27 майя 2022

ӔМА ХАЙГИН КУД УОНЦӔ ЦАРДИ ЕУГУР ЦИЙНИТӔЙ!..

29.03.2022 | 09:56

Дзӕуӕгигъӕуи сувӕллӕнтти исфӕлдистади республикон Галауани ӕрӕги рацудӕй, «Мы есть. Мы здесь!..», зӕгъгӕ, документалон кинониви презентаци. Дзубанди си цӕуй Дауни синдроми хӕццӕ сувӕллӕнтти туххӕй. Аци мадзал арӕзт ба ӕрцудӕй уомӕ гӕсгӕ дӕр, ӕма, зундгонд куд ӕй, уотемӕй алли анз дӕр 21 мартъий бӕрӕггонд фӕццӕуй Дауни синдроми хӕццӕ адӕймаги Еугурдуйнеуон бон.

Кинониви уӕлдай фулдӕр ӕргом ӕздӕхт цӕуй еци сувӕллӕнтти исфӕлдистадон ирӕзтмӕ ӕма дзилли ‘хсӕн цардгъонӕй архайунбӕл ахур кӕнуни гъуддагмӕ.

Кинонивӕ исиста мӕскуйаг студи «Аланофильм» сценарийи автор ӕма ӕ продюсер ӕй Бзарти Аланӕ, режиссер ба – Андрей Зубарев.

Кинонивӕ есуни гъуддаги архайӕг еугур сувӕллӕнттӕ дӕр ӕнцӕ Галауани исфӕлдистадон къуӕртти иуонгтӕ  – уонӕн сӕ искурдиадӕ ӕнхӕстӕй раргом кӕнунӕн ӕма се ‘мгӕртти хӕццӕ ӕмгуст кӕнуни еугур фадуӕттӕ дӕр ес.