Цæгат Иристони Сæргълæууæг БИТАРТИ Вячеславæн адтæй фембæлд, аллибони царди аллихузи фарстати хæццæ хецауадæмæ æхе ка бахатта, еци адæми къуари хæццæ. Фембæлд арæзт æрцудæй, Уæрæсей Федераций Президентæн Дзæуæгигъæуи ци æхсæнадон уат ес, уоми.

Еци бон республики разамонæги хæццæ фембæлдмæ ка æрбацудæй, уонæй сæ еу адтæй Бигъулти Иринæ. Силгоймаги дзубандимæ гæсгæ, æ царди уавæртæ æнцæ тухстаг. Æ дууæ сувæллоней хæццæ (еу си æй уæлдай фæккæсуйнаг) цæруй ихуæрст фатери. Сувæллæнтти фидæ сæ хæццæ нæ цæруй, уæдта бийнонтæн агъаз дæр нæ кæнуй. Бийнонти еунæг æфтуйæггаг æй сахъат сувæллони пенси.

Хубиати Замирæ ба æвадуат уавæрти цæруй Заводи поселокки. Уомæй уæлдай ин гъæуй сæрмагонд дзæбæхгæнæн мадзæлттæ исаразун. Фал уомæн дæр æ пенсийæй уæлдай æндæр æфтуйæггаг нæййес.

Плити Жаннæ ба æй хъæболи хъæболи еунæг дарæг. Сувæллони мадæ рамардæй, фидæ ба æй уæззау сæйгæ. Жаннæ æхуæдæг дæр фæккæсуйнаг æй, куд æртиккаг къуари инвалид, уотæ. Силгоймаг куд радзурдта, уотемæй æй гъæуй æхцай агъаз е ’нæнездзийнадæ фæффедардæр кæнунæн æма сувæллони дарунæн.

Аци силгоймæгтæй алке хæццæ дæр лæмбунæг радзубанди кæнгæй, Битарти Вячеслав зæрдæ байвардта, гъæугæ фæрæзнитæ байагоруни фарстамæ лæмбунæг ке æркæсдзæнæй, уомæй.

Еци бон республики Сæргълæууæги хæццæ фембæлдмæ ка æрбацудæй, уонæй еу адтæй Æрæдони цæрæг Ульянæ Гриценко дæр. Е æхе бахатта, цæмæй нæ горæти Пролетарон æма Титови гъæунгти æхсæн арæзт æрцæуа къахвæндаг, Красногори астæуккаг скъолай ба раййевонцæ зингисервæзти нихмæ сигнализаци. Аци фарстатæ æвæстеуатæй ралух кæнун республики разамонæг баихæс кодта Æрæдони райони администрацийæн. Ульянæ æ радзубандий сæрмагондæй куд фæббæрæг кодта, уотемæй республики разамунди еудадзугон цæстдарди фæрци берæ хуарз æййивддзийнæдтæ цæуй муниципалитети æма уой туххæй загъта Битарти Вячеславæн.

Мæздæги цæрæг Еленæ Тимченко ба куд радзурдта, уотемæй къотæртæ æма æндæр зайæгойтæй исфæлуст кæнун гъæуй, сахари Юбилейон гъæунги ци нæуæг скъола байгон æй, уой алфамбулайтæ. Аци фарста ралух кæнуни фæдбæл Битарти Вячеслав сæрмагонд амунддзийнæдтæ равардта республики Æрдзон фæрæзнити æма экологий министради разамундæн. Уой хæццæ, республики Сæргълæууæг сахари цæргутæмæ фæсседтæй, цæмæй сæхуæдтæ дæр зæрдиагæй архайуонцæ бæлæстæ аразуни мадзали.

Стур Дигори цæрæг Тъурити Рубен ба республики разамонæги æргом раздахта бунæттон хеди уавæрмæ. Æ дзубандимæ гæсгæ, хед хъордард баййафта донивулдтити рæстæг. Гъуддагмæ æркæсун ихæсгонд æрцудæй Ирæфи райони разамундæн. Иннæ лухкæнуйнаг фарста, Одолай гъæуи донуадзæн ке нæййес, е. Битарти Вячеслави дзубандимæ гæсгæ, аци гъуддагбæл дæр гъæугæ ведомствитæ байархайдзæнæнцæ. Уомæй уæлдай, республики Сæргълæууæги дзубандимæ гæсгæ, ахсгиаг æй, цæмæй гъæути фæззинна фулдæр косæн бунæттæ, цæмæй хе минкъий хæдзарæдтæ ирæзонцæ.

– Республикæ æнхæст кæнуй аллихузи программитæ. Уонæй еу – гъæууон цæрæнбунæтти комплексон райрæзти программæ. Уой уæлæнхасæн фадуæттæ дæттуй бюджетон къабази гъæууон косгутæн сæ царди уавæртæ зингæ фæххуæздæр кæнунæн. Нæ зæрдæ дарæн, программи фæрци идарддзæф гъæутæмæ гъæугæ специалисттæ æрветуни фарста къæпхæнгай лухгонд ке æрцæудзæнæй, уобæл, – фæннисан кодта Битарти Вячеслав.

Фембæлди рæстæг каст æрцудæй æндæр фарстатæмæ дæр – алке курдиади туххæй дæр республики Сæргълæууæг равардта бæлвурд амунддзийнæдтæ. «Еу курдиадæ дæр æнæдзуаппæй гъæуама ма байзайа», – бафеппайдта Битарти Вячеслав æма Адæми курдиæдти хæццæ кусти управлений хецауи хуæдæййевæг Дудиати Павелæн баихæс кодта, цæмæй фæстæдæр фегъосун кæна, фарстатæ куд лухгонд цæунцæ, уой туххæй.

Цæгат Иристон-Аланий Сæргълæууæги æма Хецауади пресс-службæ