25 июля 2024

«КОСУН КЕ ФÆНДУЙ, УОЙ ХУЦАУБОН ДÆР НÆ УОРАМУЙ…»

22.07.2023 | 12:04

Юрий Чайка æма Сергей Меняйло нæ республики гъæуайкæнуйнадон-промышленнон комплекси кустуæтти минæвæртти хæццæ ци еумæйаг æмбурд исаразтонцæ, уоми дзубанди цудæй аци къабази хуæрзцæттæ гъæугæ специалисттæ сæмæ ке нæ фагæ кæнуй, уой фæдбæл. Уогæ уæхæн уавæрæй тухстдзийнæдтæ ’взарунцæ иннæ промышленнон æма гъæууонхæдзарадон къабæзти дæр. Уотемæй ба нæ республики кустагор адæм æгæр берæ дæр ма ’нцæ.

Нæ рагфидтæлтæй нин байзадæй загъд: «Косун ке фæндуй, уой хуцаубон дæр нæ уорамуй…»

Æма уотæ нæй? Косун ке фæндæуа, уой хорбони хор æгæр содзуй, уарундзæги ба ниххулуй унæй тæрсуй…

Раст зæгъгæй, нури рæстæги алцæмæй дæр зæрдæмæдзæугæ куст зин иссерæн æй. Уомæ гæсгæ беретæ, æцæгæй косун ке фæндуй, етæ уæддæр цидæр равгитæ ерунцæ. Æма абони фæллойнади къабази уавæр цæхуæн æй?

«Цæгат Кавказстат»-и цæгатиристойнаг управлени куд игъосун кæнуй, уотемæй 2023 анзи январи-мартъий республики еугур кустуæттæ æма косæндæнтти фæллойнæгæнгути нимæдзæ рауадæй 114,7 мин адæймаги, гъома, фари еци рæстæги хæццæ рабаргæй, 100,0%.

Республикæ Цæгат Иристон-Аланий Адæмæн кустдæттæг комитети бæрæггæнæнтæмæ гæсгæ, 2023 анзи мартъий кæрон æгуст адæми номхигъдтæмæ хаст адтæй 3,4 мин адæймаги. Æгуст адæймаги официалон уагæвæрд адтæй 3,1 мин адæймагмæ (е æй, фари хæццæ рабаргæй, 26,1% минкъийдæр).

2023 анзи мартъий кæрони агъазесæг æгуст адæми нимæдзæ адтæй 2,1 мин адæймаги, гъома, фари хæццæ рабаргæй, 9,8 % минкъийдæр.

2023 анзи мартъий кæрон кустуæттæ æма косæндæнтти нæ фагæ кодта 1514 косæги, фарæ еци афони ба – 1586 косæги.

 

ЦИУАВÆР ДÆСНИАДÆ ЗÆРДÆМÆДЗÆУГÆДÆР ÆЙ?

Нури дæсниæдти ’хсæн тæккæ зæрдæмæдзæугæдæр кæцитæ ’нцæ? Дзиллон цæстингас бæлвурдгæнæг Еугуруæрæсеуон центри æртасгутæ уæхæн фарстатæ уæрæсейæгтæй кæмæ равардтонцæ, уони дзуæппитæ еумæйагæй рауадæнцæ мæнæ ауæхæн:

Информацион технологити специалист – 31%

Медицинон къабази косæг – 30%

Æфсæддон службæгæнæг – 19%

Ахуради къабази косæг – 16%

Косæг – 14%

Инженер – 10%