Уæрæсей Президент Владимир Путин 23 феврали Фидибæстæ гъæуайгæнæги Бони фæдбæл Мæскуй Кремли Устур галауани Георгий номбæл зали исаразта цитгингæнæн мадзал. Æма се ’фсæддон ихæстæ æхсаргинæй æнхæст кæнгæй, алæмæти æскъуæлхтдзийнæдтæ ке равдистонцæ, уой туххæй Уæрæсей Федераций Бæгъатæри кадгин ном ци еуæндæс æфсæддонемæн аккаггонд æрцудæй, уонæн равардта сæ бæрзонд паддзахадон хуæрзеугутæ. Еци æхсаргин тугъдонтæй еу – не ’мзæнхон Тибилти Геуæргий фурт Марат, Национ гвардий майор.

Бæгъатæртæн сæ хуæрзеугутæ исаккаг кæнуни мадзали рæстæг Владимир Путин æ радзубандий сæрустурæй загъта:

– Сæрмагонд æфсæддон операций архайгутæ æвдесунцæ æгæрон бæгъатæрдзийнадæ, се ’фсæддон ардбахуæрдбæл æновуддзийнадæ, нæ Фидибæсти раздæр рæстæгути бæгъатæрти фæлтæрти намусбæл еузæрдиуондзийнадæ. Мæнæн уæлдай æхцæуæн æй абони сумахæн Уæрæсей Бæгъатæри Сугъзæрийнæ Стъалутæ раттун. Сумахæй беретæ ’нцæ сæрмагонд æфсæддон операций фиццаг бонæй фæстæмæ уодуæлдайæй архайгутæ. Бæрнон ихæстæ уæбæл æвæрд ес, берæ фæлварæнти сæрти рахизтайтæ, æма алкæддæр фæууотæ бæрзонд профессионалон цæттæдзийнади, бæгъатæрдзийнадæ æма патриотизми ирд  цæветтонтæ. Арфæ уин кæнун, Фидибæсти сæрбæлтау карз тохи лæгигъæдгунæй ке балæудтайтæ, уой туххæй.

Ку зæгъæн Уæрæсей Бæгъатæри ном аккаггонд кæмæн æрцудæй, уонæй еу æй не ’мзæнхон, Национ гвардий майор Тибилти Геуæргий фурт Марат дæр. Еци æхцæуæн хабарбæл хъæбæр зæрдиагæй бацийнæ кодтонцæ нæ дзиллæ. Нæ республики Сæргълæууæг Сергей Меняйло æ телеграм-канали цийнæгæнгæй фегъосун кодта: «Зæрдибунæй арфæ кæнун Маратæн, Иристон си сæрустур æй!..»

Уæ зæрдæбæл уин æрлæуун кæндзинан уой дæр, æма уой размæ ма не ’мзæнхонтæй Уæрæсей Бæгъатæри Сугъзæрийнæ Стъалуйæй хуарзæнхæгонд æрцудæнцæ Есенати Таймураз, Максим Стефанов, Абайти Юрий, Датити Алан, Аслан Гоов æма Александр Данилов.

Не ’мзæнхон бæгъатæри æскъуæлхтдзийнади туххæй Уæрæсей гвардий пресс-служби игъосункæнуйнаги уотæ загъд ес: «Майор Тибилти Марат сæрмагонд æфсæддон операций райдайæни æ тæккæ фиццаг бонтæй фæстæмæ тохгæнгæй раззаг рæнгъити, æнхæст кодта сæрмагонд ихæстæ. 2022 анзи ци бæгъатæрдзийнадæ равдиста тугъди будури, уой туххæй ин лæвæрд æрцудæй Лæгдзийнади дууæ ордени».

Тибилти Марат æхуæдæг куд нимайуй, уотемæй еци хуæрзеуæг æй, Уæрæсей гвардий сæрмагонд нисанеуæги дæлхайади ци къуари медæгæ тох кæнуй, уони еумæйаг æнтæстдзийнадæ. Дзиллон хабархæссæг фæрæзнити минæвæртти хæццæ дзубанди кæнгæй, Марат куд зæгъуй, уомæ гæсгæ сæрмагонд нисанеуæг кæмæн ес, еци къуари иуонгтæ куд раздæр, уотæ нур дæр разæнгардæй æнхæст кæнунцæ сæ размæ æвæрд ихæстæ. Æ дзубандимæ гæсгæ 1 январи æ къуари хæццæ Суджани райони нихкъуæрд равардта украинаг гæрзефтонг тухтæ уой размæ нæ нихмæ ци фондз æрбампурсти исаразтонцæ, уонæн.

– Сæйрагдæр тугъдтитæ райдæдтонцæ 5 январи. Уой агъоммæ дæр ма архайдтан знаги бунæттæ исбæлвурд æма сæ искунæг кæнуни тугъдон мадзæлтти, сæ тохгæнгутæ æма син се ’фсæддон техникæ искунæг кæнунбæл тугъдтити. Фал сæйраг архæйдтитæ ба æрцудæнцæ 5-8 январи. Знæгтæ лæгарстонцæ æма лæгарстонцæ, гъавтонцæ Суджани райони гъæутæ Бердино, Розгребли, Новосотницкое байсунмæ. Мах сæрмагонд къуар «Ахмат»-и хæццæ сæ нихмæ гъæддухæй фæллæудтан æма сæ фæндитæй неци рауадæй…

Æ дзубандимæ гæсгæ, е ’мтохгæнгутæ разиндтæнцæ æцæг бæгъатæртæ. Сæ федар нихмæлæуди фæрци знагæн нæбал бантæстæй Курски облæсти иннæ районтæмæ балæгæрдун.

– Нæ нихмæлæугутæ уорæд æрцудæнцæ, идарддæр рацæуни фадуат син нæбал равардтан, имисуй Марат. – Нæ дæлкъабазæ исрæмугъта знаги цуппар техникон еуæги, 60-70 тугъдони ба си кунæггонд æрцудæнцæ…

Курски облæсти губернатори ихæстæ æнхæстгæнæг Александр Хинштейн æ телеграм-канали куд игъосун кæнуй, уотемæй Тибилти Марат æма иннæ гвардион Андрей Филоненко уæлдай лæгæхсаргиндæрæй равдистонцæ сæхе. Андрейæн дæр лæвæрд æрцудæй Уæрæсей Федераций Бæгъатæри ном.

– Уæлдай æхцæуæн дæр ба мин е æй, æма аци дууæ бæгъатæри уæхæн агъазиау лæгдзийнадæ Курски зæнхæбæл ке равдистонцæ, – баханхæ кодта А. Хинштейн. – Се ’скъуæлхтдзийнæдтæй еу – украинаг гæрзефтонг тухти æрбампурст бауорамуни гъуддаги уоййасæбæл уодуæлдайæй ке байархайдтонцæ.

Региони губернатори ихæстæ рæстæгмæ æнхæстгæнæги дзубандими гæсгæ, Уæрæсей гвардий æфсæддонтæн бантæстæй тугъдон архæйдтити рæстæг 5 январи знаги фиццаг раззаг танк фехалун, æма уой фæрци бантæстæй уавæр бустæги фендæрхузон кæнун, знаги æмпурсæг хæйттæ ниддæрæн кæнун: «Аци дууæ бæгъатæрей, «Талиб» æма «Артист»-и (Тибилти Марат æма Андрей Филоненкой фæсномугтæ) тугъдон хъазауат, е дæр айдагъ курскаг зæнхæбæл нæ, æй агъазиау æфсæддон арæхстдзийнади, ихæсбæл æновуддзийнади, Райгурæн бæстæбæл еузæрдиуон уни дæнцæ, ирд æвдесæнæй æвдесуй, уой сæрбæлтау сæ цард раттунмæ цæттæдзийнадæй æнхæст ке ’нцæ, национ гвардий æфсæдтæ цæмæйдæриддæр намусгин æнцæ, еци еугур менеугутæй дæр».

Плити Исси номбæл Полкки телеграм-канали ба мæнæ куд финсунцæ: «Тибилти Марат æфсæддон ихæстæ æнхæст кодта Запорожьей, Донецки, Лугански æма Курски облæстити. Æ къуари хæццæ ’й тох кæнун багъæуй, сæ равгитæ æма гæнæнтæ хъæбæр кадавар кæми разиннунцæ, сæхе цардæн хъæбæр тæссаг кæми фæууй, уæхæн рауæнтæ æма уавæрти дæр, æма си алкæддæр уæлахезæй рацæунцæ. Æй рæстзæрдæ, фал домагæ командир. Æ дæлбарæ æфсæддонтæбæл ауодуй, куд фæззæгъунцæ, æ реугудурæй сæ гъæуай кæнуй тугъдон уавæрти. Æ цъухæй ахид фегъосун æнгъезуй уæхæн зæгъдтитæ: «Мæн хуæрзеугутæ нæ гъæуй, фæттæ мин раттетæ…»

Кæддæр дзиллон хабархæссæг фæрæзнити минæвæртти фæрститæн дзуапп дæтгæй, Марат уотæ радзурдтæ:

– Мæ мади ’рдигæй ме ’ртæ бабай дæр тугъдонтæ адтæнцæ. Дууемæй нæбал исæздахтæнцæ тугъди будуртæй, сæ тугъдон ихæстæ рæстуодæй æнхæст кæнуни сæрбæлтау иснивонд кодтонцæ сæ цард. Сæ астæуккаг æнсувæр ба 1954 анзи Львови зæнхæбæл фæммард æй украинаг бандитти кунæг кæнуни тохи. Уой сæрмагондæй уомæ гæсгæ баханхæ кодтон, æма, кæсайтæ, истори бабæй нæуæгæй куд фæлхатгонд цæуй – абони ба мах багъудæй, еци бандитти байзайæггæгтæй сæ фидтæлти æверхъаудзийнæдтæ иснæуæг кæнунмæ ка багъавта, уони нихмæ тох кæнун. Мæ фиди фидæ дæр Устур Фидибæстон тугъди архайæг адтæй, цуппар хатти фæцæй уæззау цæфтæ. Рæстдзæвийнæ ’хсæг уогæй, æ еу цæстæ исхаудтæй. Мæ хуæрз æрвадтæлтæй дууæ æнсувæри дæр нур æфсæддонтæ ’нцæ, етæ дæр æма мæхе æнсувæртæ дæр æнцæ сæрмагонд æфсæддон операций архайгутæ…

Тибили-фурт райгурдæй æма гъомбæл кодта Чермени гъæуи. Уой фæсте бийнонтæ сæ цæрæнбунат раййивтонцæ Дзæуæгигъæумæ. Каст фæцæй ами 46-аг астæуккаг скъола. Тибилти бийнонтæ нимайун æнгъезуй бæгъатæрти бийнонтæбæл. Сæрмагонд æфсæддон операци ку райдæдта, уæд си сæ хуæрз æнсувæртæй æма се ’рвадтæлтæй æхсæземæй тохунмæ рандæ ’нцæ. Етæ кæрæдзебæл æхцул æнцæ, кæрæдземæй сæрустур æнцæ.

– Марат æхсаргин гъуддæгутæй ке фескъуæлхдзæнæй, е ми алкæддæр æруагæс кодта, – зæгъуй е ’рвадтæлти лæхъуæн, бархеуон Тибилти Энвер. – Æхе еске фæсте римæхсун ахур некæд адтæй, алкæддæр реуигонæй цудæй размæ. Хъæбæр æхцæуæн нин æй, Райгурæн бæстæ ин æ лæгдзийнадæн уæхæн устур кадæ ке искодта…

Нæ дзубандий кæронбæттæни не ’хсаргин æмзæнхон Тибилти Маратæн зæрдиагæй арфæ кæнæн æ бæрзонд хуæрзеуæги туххæй, æма не ’Сфæлдесæгæй корæн уой, цæмæй Марати æма æ тугъдон æмбæлтти дæр гъæуай кæна, цæмæй тугъд тагъд рæстæги фæууа æма еугурæй дæр сæрæгасæй сæ фидиуæзæгтæбæл исæмбæлонцæ…

Æрмæг бацæттæ кодта БИЧИЛТИ Алетæ