19 майя 2022

ХУАРЗ ХАБАР – НИФСДӔТТӔГ!..

15.04.2022 | 13:17

Цӕгат Иристони гъӕууонхӕдзарадон кустуӕтти доцгӕ гъоцити бӕрцӕ фӕффулдӕр ӕй 9,7 проценти. Уой фӕрци ба ӕхсири кусти бӕрӕггӕнӕнтӕ дӕр, фари хӕццӕ рабаргӕй, аци анз исирӕзтӕнцӕ 18,5 процентей бӕрцӕ.

***

Цӕгат Иристони промышленности райрӕзти республикон Фондбӕл бафтуйдзӕнӕй 250 миллион соми. Еци фӕрӕзнитӕ промышленнон кустуӕттӕн лӕвӕрд цӕудзӕнӕнцӕ ӕфстау дууӕ-ӕртӕ процентебӕл фондз анзей ӕмгъудмӕ.

***

Цӕгат Иристони идарддӕр ӕнхӕстгонд цӕуй коронавируси нихмӕ дзиллон вакцинаци. Аци ахсгиаг профилактикон-санитарон мадзалӕй нерӕнгӕ испайда кодтонцӕ нӕ республики цӕргутӕн сӕ 49 проценти (260 мин адӕймагемӕй фулдӕр). Ӕртинсӕй анземӕй фулдӕр кӕбӕл цӕуй, уонӕй прививкитӕ искодтонцӕ сӕ 37 проценти (53 мин адӕймагей бӕрцӕ).

***

Дзӕуӕгигъӕуи спортивон скъола «Ӕвзонгадӕ»-йи фӕзти сабати райдайдзӕнӕнцӕ нӕ республики астӕуккаг ахургӕнӕндӕнтти футболон командити еристӕ Цӕгат Иристони Сӕргълӕууӕги приз рамолунбӕл. Мадзал арӕзт цӕуй региони разамонӕг Сергей Меняйлой хъӕппӕресӕй.

***

Еумӕйаг паддзахадон фӕлварӕнтӕ дӕттуни ӕмгъуд аци анз уодзӕнӕй 26 майӕй 2 июли уӕнгӕ. Нӕ республики еци ахсгиаг мадзали архайдзӕнӕй 3,5 мин рауагъдонемӕй фулдӕр.

***

Санитарон искӕдзосдзийнади ӕма хуӕрзарӕстдзийнади мӕйон Дигори райони райдӕдта дзиллон зеуӕй – райони центри дӕр ӕма еугур гъӕути дӕр адӕм еузӕрдиуонӕй базилдӕнцӕ ӕхсӕнадон рауӕнтӕмӕ, рандӕ кодтонцӕ ӕнӕбунати бугъгалӕнтӕ. Куд унаффӕгонд ӕй, уотемӕй ауӕхӕн дзиллон мадзӕлттӕ идарддӕр дӕр арӕзт цӕудзӕнӕнцӕ.

***

Дзӕуӕгигъӕуи 25 апърели райдайдзӕнӕй фӕсевӕдӕн зӕрдӕмӕдзӕугӕ мадзал «Аланий студентти уалдзӕг – 2022». Абониккон уавӕртӕмӕ гӕсгӕ, е иннӕ ӕнзти хузӕн парахаттӕй ӕма бӕрӕгбонхузӕй арӕзт кӕд не ’рцӕудзӕнӕй, уӕддӕр цӕмӕдессаг уодзӕнӕй. Фиццагидӕр уомӕй, ӕма кӕрӕй-кӕронмӕ дӕр уодзӕнӕй патриотон разӕнгарддзийнади бундорбӕл. Кӕронбӕттӕн концерт ба рацӕудзӕнӕй 29 апърели  фӕсевӕди республикон Галауани.

***

«Ӕнӕнездзийнадӕ гъӕуайкӕнуйнади системи фиццаградон къӕпхӕни модернизаци», зӕгъгӕ, еугуруӕрӕсеуон программӕмӕ гӕсгӕ, фарӕ Цӕгат Иристони гъӕууон медицинон косӕндӕнттӕн ӕлхӕд ӕрцудӕй 26 санитарон хуӕдтолги. Аци анз ба уӕхӕн косӕндӕнттӕн балхӕндзӕнӕнцӕ никкидӕр ма 9 уӕхӕн хуӕдтолги.