Уогæ ба ни абони дæр ма хъæбæр зæрдристæй ка нæ æримисуй, еци æнæхайири коронавируси рæстæгутæ, е нин æ гадзирахатдзийнадæй ци æверхъаудзийнæдтæ бавзарун кодта, уой. Уæлдай зæрдрист си фæцæнцæ, уой азарæй ке хеуæнттæ бастъалдæнцæ, етæ.

Уой хæццæ ба ни ка нæ даруй æ зæрдæбæл, сæхе цардæн дæр тæссаг уогæй – еци емини нихмæ комкоммæ тохи ка бацудæй, адæми си ервæзун кæнунбæл уодуæлдайæй ка архайдта, етæ. Нæ цитгийнаг медицинон косгутæй уæлдай арфиаг ан. Хъонцгæнгæй имисæн, еци тохи бацæугæй, æ цард ка иснивонд кодта, зæрдхъурмæй син зæгъæн: «Рохсаг уотæ… Нæ Исфæлдесæг уин дзенети уодæнцойнæдæр рауæн исаккаг кæнæд…»

Еци фудрæстæги нæ медицинон косгутæ ци лæгдзийнадæ æма æхсарæ бавдистонцæ, уой аккаг зæгъуйнæгтæ зин иссерæн æнцæ. Фал уæддæр гъудæй, нæ адæм си цæйбæрцæбæл æгæрон арфиаг æнцæ, уой бавдесун, исæносон кæнун. Æма еци тухст уавæрти нæ республики уæди Сæргълæууæг Битарти Вячеслави хъæппæресæй хаст æрцудæй унаффæ, коронавируси нихмæ уодуæлдай тохи ка бацудæй, еци медикти кадæн сæрмагондæй монумент исæвæрун. Бунат дæр ин иснисан кодтонцæ, Барбашови æма Леваневскийи гъæунгтæ кæми байеу æнцæ, уоми сувæллæнтти республикон сæйгæдони бакомкоммæ аллейи райдайæни. Монумент ами ке æрбунæттон уодзæнæй, уой туххæй ами 2020 анзи æвæрд æрцудæй нисангæнæн дор дæр.

Æма нур еци арфиаг гъуддаг æнхæстгонд æрцудæй. Хуæрзæрæги, 14 июни Дзæуæгигъæуи цитгин уавæри еци монумент игонгонд æрцудæй. Байгон æй кодтонцæ Цæгат Иристони Сæргълæууæг Сергей Меняйло æма нæ республики Фæллойни Бæгъатæр Биченти Роланд. Зæгъун гъæуй уой, æма Бичени-фуртæн еци кадгин барæ хумæтæги лæвæрд не ‘рцудæй – нæ республики æскъуæлхт дохтир, уомæн  коронавируси пандемий нихмæ тохи тæккæ райдайæни ихæсгонд æрцудæй, еци тæссагæй-тæссагдæр гъуддаги архайунбæл барвæндонæй ка исарази æй, еци косæг къуари разамонæг исун. Æма ‘й æнтæстгинæй исæнхæст кодта е ‘мгустгæнгути хæццæ – дохтиртæ, медицинон хуæртæ, фельдшертæ, студенттæ-медиктæ, тагъд агъази служби шофертæ æма æндæр специалистти уодуæлдай архайди фæрци сæдæгай адæймæгутæ адзалæй ервæзтгонд æрцудæнцæ. Æма уой Сергей Меняйло монумент игон кæнуни фæдбæл мадзали рæстæг æ радзубандий сæрмагондæй баханхæ кодта:

–- Медицинон косгутæн сæ профессион дæснидзийнади, уæдта, æнæмæнгæ, сæхебæл æнауæрдондзийнади фæрци алæмæти берæ арæзт цудæй тухст адæми цард æма æнæнездзийнадæ багъæуай кæнунæн. Арфæ уин кæнун, нези фудæй тухст адæймаги фарсмæ балæуунмæ æма ин фæййагъаз кæнунмæ еудадзугдæр цæттæ ке айтæ, уой туххæй.

Республики Сæргълæууæг сæрмагондæй райарфæ кодта Битарти Вячеславæн е ‘ргъудидзийнади фæдбæл. Монумент игон кæнуни фæдбæл мадзалмæ Битарти Вячеслав кадгин уавæри архайгæй хунд ке ‘рцудæй, е еугуремæн дæр æхцæуæн адтæй. Дзубанди дæр си ракодта æма уотæ загъта:

– Еци æверхъау нез ци æй æма æ нихмæ куд тох кæнгæй, е райдайæни æнхæст бæрæг дæр кæд нæма адтæй, уæддæр нæ медицинон косгутæ уайтæккæдæр устур нифсхастæй архайун байдæдтонцæ, сæйгитæ кæми адтæнцæ æма «сурх зонæ», зæгъгæ, ке худтонцæ, уоми. Уавæр ба уæхæн адтæй, æма фиццаг рæстæги æнхæст нæ фагæ кодта æнæмæнгæ æма æвæстеуатæй ка гъудæй, уæхæн фæрæзнитæ, сауæнгæ хегъæуайгæнæн уæледарæс дæр, уæддæр сæ къохи бафтудæй мингай адæймæгути цирти билæй раздахун, – загъта Битарти Вячеслав. – Еци бæнттæн иронхгæнæн нæййес. Æма мæнæ нур нæ республики хецауади агъазæй уæди хъиамæтгун медикти кадæн монумент æвæрд ке æрцудæй, е хъæбæр ахсгиаг æма арфиаг гъуддæг æй – етæ фæнзуйнаг æма дæнцæн хæссуйнаг æнцæ айдагъ нæ абони фæлтæртæн нæ, фал, федарæй ми æруагæс кæнуй, уодзæнæнцæ нæ исонибони фæлтæртæн дæр. Хуцау зæгъæд æма нæ адæмбæл дæр æма нæ дохтиртæбæл дæр уæхæн тухст бæнттæ куд некæдбал æрцæуа.

Монумент байгон кæнуни фæдбæл цитгин мадзалаи радзубанди кодта Биченти Роланд дæр:

– Фиццагидæр мæ зæрдибунæй райарфæ кæнун фæндуй, аци ахсгиаг гъуддаг ке фæрци арæзт æрцудæй, уонæн. Иннемæй ба уой зæгъуйнаг дæн, æма устур бози аккаг æнцæ, сæхебæл нæ ауæрдгæй, еци æверхъау нези нихмæ комкоммæ тохи ка бацудæй, еци медицинон косгутæ еугурæйдæр. Уони хъазауат æцæг мæлæтдзаг тох адтæй адзалхæссæг емини нихмæ æма си мах уæлахезонæй рацудан…

Нæ республики Хецауади Сæрдари хуæдæййевæг Александр Реутов ба æ радзубандий уотæ загъта:

– Аци монумент æвæрд ке æрцудæй, еци гъуддаги ахедундзийнадæ хъæбæр бæрзонд æй – еуемæй, иссæй ирд æвдесæн уомæн, æма нæ дзиллæ цæйбæрцæбæл боз æма арфиаг æнцæ, тæссагæй-тæссагдæр нези нихмæ уодуæлдай тохи лæгдзийнадæ æма æхсарæ ка бавдиста, уонæй; иннемæй ба, уой фæрци ни еума хатт æруагæс кæнуй, медицинон косæги дæснийадæ æма фæллойнæ æцæг бæгъатæрдзийнадæ ке æй, е. Æма уой ба гъæуама лæдæронцæ, аци дæснийадæ æ царди сæйрагдæр гъуддагæн ка равзурста, етæ дæр, уæдта сæ агъаз ке багъæуа, етæ дæр – кæрæдзей нимайуонцæ æма лæдæронцæ.

Монумент æвæруни мадзали архайгутæ еугурæй дæр зæрдиагæй арфæ кодтонцæ, ке фæрци арæзт æрцудæй, уонæн. Уонæй еу – нæ республики зундгонд скульптор Демети Ибрагим. Æ исаразунбæл е   цалдæр мæйей дæргъи æновудæй фæййархайдта æма ин бантæстæй уой зæрдæмæдзæугæ хузи исфæлдесун.