Дуйней исконд уотæ ’й, æма си цидæртæ рæстæгмæ исфæлдист разиннунцæ, цидæртæ ба исæносон унцæ. Æма еци æносонтæ дæр кæд еу доги фæййаууон унцæ, уæддæр рæстæгмæ – уа нæ уа, уæддæр бабæй разиннунцæ, уомæн æма, æвæдзи, æнæ уонæй цардарæзт размæ нæ цæуй. Зæгъæн, хор сæумæй изæрмæ зæнхæ дæр æма адæми дæр фæттавуй æ зæрдæхцæуæнхæссæг тунтæй, изæригон ба æрвгæрони фæсте райевгъуйуй. Фал бабæй сæумицъæхæй ба нæуæгæй фæззиннуй хорискæсæни ’рдигæй æма бабæй дуйне исцардгъон кæнуй.

Уæхæн æй, адæмæн уæлдай зæрдтагон ка фæууй, арфиаг ке хуæрзтæй фæууй æма ин цæргæ-цæрæнбæнтти нифсдæттæг ка разиннуй, еци адæймæгути ирисхъæ дæр. Гъо, разиннуй уæхæнттæ дæр, кæцитæ сæ фурсоцъайæй æма фурмæстæй сæ уодæй-уод фæккæнунцæ, еци адæймæгути, уæлдайдæр ба сæ фæсмæрдæ, сæ рохс нæмттæ син цъифкалæнтæй байсæрдунбæл, адæмæн сæ фенадæ кæнунбæл. Фал сæ фудгъавæнтæй неци рауайуй, уæдта уайгæ дæр нæ ракæндзæнæй.

Нæ аци зæгъуйнæгтæ ’нцæ ахсгиаг зæрдæбæлдарæн цауи фæдбæл –
21 декабри фондз æма авдинсæй анзи æнхæст кæнуй нæ паддзахади цитгиндæр разамонæг Иосиф Виссариони фурт Сталини райгурдбæл (1879-1953). Æма нæ дзубанди ци гъудитæй райдæдтан, уони фæдбæл æримисæн еу цау. Куд дзорунцæ, уотемæй Сталин æ хæстæгдæр æмгустгæнгутæй кедæрти хæццæ дзубанди кæнгæй (1943 анзи), уотæ, дан, загъта: «Зонун æй, мæ рамæлæти фæсте мин мæ циртбæл ке калдзæнæнцæ алли илгъаг бугътæ… Фал сæ историй думгæ ескæци бони ба уæддæр æ хæццæ фæххæсдзæнæй…»

Æма æцæгæйдæр уотæ нæ рауадæй? Сталин ку рамардæй, уæд уой фæсте, уæлдайдæр ба рæузунд Никитæ Хрущеви паддзахдзийнади рæстæгути цитæ ба ибæл нæ имистонцæ, цæмæйти ба ’й нæ фудгин кодтонцæ… Æма ци? Куд фæззæгъунцæ, дзæгъæл куй рæйдтæй æма ин æ рæйд думгæ фæххаста.

Сталин ку рамардæй, уæдæй кæд еуæндæс æма æртинсæй анзи рацудæй, уæддæр æй адæм ба нæ иронх кæнунцæ. Е нæ, фал æ фарсхуæцгути бæрцæ фулдæрæй-фулдæр кæнуй.

Нæ газети ахид мухургонд æрцæуй æрмæгутæ Сталини туххæй. Абони дæр ин æ рохс ном имисæн нæ газети 6-7-аг фæрстæбæл мухургонд æрмæгутæй.