25 майя 2022

БӔРӔГБОНБӔЛ ИСӔМБӔЛӔН ХУӔРЗЦӔТТӔЙ…

15.04.2022 | 11:45

Уӕрӕсей Федераций Хецауади Сӕрдари хуӕдӕййевӕг Дмитрий Чернышенко си разамунд лӕвардта, уотемӕй ӕрӕги Мӕскуй арӕзт ӕрцудӕй Аланибӕл исаргъуди 1100 анзей бӕрӕгбонмӕ цӕттӕ кӕнуни федералон организацион комитети еума ӕмбурд. Аци паддзахадон исконд арӕзт ӕрцудӕй Уӕрӕсей Президент Владимир Путини Указмӕ гӕсгӕ.

Зундгонд куд ӕй, уотемӕй юбилейи кадӕн мадзӕлттӕ  бӕрӕггонд  цӕудзӕнӕнцӕ аци анзи дӕргъи, сӕ сӕйрагдӕртӕ ба – сентябри. Уой дӕр айдагъ Иристони нӕ, фал федералон ӕмвӕзади дӕр.

Сӕ аци ӕмбурди организацион комитети иуонгтӕ еума хатт лӕмбунӕг ӕркастӕнцӕ, юбилейон мадзӕлттӕ цӕйбӕрцӕбӕл афойнадӕбӕл ӕма ӕнӕгъӕнӕй ӕнхӕстгонд цӕунцӕ, уомӕ. Фембӕлди архайдтонцӕ федералон ведомствити минӕвӕрттӕ. Цӕгат Иристони Сӕргълӕууӕг Сергей Меняйло ӕ сӕргъи, уотемӕй си архайдта нӕ республики бӕрнон косгути делегаци.

– Аланибӕл исаргъуди 1100 анзей бӕрӕгбон айдагъ Иристонӕн нӕ, фал ӕнӕгъӕнӕ Уӕрӕсейӕн дӕр, ӕнӕмӕнгӕ, исуодзӕнӕй анзи сӕйрагдӕр культурон цаутӕй еу, – загъта ӕ радзубандий Дмитрий Чернышенко.

Комитети иуонгтӕ куд исбӕрӕг кодтонцӕ, уотемӕй 2010-2021 ӕнзти дӕргъи республики цудӕй куст наукон, рауагъдадон ӕма ӕндӕр уӕхӕн проекттӕ исӕнхӕст кӕнунбӕл, историон-культурон объектти цалцӕгбӕл. Райарӕзти куститӕй уӕлдай, организацион комитети иуонгтӕ фӕббӕлвурддӕр кодтонцӕ, юбилейон мадзӕлтти рӕстӕг Дзӕуӕгигъӕуи ӕма Мӕскуй ци равдиститӕ, презентацитӕ, мастер-класстӕ, концерттӕ ӕма фестивальтӕ арӕзт ӕрцӕудзӕнӕй, уони фӕткӕ.

– Уӕрӕсей Федераций Хецауадӕй арфиаг дӕн, юбилеймӕ аккаг хузи бацӕттӕ кӕнунӕн еугур фадуӕттӕ дӕр ке исаразта, уой туххӕй. Федарӕй ни ӕруагӕс кӕнуй, еумӕйаг хъауритӕй архайгӕй, бӕрӕгбони мадзӕлттӕ тӕккӕ бӕрзонддӕр организацион ӕмвӕзадӕбӕл ӕнхӕстгонд ке ‘рцӕудзӕнӕнцӕ, е.

Фембӕлди кӕронбӕттӕни ба Дмитрий Чернышенко, юбелеймӕ цӕттӕ кӕнуни мадзӕлттӕ исаразуни  федералон ведомствитӕй ка архайуй, уони разамонгути фехӕсгин кодта бӕлвурд фӕдзӕхститӕй.