Ӕ уӕлзӕнхон цардӕй 29 ноябри ӕ 75-аг анзи рахецӕн ӕй нӕ Фидибӕсти номдзуддӕр адӕймӕгутӕй еу, космосон аппаратти конструктор, ССР Цӕдеси Паддзахадон премий лауреат Къомайти Владимири фурт Руслан. Рохсаг уӕд… Нӕ Исфӕлдесӕг ин дзенети уодӕнцойнӕдӕр рауӕн исаккаг кӕнӕд…

Къомайти Руслан нӕ дзиллӕн зундгонд адтӕй куд кӕдзосзӕрдӕ, ездон, ӕ равзурст гъуддагбӕл ӕновудӕй архайӕг ӕма ӕ карни нӕдтӕбӕл нифсгунӕй рацӕуӕг адӕймаг. Фидибӕстаг космосон къабазӕмӕ ӕ кусти рӕстӕг бахаста агъазиау байвӕрӕн. Куд зонӕн, уотемӕй, Къомайти Руслан фондз ӕма дууинсӕй анземӕй фулдӕр бакуста Лавочкини номбӕл наукон-кустадон  исконди (мастерӕй си райдайгӕй, исхизтӕй генералон директори фиццаг хуӕдӕййевӕги бунатмӕ). Къомай-фурти разамундӕй арӕзт ӕрцудӕй 500 космосон аппаратемӕй фулдӕр.

Къомайти Руслан ӕ дӕсниадӕ уарзта, ӕма ‘й уомӕ гӕсгӕ фӕндадтӕй, цӕмӕй ибӕл ӕхцул уонцӕ ирӕзгӕ фӕлтӕртӕ дӕр. Ӕ хъӕппӕресӕй ӕма е ‘вӕллайгӕ архайди фӕрци Дзӕуӕгигъӕуи иснӕуӕг кодтонцӕ планетари, исаразтонцӕ си космонавтики Скъола. Уӕхӕнттӕн нурма Уӕрӕсей ӕмбал нӕййес.

Берӕ цидӕр ахсгиаг гъуддӕгутӕ ма исаразуйнаг  адтӕй, фал ин, гъулӕггагӕн, нӕбал бантӕстӕй  ӕгъатир мӕлӕти фудӕй.

Фал уотӕ ка зӕгъуй, ӕма Къомайти Руслани ирд стъалу уоййадӕбӕл фӕттар ӕй, е раст нӕ уодзӕнӕй. Ӕ карни рохсдзийнадӕ ирд стъалуйӕй ӕрттевдзӕнӕй дзилли зӕрдити – ӕ арфиаг гъуддӕгутӕй, ӕ берӕ агъазиау ӕскъуӕлхтдзийнӕдтӕй.

Нӕкӕси, евгъуд ӕртиккӕги нӕ республики Сӕргълӕууӕг Сергей Меняйло телеуинунади фӕрци дзуӕппитӕ лӕвардта адӕми фарстатӕн. Ӕма уоми райгъустӕй уӕхӕн фӕндӕ, цӕмӕй нӕуӕг игонгонд стъалутӕй еуемӕн Къомайти Руслани ном лӕвӕрд ӕрцӕуа. Еци гъуддагбӕл байархайунӕй зӕрдӕ байвардта республики Сӕргълӕууӕг. Уомӕн рӕстӕг багъӕудзӕнӕй, нур ӕхе Указӕй ин исаккаг кодта (ӕ рамӕлӕти фӕсте) орден «Иристони Намус».