ÆХСАРГИН КА УА, РАЗДЗÆУÆГÆН ДÆР Е БÆЗЗУЙ!..
Зундгонд куд æй, уотемæй Уæрæсей Президент Владимир Путини унаффæй федаргонд федералон проект «Бæгъатæрти рæстæг»-и фæлгæти нæ республики æнхæстгонд цæуй ахурадон программæ «Æхсаргин Иристон».
Уоми архайгутæн æрæги арæзт æрцудæй сæрмагонд фембæлд. Дзубанди си цудæй сæ идарддæри ахурти æма архайди фæдбæл фарстатæбæл. Зæрдиаг арфитæ син ракодтонцæ (видеобастдзийнади фæрци) республики Сæргълæууæг Сергей Меняйло, Цæгат Иристони Хецауади Сæрдар Дзанайти Барис, республики фæллойнæ æма социалон ирæзти министр, Уæрæсей Бæгъатæр Абайти Юри æма Президентон Академий паддзахадон разамунди уæлдæр скъолай директор Олег Кондратенко.
– Мах нæ кæрæдзей хуарз зонæн, уомæн æма еу гъуддаг æнхæст кæнæн, – загъта æ радзубандий Сергей Меняйло. – Мæнæй æруагæс кæнуй, уæ къохи алцидæр ке бафтуйдзæнæй. Нæ сæйрагдæр нисан æй сæрмагонд æфсæддон операций архайгутæн аккаг кусти бунæттæ иссерун, цæмæй, ци зонундзийнæдтæ райстайтæ, етæ Иристон æма нæ бæсти хуарздзийнадæн фæппайда уонцæ!
Æдеугурæй проекти архайунмæ сæ курдиæдтæ балæвардтонцæ 385 адæймаги. Етæ ‘нцæ сæрмагонд æфсæддон операций архайгутæ æма ветерантæ. Уони ‘хсæнæй равзурстонцæ 157 адæймаги. Идарддæр æхсæнадон совети иуонгтæ ‘ркастæнцæ республикон ахурадон программæ «Æхсаргин Иристон»-и кандидаттæй алке бæрæггæнæнтæмæ дæр. Æма гъæлæскæнуни хатдзæгтæмæ гæсгæ, уонæй 32 иссæнцæ кæронбæттæни уæлахездзаутæ æма архайдзæнæнцæ комплексон ахурадон программи. Сæ еугуремæ дæр ес уæлдæр ахурадæ, æнцæ Иристони цæргутæ.
Программæ арæзт цæуй Президентон академий паддзахадон разамунди уæлдæр скъолай агъазæй – æ минæвайрадæ ‘й нæ региони. Программæ «Æхсаргин Иристон» ци косæг къуар бацæттæ кодта, етæ рацудæнцæ сæрмагонд ахуртæ æма бæлвурдæй базудтонцæ, уæхæн программитæ куд аразгæ ‘нцæ, уой.
Къурси фæлгæти нисангонд æрцудæнцæ ахуради сæйрагдæр къабæзтæ, паддзахадон политикæ æма паддзахадон разамунди системæ; экономикæ æма финанстæ; регионалон æма муниципалон разамунд; разамунди нуриккон технологитæ.
Ахурадон программæ ‘й гъæздуг æма алливæрсуг: стажировкитæ, идарддзæф къурситæ, адæймаги ирæзти мадзæлттæ æма культурон хъæппæрестæ.
Еу хатт ма уой зæгъуйнаг ан, æма республикон паддзахадон программæ «Æхсаргин Иристон» арæзт æй, сæрмагонд æфсæддон операций архайгутæ æма ветерантæй бæрзонд цæттæдзийнадæй æнхæст æма гъуддагзонæг разамонгутæ бацæттæ кæнун, цæмæй сæ бон косун уа паддзахадон хецаудзийнади оргæнти, аллихузи организацитæ æма региони æхсæнадон еугæндти.