19 майя 2024

ХАБÆРТТÆ. ЦАУТÆ.

23.09.2023 | 21:51

Сæрмагонд æфсæддон операций архайæг иристойнаг тугъдонти дæлхайæдтæн Цæгат æма Хонсар Иристони разамонгутæ Сергей Меняйло æма Гаглойти Алан бабæй рарвистонцæ материалон-техникон ефтонггæрзтæ: æмарæзти комплекттæ, сæ архайд ахедгæ кæмæн æй, уæхæн дæсгай дронтæ, æма идарддзæф æгъдауæй архайун кæмæй æнгъезуй, уæхæн дзихъиртнæуæг квадрокоптертæ, кæцитæн сæ бон æй цæлхдортæ еуварс кæнун хъаурæгиндæр оптикон системи фæрци.

*  *  *

Национ проект «Æнæнездзий-надæ»-йи регионалон программæ «Зæрди тогдадзинтти незти нихмæ тох»-и фæрци республикон клиникон сæйгæдони фæззиндтæй еума – цуппæрæймаг – магнитон-резонансон томограф. Уой фæрци нерæнгæ бал исаразтонцæ 800 æртасæнемæй фулдæр – æркæсунцæ еу бонмæ финддæс сæйгемæ. Диагностикæ искæнун сæйгитæн сæ бон æй, айдагъ сæйгæдони сæхе дзæбæхгæнгæй нæ, фал поликлиникæй гæгъæдитæ райсгæй дæр.

*  *  *

Маддæлон æвзаги ахургæнгути ’хсæн Еугуруæрæсеуон профессионалон конкурси еу хаййæн – «Скъоламæ цæуни агъоммæ кари сувæллæнтти ’хсæн маддæлон æвзаг парахат кæнуни хуæздæр фæлтæрддзийнадæ» – æ кæронбæттæни еристæ арæзт æрцудæнцæ Цæгат Иристони, иннæ хаййæн – «Маддæлон æвзаг æма литератури ахургæнæг» – ба Хъæрæсе-Черкесий. Сæ хатдзæгтæ исбæрæг уодзæнæнцæ абони, 23 сентябри.

*  *  *

Æрæги Дзæуæгигъæуи 42-аг скъолай ци технопарк «Кванториум» байгон æй, е иссæй Цæгат Иристони æртиккаг уæхæн нуриккон технологон ефтонггарз. Уонæн сæ нисан æй инновацион технологитæй ахурдзаути ефтонг кæнун, бæрзонд арæхстдзийнадæ кæмæ уа, уæхæн специалисттæ цæттæ кæнун.

Республики алли рауæнти цæрæг сувæллæнттæ ами бундоронæй ахур кæнунцæ хими, биологи, робототехникæ…

*  *  *

Дзæуæгигъæуи арæзт æрцудæй, се ’нæнездзийнадæмæ гæсгæ гъигæдард  ка æрцудæй, уæддæр спортбæл ба æновуд ка ’й æма си разæнгардæй ка архауй, еци спортсменти спартакиадæ. Равардтонцæ ин алæмæти нифсдæттæг ном – «Дуйне æнæ арæнтæй».  Спартакиадæ нæ республики арæзт цæуй цалдæрæймаг хатт. Нури еристи архайгутæ иссæнцæ дууæ карей спортсментæ – 14 анземæй 17 анзей уæнгæ кæбæл цæуй, етæ, уæдта хестæрдæртæ.