МӔГУЫРЫ ЗАРӔГ

Адæмæн сæ рæсугъд уæттæ

Хъармæй, райдзастæй лæууынц,

Махæн та нæ сывæллæттæ

Уазал лæгæты кæуынц…

Адæмæн сæ чындзхонты хъазт

Хæхтæ, къæдзæхтæ хæссы,

Махæн та нæ гæдыйы уаст

Мардыл кæуæгау хъуысы…

Адæмæн сæ цæхджын фыдтæ

Царæй фæныкмæ тæдзынц,

Махмæ та хæлынбыттыртæ

Цары ахстæттæ кæнынц…

Адæмæн сæ фæззæджы куыст

Не ссы афæдзмæ куырой,

Махæн та нæ афæдзы мызд –

‘Гасæй иу хоры кæфой!..

* * *

Хетæгкати Къостай райгурдбæл 15 октябри æнхæст кæнуй æртæ æма астинсæй анзи (1859-1906). Уой фæдбæл æрмæгутæ мухур кæнæн 4-5-аг фæрстæбæл.