26 февраля 2024

ХУАРЗ ХАБАР – НИФСДÆТТÆГ!..

12.08.2022 | 12:53

Нæ республики финансти министр Исахъти Олег хецауади æмбурди куд фегъосун кодта, уотемæй республики паддзахадон оргæнтæ æма бюджетон организацити косгутæн сæ еугуремæндæр июли мæйæн сæ мизд ке бафистонцæ – кустуæттæй ка ци курдиадæ балæвардта июли мæйæн, уомæ гæсгæ син сæ мизд æнхæстæй равардтонцæ.

Министр ма куд загъта, уотемæй августи мæйæн дæр аванс алкедæр афойнадæбæл райсдзæнæй.

***

Уæрæсей адæмон аййевадон промыслити косæндæнттæн уæлæнхасæн паддзахадон субсидити хузи дехгонд æрцæудзæнæй никкидæр ма 500 миллион сомей бæрцæ. Федералон реестрмæ ци 86 организаций хаст æрцудæй, уонæн уæхæн уæлæнхасæн финансон æнхус хуарз агъаз фæууодзæнæй сæ архайд фæгъгъомусгиндæр кæнунæн, равгитæ син уа сæ кустадон уавæртæ рæвдзæдæрæй аразунæн, æнцондæрæй æлхæнонцæ гъæугæ æрмæгутæ æма хомаг. Адæмæн аййевадон промыслити косæндæнттæн паддзахадон субсидитæ дæттуни фæткæ федаргонд æрцудæй 2020 ази. Æма, зæгъæн, аци анзи райдайæни аци косæндæнттæн Хецауадæ радех кодта 600 миллион сомей бæрцæ.

***

Флюрограф, рефрактометр, УЗИ-аппараттæ æма æндæр медицинон косæнгæрзтæ аци бæнтти исæмбалдæнцæ Дзæуæгигъæуи 7-аг поликлиникæбæл. Аци медицинон косæндзаумæуттæ поликлиникæн исамал кодтонцæ æнæнездзийнадæ гъæуайкæнуйнади къабази фиццаградон агъази къæпхæни модернизаций сæрмагонд программи фæлгæти.

Уомæй уæлдай, поликлиники исæвæрдзæнæнцæ нæуæг маммограф æма компьютерон томограф дæр.

Ведомстви куд фæббæрæг кодтонцæ, уотемæй хæстæгдæр рæстæг ралух кæнун гъæудзæнæй поликлиники бундорон цалцæги фарста дæр. Уой хæццæ, медицинон косæндони еуæй-еу дæлхайæдти нуртæккæ æнхæстгонд цæуй уæлæнгай цалцæги архайд. Фарæ ба поликлиники исæвардтонцæ нæуæг лифттæ.

***

Цæгат Иристони идарддзæф гъæути æма фельдшерон-акушерон пунктти идарддæр игонгонд цæунцæ афтектæ. Нерæнгæ бал 16 гъæуеми цæргути бон æй сæхемæ æнæмæнгæ гъæугæ хуастæ балхæнун. Æдеугурæй ба гъæуама уæхæн рауæнти игонгонд æрцæуа 31 афтеки.

***

Национ программæ «Демографи» æма уой федералон проект «Бийнонтæн сувæллæнттæ си райгурди фæдбæл финансон агъаз»-мæ гæсгæ аллимæйон феддонтæ лæвæрд цæуй, фиццаг сувæллон кæмæн райгурдæй, уæхæн 6,5 мин бийнонтемæн. Еци мадзал нури уæнгæ æнхæстгонд æрцудæй 53,7%, анзи кæронмæ ба гъæуама æнхæстгонд æрцæуа æнæгъæнæйдæр.