этапи нæ архайгæй олимпиади иннæ сезони архайуни барæ.