КОЛИТИ Витали, Уæрæсей финсгути Цæдеси иуонг

Малити Геуӕргий цардӕмбал Зӕрӕдай кой ку фегъосун, уӕд мӕ цӕститӕбӕл рауайуй бӕрзонд, хуӕрзконд, ӕ карӕмӕ гӕсгӕ уӕд ма ӕ  хъарӕ ӕма нифс ӕхемӕ кӕмӕн адтӕнцӕ, уӕхӕн силгоймаг.

Зӕрӕдай бафӕсмардтон 1990 анзи. Уӕд райдӕдтан аразун ӕма косун журнал «Ирӕф»-бӕл. Ахид нӕ, фал ӕстӕн еухатт ба Васо ӕма Эльбруси хӕццӕ исӕмбӕлианӕ, Зӕрӕда фӕстаг ӕнзти ци хӕдзари цардӕй, уоми. Мӕ зӕрди байзадӕй, ӕ уоди рохсӕй ци фӕлмӕн табедзӕ цудӕй, е. Рацӕргӕ силгоймаги цӕсгонбӕл ирдвӕд ниууагътонцӕ, царди ци берӕ мӕститӕ ӕма зинтӕ фӕууидта, уони фӕдтӕ. Ахид ӕй фӕрсианӕ ӕ уодӕмбал Геуӕргий хабӕртти туххӕй. Ӕма кӕд ӕ карӕмӕ гӕсгӕ берӕ цидӕртӕ нӕбал гъуди кодта, уӕддӕр си мӕ зӕрдӕбӕл бадардтон цидӕртӕ ӕ дзубандитӕй.

Зӕгъӕн, Зӕрӕда куд дзурдта, уотемӕй, Геуӕргий фиццаг хатт ку фӕууидта, уӕд си хъӕбӕр фӕттарстӕй, ӕ цӕсгони цъарӕ бустӕги сау ке адтӕй, уомӕ гӕсгӕ. Ӕхуӕдӕг, дан, адтӕй хъӕбӕр фӕлмӕнзӕрдӕ, нӕ мин хатир кодта, уӕдта нӕ уагъта нӕ сувӕллӕнтти ранӕмун, гъӕр сӕбӕл кӕнун. Уӕхӕн мадзӕлттӕй, дан, сувӕллон ахур нӕ кӕнуй, фал дорзӕрдӕй, ӕнӕхатирӕй ирӕзуй, зӕгъгӕ. Ахид цӕуидӕ кӕсалгдзауӕн ӕма, дан, имӕ ӕз ӕнгъӕлмӕ кӕсинӕ, ести ӕрбахӕсдзӕнӕй, е ба, ци ниййахӕссидӕ, уони фембӕлгутӕбӕл байуаридӕ.

Зӕрӕда хъӕбӕр бозӕй имисидӕ, Геуӕргий ку ниййахӕстонцӕ, уӕд сӕмӕ еци тухст рӕстӕги ӕ фарс ка бадардта, уони. Мӕ зӕрдӕбӕл си бадардтон Малити Дзегай кой. Иннетӕ тӕрсгӕ кодтонцӕ, оххай, «адӕми знаг» ке рахудтонцӕ, уой бийнонти хӕццӕ нӕ еске ку ӕрӕстӕфа, зӕгъгӕ. Е ба, Сурх-Дигори цӕргӕй, уӕрдун тиллӕгӕй байдзаг кӕнидӕ ӕма нӕмӕ ’й Мостиздӕхмӕ рӕхъӕртун кӕнидӕ, зӕгъгӕ, си арфиаг адтӕй Зӕрӕда.

Дессаги фӕлмӕнзӕрдӕ ӕма рӕстауодӕг силгоймаг адтӕй Малити Геуӕргий цардӕмбал. Кӕд берӕ зинӕвзарӕнтӕ баййафта ӕ сӕр, уӕддӕр си некӕд фегъустон, мӕнӕ ескӕмӕй рагъаст кодта, уӕхӕн таус. Бӕрзонд уодигъӕди хецау адтӕй Зӕрӕда, силгоймаги кӕдзос ном кади хӕццӕ фӕххаста ӕ цард-цӕрӕнбонти ӕма уомӕй устур бунат ниййахӕста мӕ зӕрди. Аци номерӕн ӕмдзӕвгӕ дӕр уой фӕдбӕл финст ӕрцудӕй.

МАЛИТИ ГЕУӔРГИЙ ЦАРД ИМИСГӔЙ

Дӕубӕл ба ка нӕ финста ӕ доги,

Фудӕзнаг кӕмӕн не ’сдӕ ӕдта?!

Фал де ’стухсти дӕ фарсмӕ, дӕ цори

Изаидӕ ӕрмӕст ЗӔРӔДА.

Царди ’мбал!

Нӕ, нӕййес ин ӕййевдзи,

Ӕ тухст уодӕй, гъеуой е зудта.

Дӕхейау дин уарзта дӕ поэзи,

О ГЕУӔРГИ, дӕхе ЗӔРӔДА.

Ду ӕскъуӕлхттӕ ӕмдзӕвги исхарди.

Ду дзиллити рохс цардмӕ худтай,

Фалӕ дин дӕхе бон нӕ нинкъарди

Уарзти артмӕ худта ЗӔРӔДА.

Бакодта дӕу и цард фӕрсӕнцъолӕ,

Фал е дӕр минкъийдӕр нӕ уидта.

Ду арфиаг дӕ, ГЕУӔРГИ, – ДИГОРИ.

Дууӕ хатти арфиаг – ЗӔРӔДА!