Цæгат-Кавказаг федералон зилди Уæрæсей Президенти Æнхæстбаргин минæвар Юрий Чайка видеобастдзийнади фæрци æрæги ци урух æмбурд исаразта, уоми архайдта Цæгат Иристони Хецауади Сæрдар Дзанайти Барис дæр.. Дзубанди ба си цудæй æдасдзийнади, коррупций нихмæ тохи, барадон фæткитæ цардгъон кæнуни фæдбæл фарстатæбæл.

* * *

Дзубандий архайдтонцæ федералон министрадти æма профилон  ведомствити регионалон хайæдти разамонгутæ, уæдта федералон зилди субъектти сæргълæугутæ.

Координацион совети иуонгтæ, фиццаги-фиццагидæр, се ‘ргом раздахтонцæ Уæрæсей Федераций паддзахадон арæнгъæуайгæнæн политики уагæвæрдтæ æнхæст кæнунмæ, уæдта уой хæццæ бастæй, федералон зилди хецаудзийнади æнхæстгæнæг æма барадæгъæуайгæнæг оргæнти æмархайд экстремистон æма диверсион-террористон фæззиндтитæ ма ‘руадзуни нисани хæццæ æмархайд лæмбунæгдæр кæнунмæ.

Юрий Чайка æ радзубандий куд фæббæрæг кодта, уотемæй нури исæвзургæ уавæрти уæлдай ахсгиагдæр æнцæ аци фарстатæ. Уæлдайдæр ба – федералон зилди регионти хæццæ æмарæн бæстити бустæги зæрдæзæгъгæ ке нæй, уой лæдæргæй.

Совети иуонгти гъудимæ гæсгæ, нигулæйнаг бæститæ Уæрæсей нихмæ берæвæрсуг экономикон гæрæнтæ ке аразунцæ, еци æууæл дæр зингæ фæввазуггиндæр кодта, нæ бæсти цæгаткавказаг арæнбæл ци контролон-уадзæн пункттæ ес, уони нивæбæл кусти фæткæ.

Юрий Чайка куд баханхæ кодта, уотемæй уæлæнхасæн мадзæлттæ исаразун гъæуй, цæмæй «Уæллаг Ларс», «Яраг-Казмаляр» æма иннæ цæстдарæн-уадзæн пунктти архайд зингæ фæннивæбæлдæр уа. Еци нисани хæццæ Президенти минæвар бæлвурд амунддзийнæдтæ равардта профилон ведомствити бæрнон косгутæн.

Цæстдарæн-уадзæн пункт «Уæллаг Ларс»-и куст зингæ фæххуæздæр кæнуни туххæй республики Хецауадæ ци бæлвурд организацион мадзæлттæ исаразта, уобæл дзоргæй Дзанайти Барис æ радзубандий фегъосун кодта:

– Нури уæнгæ арæзт ци ‘рцудæй, уомæй уæлдай ма идарддæр дæр куст цæудзæнæй аци фарстабæл. Зæгъæн, анзи кæронмæ байгон уодзæнæй, паддзахадон арæни сæрти ци уæззау транспорт цæуй, уомæн рæстæгмæ æрлæууæн бунат. Еци транспорт æрбунæттон уодзæнæй «Уæллаг Ларс»-мæ еуцæйбæрцæдæр идæрддзæф рауæни. Уоми цубур рæстæгмæ бамбурд кæндзæнæнцæ, паддзахадон арæни сæрти бахезун ке гъæуй, еци бæлццæнтти уæзласæн транспорт. Еци гъуддаг фадуат дæтдзæнæй, цæмæй цæстдарæн-уадзæн пунктмæ бацæуæнти транспорт берæгæйттæй мабал æмбурд кæна. Уомæй уæлдай, Цæгат Иристони Сæргълæууæги амунддзийнадæмæ гæсгæ, æртæ уæлæнхасæн уæхæн æрлæууæн бунати фæззиндзæнæнцæ Кирови æма Горæтгæрон районти, уæдта Дзæуæгигъæумæ бацæуæни. Уой хæццæ ба ма, уавæр фæннивæбæлдæр кæнуни туххæй пайдагонд цæуй æндæр мадзæлттæй дæр. Зæгъæн, уæззау автомобилон транспортæн исаразтан электронон кезу.

Координацион æмбурди архайгутæ бони фæтки еугур фарстати фæдбæл дæр исфедар кодтонцæ бæлвурд унаффитæ.

Нæ уацхæссæг.