Дууæ æма цуппаринсæй анзей размæ (1943 анзи 12 январи) Ленингради æма Волхови фронти æфсæдтæ Сурхтурусагин Балтийаг флоти хæццæ æмархайд кæнгæй, батудтонцæ,  немуцаг-фашистион æрбалæборгутæ Ленинградбæл æртеголæ уогæй, 900 бони æма æхсæвей дæргъи æй ци блокадæй фæгъгъезæмарæ кодтонцæ, уой. Еци æверхъаудзийнадæй сахар æнæгъæнæйдæр   сæребарæгонд æрцудæй 27 январи . Аци агъазиау цаути фæдбæл, куд нæ Фидибæсти еугур рауæнти, уотæ Цæгат Иристони дæр арæзт æрцæуй сæрмагонд имисæн мадзæлттæ. Уотæ аци анз дæр.

Уæхæн мадзал æрæги исаразтонцæ Цæгат Иристони Архивон службæ æма паддзахадон бюджетон косæндонæ «РЦИ-Аланий нæуæг историй паддзахадон архив». Аци арфиаг гъуддаг арæзт ке ’рцудæй, уой ахедундзийнадæ агъазиау æй, уомæн æма Ленинград немуцаг-фашистон æрбалæборгутæй багъæуай кæнун æма ’й блокадæй фæййервæзун кæнуни сæрбæлтау тугъдтити архайдтонцæ, æхсарæ æма фæразондзийнадæй си фескъуæлхтæнцæ Иристони тугъдонтæ дæр – æртæ мин адæймагей бæрцæй. Уонæй æхсæзсæдемæй фулдæр, сæ тугъдон ихæстæ æнхæст кæнгæй, сæ цард иснивонд кодтонцæ.

Ци мадзали кой кæнæн, е æцæгæйдæр иссæй дзиллон, уомæн æма си архайдтонцæ цалдæр фæлтæрей минæвæрттæ. Уоми архайунмæ бæргæ байагурдтонцæ Устур Фидибæстон тугъди ветеран, сахар Выборг немуцаг-фашистон æрбалæборгутæй иссæребарæ кæнуни фæдбæл тугъдтити архайæг Пагæти Михаили фурт Александри дæр, фал минкъий еуцæйбæрцæдæр æнæфæразгæ ке адтæй, уомæ гæсгæ æ бон нæ иссæй æрбацæун.

Мадзали рæстæг Дзæуæгигъæуи электроники колледжи студентти хæццæ фембæлдмæ хунд адæймæгути ’хсæн адтæнцæ Дзæуæгигъæуи цæрæг, Ленингради блокадæн ниффæразæг Галинæ Ульяни кизгæ Семенюк, Устур Фидибæстон тугъди ветеран, Уæлахези Паради архайæг Уатати Майрæни кизгæ Людмилæ æма æндæртæ.

Фембæлди архайгутæ базонгæ ’нцæ историон-документалон равдист «Цæгат Иристон», уæдта Ленинград багъæуай кæнуни сæрбæлтау тугъдтити не ’мзæнхонтæй ка фæммард æй, уони номхигъди хæццæ.

Нæ уацхæссæг