Иристони, ӕвӕдзи, нӕ разиндзӕнӕй уӕхӕн адӕймаг, ӕма номдзуд ахургонд Владимир Кузнецови кенӕ комкоммӕ ка нӕ зонуй, кенӕ ба ин ӕ ном ӕма ӕ агъазиау арфиаг гъуддӕгути кой нӕ фегъустайдӕ, уӕхӕн адӕймаг. Ӕ наукон-ӕртасӕн фӕллӕнттӕй устур кадӕ искодта нӕ адӕмӕн, ӕма си нӕ дзиллӕ дӕр хъӕбӕр боз ӕнцӕ, зӕрдиагӕй ӕй алкӕддӕр цитгин кӕнӕн.

Уомӕн еума ӕвдесӕн – нӕ республики Сӕргълӕууӕг Сергей Меняйло ӕрӕги сӕрмагондӕй фембалдӕй историон наукити доктор, профессор Владимир Кузнецови хӕццӕ. Уой дӕр ӕхцӕуӕн гъуддаги фӕдбӕл – нӕ адӕми историон-культурон евгъуд ӕности цаутӕ ӕма хабӕртти ӕцӕгдзийнадӕ исбӕлвурд кӕнуни ӕма сӕ багъӕуай кӕнуни сӕрбӕлтау ӕ агъазиау хъиамӕттӕн аргъгӕнгӕй ин аккаггонд ӕрцудӕй «Цӕгат Иристони кадгин гражданин»-и ном.

Еци хуӕрзеуӕг ин дӕтгӕй, Сергей Меняйло загъта:

– Фӕндуй мӕ нӕ хестӕрӕн арфи ӕма нӕ бозни зӕгъуйнӕгтӕй зӕрдиагӕй райарфӕ кӕнун. Владимир Александри фурт, ду нӕ республикӕн ци берӕ гъуддӕгутӕ исаразтай, уони ахсгиагдзийнадӕн аргъ нӕййес. Дӕ ӕвӕллайгӕ фудӕбони ӕма дӕ ахсгиагӕй ахедгӕ гъуддагбӕл  ӕновуддзийнади туххӕй ди хъӕбӕр боз ан. Дӕ зонундзийнӕдтӕ ӕма курухондзийнадӕ иннети хӕццӕ ке дех кӕнис, уой туххӕй райсӕ нӕ арфитӕ. Ӕнӕнез уо, дӕхе гъӕуай кӕнӕ!..

Владимир Кузнецов ӕ радзубандий куд баханхӕ кодта, уотемӕй ин хъӕбӕр ӕхцӕуӕн ӕй, ӕгайтима ӕ цардвӕндаг ӕнӕгъӕнӕй дӕр баст рауадӕй Цӕгат Иристони, уой адӕми карни хӕццӕ.

– Дӕс ӕма ӕртинсӕй анзей дӕргъи архайун алайнаг-иристойнаг фарстатӕ наукон ӕгъдауӕй исбӕлвурд кӕнуни гъуддаги. Ӕргомӕй ӕй зӕгъун: Иристон мин иссӕй мӕ дуккаг Фидибӕстӕ.

Владимир Кузнецов берӕ ӕнзти дӕргъи археологон-ӕсгарӕн ракъӕхтитӕ кодта еугур Цӕгат Кавкази дӕр. Е ‘ртасӕн хатдзӕгтӕ бӕрӕг ӕнцӕ ӕ берӕ киунугути ӕма монографити. Фарӕ ци нӕуӕг наукон-публицистикон куст рауагъта мухури, уой исхудта «Кто мы? Осетины-аланы Кавказа». Еци кустӕй, зӕгъун ӕнгъезуй, дессаги ӕнхӕст кӕронбӕттӕн искодта ӕ берӕ ӕнзти дӕргъи наукон, ӕскъуӕлхтгин фӕллойнитӕн. Уогӕ нӕ зӕрдӕ дарӕн, ӕма нин нӕ зӕрдитӕ никкидӕр ма ке барохс кӕндзӕнӕй е ‘ндӕр куститӕй дӕр ма.