Мæскуй ирон æхсæнади айразмæ байгон æй аййевадон равдист «Уалдзæг. Иристон. Уарзт», зæгъгæ, уæхæн номи хæццæ. Уомæй минкъий фæстæдæр ба, Уæрæсей Федераций Совети байгон æй нæуæг равдист «Æнсувæрдзийнади цæсгæнттæ». Арæзт æрцудæй Цитгин Уæлахези 80 анзей  исæнхæсти кадæн. Æвæрд си æрцудæй фондз æма цуппаринсæй кусти.

Аци равдиститæ  дууемæй дæр комкоммæ арæзт æнцæ Уæрæсей Федераций æскъуæлхт хузæгæнæг Цæллагти Виктори хузæгæндтитæй. Виктор æррæстæ хумæтæг армдæсни нæй, фал ма æй историк, философ, анзфинсæг. Æ конд хузти æвдист цæунцæ Уæрæсей, Иристони цардвæндæгти цаутæ æма хабæрттæ. Устур сæрустурдзийнади хæццæ си æвдист цæуй, æ цитгин рагфидтæлти байзæдтаг ке æй, е. Уомæ гæсгæ уотæ хъæбæр æлвасунцæ сæхемæ аййевадæуарзгути.

– Аци равдист æй мæ лæвар, Иристонæй ами ка цæруй, еци силгоймæгтæн, – байдзулгæй зæгъуй  Виктор. – Зонун æй, етæ хъæбæр æрхун кæнунцæ Иристонбæл. Æз син нæ хуæнхбæсти гъардзийнадæ æрластон мæ кустити. Мæ зæрдæ дарун, алкедæр си æхе аккаг зæрдæмæдзæугæ хузæгæндтитæбæл ке исæмбæлдзæнæй, уобæл…

Равдиститæмæ беретæ ’рбацудæнцæ æмбурд бийнонтæй æма æмцъухæй загътонцæ, зæгъгæ, аци хузтæ син устур зæрдæхцæуæндзийнадæ ке ’рхастонцæ, беретæн си сæ сабийдогæ сæ зæрдæбæл ке ’рлæуун кодтонцæ, уой.

Хузти сæйрагдæр æвдист цæунцæ хуæнхаг гъæутæ, æрдзи алæмæттаг дессæгтæ, нæ республики сæйраг сахари историон зæрдæбæл бадаруйнаг рауæнтæ. Уæлдай фулдæр æргом æздахуй хузæгæнæг нæ адæмон исфæлдистадæмæ, æгъдæуттæ аййевадон фæрæзнитæй исфæлгонц кæнунмæ.

– Цæллагти Виктори кустити равдиститæ ’нцæ, уалдзæги райдайæни  нæмæ,  фиццаг ци зæрбатуг æртахтæй Иристонæй, уой хузæн, – зæгъуй Мæскуй цæрæг, не ’мзæнхон Сæбанти Козетæ. – Хъæбæр æхцæуæн нин æй аци бон уомæн æ куститæ уинун, нæ хуæнхбæсти думги уоддзæф, дæнтти сæр-сæр. Виктори цæстæй ракæсун бацæй нæ бон нæ райгурæн бæсти дуйнемæ ракæсун. Æ цæстæй ба хъæбæр уинагæ ке æй, е ба ни баруагæс æй.

Уогæ айдагъ не ’мбæстæгти нæ бафтудта деси Цæллаги-фурти исфæлдистадæ, фал ма Мæскуй не ’мзæнхонти æхсæнадæмæ фиццаг хатт ка ’рбафтудæй, етæ дæр устур цæмæдесдзийнади хæццæ базонгæ ’нцæ Иристони гъæздуг культури хæццæ.

Виктор куд загъта, уомæ гæсгæ аци равдист исаразуни ихæс æхемæ райста иристойнаг адвокат Батæрти Сослан.

Зæгъун гъæуй уой дæр, æма аци равдист фиццаг нæй Викторæн. Дæс анзей размæ Цæллаги-фуртæн Мæскуй арæзт æрцудæй æхе сæрмагонд равдист.

Уæрæсей Федераций Совети мартъий ци равдист  арæзт æрцудæй, уоми ба устур хъæппæрес равдистонцæ Еленæ Бадмаева æма Мзокти Олег. Агъаз ба син кодтонцæ сенатортæ Виталий Назаренко æма Мамсурати Таймураз.

Равдисти ци цуппар æма дууинсæй кусти  æвæрд адтæй, уонæн сæ еугуреми фæлгонцгонд æрцудæнцæ Устур Фидибæстон тугъди рæстæг Иристони тугъдонтæ ци устур лæгæхсарæ равдистонцæ, е.

Хузæгæнæги ихæс æй евгъудæй  абони уæнгæ  фæлтæрти ’хсæн бастдзийнадæ дарун, æностæмæ фæхъхъæртун кæнун нæ фидтæлти æгъдæуттæ, нæ царди арфиаг хабæрттæ.

ХЕКЪИЛАТИ Маринæ