Зундгонд куд æй, уотемæй Уæрæсей Президент Владимир Путини хъæппæресæй æнхæстгонд цæудзæнæй национ проект «Фæсевæд æма сувæллæнттæ». Уомæн æ нисанеуæг æй кæстæрти гъомуси берæвæрсуг гæнæнтæй рæстмæ æма арфиаг гъуддæгутæ аразунæн æнхæстæй пайда кæнун, сæ искурдиæдтæ раргом кæнунæн æма син сæ бæлдитæ исæнхæст кæнунæн  агъаз…

Еци нисанеуæги фæдбæл бæлвурд куст цæуй мах республики дæр. Уобæл цудæй дзубанди, Цæгат Иристони Сæргълæууæг Сергей Меняйлойæн æрæги Цæгат Иристони Хетæгкати Къостай номбæл паддзахадон университети ахурдзаути хæццæ ци фембæлд адтæй, уой рæстæги дæр.

Дууæ сахаттемæй фулдæр рахаста, уоми æргом дзубанди. Дзурдтонцæ си фæсевæдæн сæ бæлдтаг гъуддæгути агъази мадзæлттæбæл, нуриккон ахурадон æгъдæуттæ æма фæткити туххæй, абони æхсæнади  циуавæр дæснийæдтæ æма специалисттæ хъæбæрдæр гъæуй æма æндæр фарстатæбæл. Студенттæ устур цæмæдесæй фарстонцæ нæ республики фæзуати идарддæри райрæзти туххæй, уæдта ма Сергей Меняйлойæн радзурдтонцæ, нæ абони цардарæзти алли ахсгиаг фарстатæ ралух кæнунæн сæмæ ци гъудитæ æма фæндитæ ес, уони фæдбæл. Уæхæн дзубанди, æнæмæнгæ, фæййагъаз  æй æригæнтти домæнтæ æма сагъæссаг фарстатæ арфдæр балæдæрунæн.

Сергей Меняйло ма куд баханхæ кодта, уотемæй фæсевæди хæццæ уæхæн фембæлдтитæ идарддæр дæр арæзт ке цæудзæнæнцæ, уомæн æма республики исонибони ирæзти гъуддæгутæ æнтæстгиндæрæй æнхæст кæнунæн  агъаз æнцæ.

Фембæлди кæронбæттæни ба Сергей Меняйло загъта:

– Абони мах нæ еугур хъауритæй дæр алцидæр аразæн, цæмæй Уæрæсей цардиуагæ бонæй-бонмæ хуæздæр кæна. Уоми ба сумах нæ нифс айтæ, сумахбæл дарæн нæ зæрдæ, уомæн æма сумахæй  алкедæр æхе бунати Райгурæн бæстæн пайдахæссæг уодзæнæй. Сумах – исонибони  дохтиртæ, экономисттæ, юристтæ, инженертæ, административон косгутæ – уæ куст, уæ размæ æвæрд нисантæ, куд гъæуй, уотæ ку æнхæст кæнайтæ, уæд нæ бæсти размæцуд, ирæзт æма æдасдзийнадæмæ устур æвæрæн бахæсдзинайтæ, уодзинайтæ ин аккаг граждæнтæ. Хъæбæр æхцæуæн мин адтæй уæ еугурей фæууиндæ дæр. Царди надбæл рæствæндаг уотæ! Зиндзийнæдтæ дæр, ке зæгъун æй гъæуй, æвзардзинайтæ, фал уой хæццæ ба уæлахезтæ дæр уæмæ æнгъæлмæ кæсунцæ. Уæлдай сæйрагдæр ба е æй, æма  ци нисантæ æвæретæ уæ размæ, уонæмæ, кедæр фæрсаг агъазмæ æнгъæлмæ нæ кæсгæй, уæхуæдтæ уæхе хъаурæ æма нифсæй  æдæрсгæй цæунгъон, уæдта сæбæл дзуапп дæттунгъон  куд уайтæ.