Зундгонд дохтир Борухъути Елæмурзæ, афгайнаг тугъди архайгæй ци бонуг фæффинста, уомæй хецæн хæйттæ ниммухур кодтан нæ газети айразмæ дууæ номереми (16 æма 22 феврали). Абони ба си мухур кæнæн еума хай.

18 июнь. Æзинæ Сабурмæ душмантæ фондземæй бацудæнцæ, æндæмæ ’й сайдтонцæ æма син нæ бакумдта. Æ уоси хæццæ æхсæвæ гæрзефтонгæй кезугай гъæуай кодтонцæ кæрæдзей.

Хуссæгæй ма бафсæдæ, – зæгъуй Сабур.

20 июнь. Сабур æ царди уавæрти фæдбæл адтæй министрмæ. Барæ ин равардтонцæ, цæмæй æ бийнонти къуари хæццæ цæрунмæ баледза дууæуæладзугон хæдзарæмæ. Ами цæрун райдæдта  Хади Карим дæр. Хæдзарæ æй, фæсарæнмæ ка фæллигъдæй, уæхæн гъæздуг лæги.

30 июнь. Цалдæр боней размæ Кариммæ æстæги саст ивазæн  50 тели равардтон, цæмæй сæ операцигæнæнмæ фæххæсса æма сæ медицинон хуæрæмæ ратта.

– Уотемæй сæ исгъæздуг кæндзæнæ: еу тел дæр лæвар нæ ратдзæнæнцæ сæйгæн.

Уой фæдбæл син се ’мбес æхемæ ниууагъта, иннети равардта, æз хестæр хуæрæн зæрдæ байвардтон, уомæ гæсгæ. Нур мин Карим фегъосун кодта: æхемæ ци 25 тели ниууагъта, уони еу медицинон хуæри скъаппи рæстæгмæ бафснайдта æма ин сæ уордигæй радавтонцæ.

5 июль. Дууæ-æртæ боней размæ аэропорт ци хæстæг гъæути разæй æхстонцæ, уордигæй нæмæ æрбаластонцæ æхсæз æма инсæй цæфи (18-30 анздзуд биццеутæ). Планерки куд бадтан, уотемæй нæмæ фельдшер фæффæдеси æй. Еуæй-еуетæ фæттагъд кодтонцæ цæфтæн агъазмæ. Иннетæ – Латиф, Сароби, Рахмат – цæфтæмæ кæсгæ дæр нæ бакодтонцæ. Куд рабæрæг æй, уотемæй цæфтæ адтæнцæ адæмон дружинитæй, æхсæвæ душманти хæццæ тох кæнгæй, фæццæф æнцæ. Беретæ си фæммард æнцæ.

Цæфтæн агъазгæнгæй, бафеппайдтонцæ берæ гъæнтæ æма сахъатдзийнæдтæ. Уони райеуварс кæнуни туххæй бæргæ дзурдтон (тæлмацгæнæг Хади Карим), фал син си неци рауадæй. Президент Бори æгæр-мæгур 100 грамми дæр не ’самал кодта тог. Е уомæн, æма цæфтæ адæмон дружинитæй æнцæ.

Профессор Латиф нæ бафæразта æ цæстингас баримæхсун æма загъта:

– Ци агурдтонцæ, уой иссирдтонцæ!

Уæлдай уæззаудæр цуппар цæфемæн нæмгутæ сæ хурфидзаумæутти бахизтæнцæ. Сæ фæййервæзун кæнуни туххæй гъудæй æвæстеуат хирургон агъаз, фал син агъазгæнæг нæ фæцæй æма рамардæнцæ.

Хади Карим исмæстгун æй:

– Нæуæг цардаразгутæ тугъдæй цæфтæй райервазтæнцæ æма син агъази бæсти ами адзал иссерун кодтонцæ. Еуцалдæремæн ба сæ къабæзтæ ралух кодтонцæ, кæд син исдзæбæхгæнæн адтæй, уæддæр.

28 август. Хади Карим æма Сабур Гардези мæстгунæй æрбацудæнцæ кустмæ. Æзинæ сæмæ госпитæли президент фæдздзурдта министри фæдзæхстмæ гæсгæ æма син балæдæрун кодта, цæмæй æндæрæн исуæгъдæ кæнонцæ, ци бунæтти цæрунцæ, уони.

Сæ катай еуæрдигæй æй, кумæ рандæуонцæ, уобæл, иннердигæй ба мæстгун кæнунцæ – цæмæн?

Революций размæ Кабули цардæй 530 мин адæймаги, нур ба 2 миллиони æма 300 мини. Фатер еуемæй зин иссерæн æй, иннемæй ба æ байхуæрсун хъазар – 2000 афгани (дохтири мæйи мизд).

– Æз некумæ цæуйнаг дæн, рагæлдзæнтæ мин мæ дзаумæуттæ, уæдта бæрæг уодзæнæй, – æртхъерæн кæнуй Хади.

Уæхæн зундбæл лæуд æй Сабур дæр:

– Уой бæсти мæ куст ниууадздзæнæн æма еу минкъий тукан байгон кæндзæнæн.

29 август. Ахури анз кæд райдæдта, уæддæр студенттæ нур æртиккаг бон нæма фæззиндтæнцæ. Мæ десгæнгæ фарстайæн дзуапп адтæй:

Уæдта нæма ’рбацæудзæнæнцæ еуцалдæр бони, уотæ кæнунцæ студенттæ семестри райдайæни.

Латиф мæмæ фæдздзурдта палатæмæ æма мæмæ равдиста топпæй цæф сæйгити. Æ къах уæрагæй дæлæмæ сау. Сæйги æзинæ æ кезу хæссуни рæстæг исæвардта Хади Карим. Къах адтæй бинтæй баст, сæумæмæ ниссау æй.

Профессор Латиф мин бауайдзæф кодта, Хади Карими кустæй арази ке нæй, уой. Гъома, е ба дин махмæ ахургонд дохтир. Уотемæй ба фуддæр, æдзæллаг хабæрттæ æнæуинæг искæнуй æхе алли хатт.

31 август. Нæ госпитæлмæ ’рбахаудтæй æвддæс-æстдæсанздзуд кизгæ. Æ къахи дууæ стæги уæрагæй дæлæмæ саст. Куд рабæрæг æй, уотемæй æй е ’нсувæр биццеуи хæццæ лæугæ ке фæууидта, уой туххæй æй хъæбæр фæннадта æма ма ин æ къах дæр расаста.

3 сентябрь. Абони студенттæ кæдæй-уæдæй фæззиндтæнцæ.

4 сентябрь. Æхсæвæ карз тугъд цудæй аэропорти ’рдигæй, хуæнхти фæсте.

25 сентябрь. Хади Карими фидæ Меккæ-Мæдинæй æрбаздахтæй. Æ балцийæй арази нæй. Хаджимæ балций адæм нур уæлдай фулдæр цудæй. Е ба уомæн, æма аци анз дини бæрæгбон райдæдта майрæнбони æма уæлдай кадгиндæр æй пусулмон æгъдаумæ гæсгæ. Адæм æгæр берæ ке адтæй, сæ фулдæр сæ кари адæм æма сæйгитæ, бунат ба унгæг, уæдта дессаги тæвдæ, уомæ гæсгæ зæрæндтæ къæхти буни мардæнцæ.

6 октябрь. Абони хунди адтæн, нæ дохтиртæй цуппаремæй тагъд агъази госпитæлмæ косунмæ ке цæунцæ, уой фæдбæл. Хунд исаразтонцæ президенти косæн уати. Афгантæй игъаугидæр ма си адтæнцæ Гольден æ бийнойнаги хæццæ, австрийаг нæуæг хирург æ бийнойнаги хæццæ (ами æй фиццаг хатт фæууидтон), венгр Мортон. Афгайнаг хирургтæ си адтæнцæ æвзурстæй (сæрæндæртæ).

10 октябрь. Сабур дзоруй:

– Мах адæм Хуцаубæл хъæбæр æууæндунцæ. Фал æз Бабрак æма ревсовети иуонгтæбæл куд æууæндун, уотæ некæбæл баууæнддзæнæн. Айдагъдæр дæлдæрлæууæг æхсæнадон хецауадæй беретæ нæ нихмæ косунцæ.

Еу æригон нæлгоймаг сæйгæ хуссуй тургъи (палатити ахид бунат нæ фæууй) æма мæмæ фæдздзурдта. Балæдæрун мин кодта, бæсти цæгати фæскомцæдеси къуари хецауæй куста æма ибæл минæ багæлстонцæ, зæгъгæ. Æ галеу къах ин ратудта, æ рахес ба уæззау цæфтæ ’й. Гъаст кæнуй, æртиккаг бон, дан, мæмæ хæстæг неке цæуй, судзинттæ ин нæ кæнунцæ, уæдта ин æ цæфтæ нæ бæттунцæ.

Мæ дзубандий фæсте сæйгæн алцидæр арæзт æрцудæй.

5 ноябрь. Фæстаг бæнтти нæмæ рохс ахид нæ фæууй: душмантæ хонхи ихалунцæ электрон тухæдæттæн цæгиндзитæ.

9 ноябрь. Хади Карими гъæуæй еу лæг æрбацудæй æма ин фегъосун кодта, æ фидæ уæззау уавæри ке бахаудтæй, уой. Меккæ-Мæдинæй æрбаздахуни фæсте е ’мбали хæццæ Кабулæй сæ облæсти центри уæнгæ бахъæрттæнцæ хуæдтæхæгæй. Уордигæй сæ сæхемæ цæун гъудæй хуæдтолги. Фал хуæнхбæсти нæдтæ фудмиутæ аразгутæ фехалдтонцæ.  Карими фиди е ’мбали хæццæ цæун багъудæй  фестæгæй. Еу рауæн сæбæл абæргутæ фембалдæнцæ æма сæмæ цидæриддæр иссирдтонцæ, уони байстонцæ.

Цалдæр боней фæсте сæ гъæуи ’рцардæнцæ душмантæ æртæсæдæ адæймагемæй. Кæми æрæнцайунцæ, уоми фæуунцæ  хæдзæрттæбæл иурст (8-10 лæги алли хæдзари дæр). Æма сæ ци фæндуй, уой кæнунцæ. Дуккаг бон Хади Карими фидæмæ æма е ’мбалмæ фæдздзурдтонцæ «Ислами революцион комитетмæ» (уотæ хонунцæ сæхе душмантæ).

Душманти къуари хецауæн æ секретарь кæсуй журналмæ æма игъосун кæнуй, бийнонтæй ка ци косæг æй æма кæми æй, уой. Алцидæр син зундгонд æй. Сæрмагондæй фиди фарстонцæ Хади Карим æма æ иннæ биццеуæй – Мæскуй ин ка ахур кæнуй, уой туххæй.

Секретарь фидæмæ æ цæстæ фæнникъулдта, уотемæй хецауæй баримахста, æ биццеу Мæскумæ ахур кæнунмæ революций фæсте ке рандæй, уой. Дзуапп ин равардта, революций размæ рандæй, зæгъгæ.

Уой фæсте хецау рахаста тæрхон – фидæ бони æмгъудмæ душмантæн 62 мин афгани куд бафеда, уотæ. Фал фиди курдиадæмæ гæсгæ æмгъуд къуæрей уæнгæ раргъавта.

Уæдмæ душманти хæццæ исхуæстæй, æртæсæдæ фудгæнæгемæй фулдæр кæми адтæй, æндæр уæхæн душманти къуар æма фиццæгти гъæуæй фæссурдта. Фал уæддæр тæрхонæн æнæ æнхæстгæнæн нæййес. Секретарь ма æ хецауи сосæггай Хади Карими фидæй 500 афгани байагурдта, æ фурти æцæг хæбар ин ке баримахста, уой туххæй.

Редакцийæй: Уоййадæбæл бал фæцан Борухъуати Елæмурзи «Афгайнаг бонуг»-æй хецæн хæйттæ мухургонд. Ка ’й зонуй, фæстæдæр ма нин фууодзæнæй равгæ кæцидæр хæйттæ ма си рамухур кæнунæн.