Сосранти Жанни туххæй нæ радзубанди райдайун нæ фæндуй æхе зæгъуйнæгтæй – æ цардвæндаги хабæртти, æ дæснийади, æ бæлдитæ æма нисанти фæдбæл гъудитæй.

«ЖУРНАЛИСТИ НОМ ÆЙ ХУÆРЗГÆНÆГ УНÆЙ ИХÆСГИНГÆНÆГ!..»

Адæймагæн æ уарзон дæснийадæн æхе иснивонд кæнун ку бантæса, уæд ма уомæй хуæздæр ци уа!.. Æз абони боз дæн, мæ бæлдæ – журналист исун – исæнхæст кæнунæн мин равгæ ке фæцæй, уомæй. Арфиаг дæн, 1999 анзæй абони уæнгæ нæ республики телеуинунадæн ци сæргълæугутæ адтæй æма ес, уонæй: Токати Эдуард, Таболти Сергей, Диамбекти Алан æма Хъусати Тимурæй. Æз сувæллонæй мæхецæн равзурстон журналисти дæснийадæ. Уой дæр – телеуинунади хæццæ баст куд адтайдæ, уотемæй.

Гъæуккаг сувæллон царди фæззелæнти «сосæгдзийнæдтæ», фиццагидæр æ хестæрти хуæрзауодундзийнади, уони зундамонундзийнади фæрци. Уомæй хъæбæр амондгун рауадæй мæ сабийдогæ. Адтæй мин курухон фиди фидæ Сосранти Солтан. Е мин алкæддæр мæ гъудитæ бæлвурддæр лæдæрун кодта. Е мæ уидта, телевизори рази куд æрбадинæ æма телеуинунади амонæг равдиститæмæ ку кæсидæ, уæд æ хæццæ газети мухургонд программæ гъæрæй куд кастæн, уой. Æма мин еу хатт уотæ зæгъуй:

– Мæ кизгæ, ду мин уодзæнæ журналист!..

Æз еци загъд æнхæст кæд нæ балæдæрдтæн, уæддæр æй багъуди кодтон æма мæ ескæми ку бафæрсиуонцæ, циуавæр дæснийадæ равзарун дæ фæндуй, зæгъгæ, уæд син сæрустурæй зæгъинæ:

– Журналист!

Рæстæг цудæй, æма хестæр кълæсти мæ финст æрмæгутæ мухур кæнун райдæдтон Ирæфи райони газети. Скъола каст ку фæдтæн, уæд бацудтæн мæ уарзондæр, Иристони кадгиндæр, курухондæр хестæртæй еу, историон наукити доктор, академик Мæхæмæтти Ахурбегмæ, Цæгат Иристони Хетæгкати Къостай номбæл паддзахадон университети уæди ректормæ, æма си ракурдтон, цæмæй мин мæ куститæн аргъ искæна æма мин баунаффæ кæна – журналистики факультетмæ бацæуон æви нæ. Е æркастæй мæ куститæмæ, рафæрститæ мæ кодта цæмæйдæрти æма мин аразий дзуапп равардта. Е адтæй 1994 анзи.

Æнзтæ райевгъудæнцæ. Фæстаг къурси ахур кæнгæй æрбацудтæн республикон телеуинунадæмæ. Еци рæстæг мæ зæрди ци ’нкъарæнтæ, ци сагъæстæ æма гъудитæ адтæй, уони раргом кæнуни фагæ дзурдтæ зин иссерæн æнцæ. Информацион хайади хъæбæр рæдау зæрди хецау адæм куста, æма мин æхцæуæн адтæй сæ астæу косун. Сæ хæццæ хæстæгдæр ку базонгæ дæн, уæд мæ кæддæри дузæрдугдзийнадæ фесавдæй. Не ’хсæнади журналисти куст ахсгиаг ке æй, нæ сæйрагдæр хæзна ба ездондзийнадæ ке æй, уой балæдæрдтæн æма разæнгардæй косунмæ бавналдтон.

Финсунбæл мæ ахур кодтонцæ Цæрукъати Таймораз, Гаджити Илья, Таутиати Умар æма Гæдзаути Зойæ. Еу хатт мæ Зойæ æ хæццæ фæххудта Дигори районмæ, мæнæуи мæнæуигуæрдæнтæй æрмæг искæнунмæ. Уæди рæстæгути кустуæттæмæ цудан хуæдтолгæ «Уазик»-бæл. Еци тæвдæ бони будуртæбæл зелун ку райдæдта, уæд истухстæн, фал Зойæмæ ку бакастæн, уæд гъудити ранигъулдтæн: «А циуавæр фæразон силгоймаг æй, уæлдайдæр ба æ кари!..» Ке бафæллад æй, уой æргом дæр нæ кодта нæдæр исфæлдистадон къуарæн, нæдæр ке истан, уонæн. Уæд æй балæдæрдтæн, æцæг журналисти уодигъæдæ ин ке ес, уой. Еци балци мин равардта нæуæг хъауритæ мæ бæлдæ исæнхæст кæнунæн. Мæхецæн устур амондбæл нимадтон, республикон телеуинунади мин косуни барæ ке ес, уой. Берæ хуарз адæмбæл исæмбалдтæн ами.

Ами аййевадон хайадæмæ ба бацудтæн 2000 анзи. Æ сæргъи лæудтæй Айларти Асæхмæт, æма мæхе ахур кодтон æ цæмæдесаг равдиститæбæл. Берозти Тамарæ, Тедети Аринæ, Гиоти Еленæ æма берети искурдиадæн телевизормæ кæсгутæ устур аргъ ке кодтонцæ, е бæрæг адтæй телестудимæ  ке æрбарветиуонцæ, сæ еци арфи финстæгутæй дæр, уæдта телефонæй ке æрбадзориуонцæ, уомæй дæр.

Аци редакций архайгæй, уæлдай фулдæр бауарзтон мæ равзурст дæснийадæ, уæдта телеуинунадæ. Лæмбунæгдæр зонгæ кодтон нæ республики искурдиадæгин адæймæгути хæццæ, тугъди бæгъатæрти, фæллойни ветеранти хæццæ æма син сæ царди хабæрттæбæл дзурдтон мæ равдистити. Берæ хуарз гъуддæгутæбæл исахур дæн хестæртæмæ игъосгæй æма кæсгæй, æма си арфиаг дæн. Уой хæццæ ба мæ уæлдай хъæбæрдæр райарфæ кæнун фæндуй, информацион программæ «Иристон» дигорон æвзагбæл рауадзун ке фæрци æнхæстгонд æрцудæй, уонæн.

Нæ телеуинунадæ XXI æноси нæуæг технологити хæццæ æмдзо кæнуй. Царди размæцуди фæткæ ба уæхæнæй, æма фæлтæрти фæлтæртæ æййевунцæ. Уотæ ‘й мах кусти дæр. Абони нæ исфæлдистадон коллектив æй æригон. Агоруй нæуæг гæнæнтæ æма равгитæ царди домæнтæн æнхæстæй æма тæккæ зæрдæмæдзæугæдæр хузи дзуапп дæттунæн.

Нæ куст æнцон нæй, фал адæмæн гъæугæ ке æй, е ба нæ нифсгун кæнуй, дæттуй нин исфæлдистадон хъауритæ.

***

Сосранти Жаннæ æ дæснийади туххæй дзубанди кæнгæй, кæддæр загъта мæнæ ауæхæн гъуди: «Журналисти ном уотид сæнттадæ кæнунæн нæй, фал æй хуæрзгæнæг унбæл ихæсгингæнæг!.. Æма, баруагæс уи уæд, æ еци загъд кæрæй-кæронмæ дæр бæлвурд æй æ цардæгъдауи – айдагъ æ исфæлдистадон кустæй нæ, фал ма берæ аллихузон æхсæнадон æма хуæрзауодæн гъуддæгутæ æвæллайгæй аразгæй. Уой фæдбæл сæ зæгъуйнæгтæ абони зæгъунцæ, нæ адæми уодварни хæзнатæ, уæлдайдæр ба нæ маддæлон æвзаги сæрбæлтау Жанни хæццæ æмгустгæнæг ка ‘й, етæ дæр.

СÆРУСТУР ÆМА АРФИАГ ДИ АН, ЖАННÆ!..

СКЪОДТАТИ Эльбрус, журнал «Ирæф»-и сæйраг редактор, Цæгат Иристони адæмон финсæг

Нуртæккæ нæ республики телеуинунади равдиститæ дигорон æвзагбæл æнтæстгинæй æма зæрдæмæдзæугæй ка  аразуй, е æй Сосранти Жаннæ – искурдиадæгин журналист, нæ маддæлон æвзаги æма нæ адæми æцæг патриот. Жанни исхонун æнгъезуй «дигорон аййев дзурди борæмæлгъæ». Е ’новуд хъиамæти фæрци ин æнтæсуй цалдæр адæймагей бæрцæ кæнун æ еунæг уодæй. Æ профессионалон дæснийадæй рахезгæй ма, æнхæст кæнуй ахсгиаг æхсæнадон хуæрзауодæн æма рохситауæн куститæ дæр. Æнæгъæнæ  республики дæр ка рахæлеу уй, уæхæн цæмæдесаг мадзæлттæ, изæртæ  æма æмбурдтитæ аразун ин æнтæсуй хъæбæр хуарз. Боллоти Таймораз æма Хъамболти Марати разамундæй алли анз дæр Хæзнидони арæзт æрцæуй Устур Фидибæстон тугъди архайгути имисæн бон, Уæлахези бæрæгбон. Еци ахсгиаг гъуддæгути дæр Сосранти Жаннæ фæууй тæккæ фиццаг рæнгъити.

Искурдиадæгин адæймагмæ берæ лæгигъæдтæ фæууй: Сосранти Жаннæ айдагъ дигоронау нæ аразуй æ равдиститæ, фал хъæбæр хуарз зонуй ирон æма уруссаг æвзæгтæ дæр. Æрæги ин нæ республики хецауадæ аккаг аргъ искодтонцæ – Жаннæ иссæй республики Хецауади премий лауреат, æма ин журнал «Ирæф»-и коллективи номæй зæрдиуагон арфитæ кæнун.

Мах си боз æма арфиаг ан уомæй дæр, æма ци гæнæн æма амал ес, уомæй еудадзугдæр архайуй, цæмæй журнал «Ирæф» дæр æма газет «Дигорæ» дæр дзиллонæй-дзиллондæр кæнонцæ, фулдæрæй-фулдæр адæм сæ рафинсонцæ æма кæсонцæ.

Нивæ æма амондæй хайгин уо, Жаннæ, дæ хъауритæбæл æфтуйгæ цæуæд бонæй-бонмæ, анзæй-анзмæ, дæ нифс макæд расæттæд, нæ хъазар маддæлон æвзаги фарнæй хайгин уо, зæрдрохсæй цæрæ дæ уарзон бийнонти, дæ хъазар адæми хæццæ.

Æ ФÆЛМÆН ДЗУРДÆЙ РОХС КÆНУЙ ДЗИЛЛИТИ ЗÆРДИТÆ

БИЧИЛТИ Алетæ, Уæрæсей журналистти Цæдеси иуонг

Алæмæти рæсугъд берæ æнкъарæнтæ исæвзуруй телеуинунадæмæ кæсæги зæрди, Сосранти Жаннæ экрани ку фæззиннуй, уæд. «Уæ сæумæ хуарз, зонгæ уæ кæнæн нæ республики хабæртти хæццæ», – зæгъгæ, ку райгъусуй, уæд ни алкедæр æ куститæ, сауæнгæ фæстæдæргæнæн кæмæн нæ фæууй, уони дæр фæууадзгæй,  лæмбунæг игъосун райдайæн Жанни фæлмæн, федауцæ бакаст, æ рæсугъд гъæлæсиуагæмæ, æ дæсни литературон æвзагмæ…

Аци дууæ къари ист æрцудæнцæ Сосранти Жанни æновуд архайди фæрци арæзт хуæрзауодæн æма рохситауæн мадзæлтти рæстæг.

Нури рæстæг дзæвгарæ æнæраст, мæнгæттæ, кæронмæ бæрæггонд ка не ‘рцæуй, уæхæн «хабæрттæ» фæххæлеу унцæ информацион итигъдади. Æма е ба не ‘хсæнадæн, уæлдайдæр ба нæ ирæзгæ фæлтæрти уодигъæдæ æма сæри зундæн æгæрон устур зæран хæссуй. Уомæ гæсгæ ба æцæг журналисти ном ка хæссуй, уонæбæл устур ихæс æвæрд ес, цæмæй дзиллитæмæ хъæртонцæ. Æма еци архайд æнтæстгинæй æнхæст кæнун æ къохи æфтуйуй Сосранти Жаннæн. Æ равдистити хуæрзгъæдæдзийнадæ бæрзонд ке фæууй, уомæ гæсгæ уотæ æнгъæлун æнгъезуй, æма, куд æцæг  искурдиадæгин журналист, уотæ эфирмæ рацæуни размæ лæмбунæг исбæрæг кæнуй хабæртти æцæгдзийнадæ, се ‘хсæнадон-уодварнон ахедундзийнадæ. Нæ абониккон цардарæзти  æхсæнадон-политикон, социалон, культурон, нæ республики адæмон хæдзаради алли къабæзти æнтæстдзийнæдтæ æма лухкæнуйнаг фарстатæбæл æ бацæттæгонд рафæлгæст алкæддæр фæууй медесгун… Æ авторон равдистити архайгути хæццæ дзубанди кæнгæй дæр сæмæ ци фарстатæ фæддæттуй, етæ дæр фæуунцæ цæмæдесаг, арф æма бунати. Æма уомæ гæсгæ ба  телеуинунадæмæ кæсæгмæ, æнæмæнгæ, ци гъудитæ æма сагъæстæ фæззиннуй, етæ, кæд æма фæйнæхузон фæуунцæ, уæддæр син, махмæ гæсгæ, фæууй еугæнæг медес – уодæнцойнæхæссæг зæрдиуагæ. Уæлдай ахсгиагдæр ба – Фидибæстæй сæрустурдзийнадæ, рæстуодæй æй уарзондзийнадæ, нæ рагфидтæлтиккон  æгъдæуттæ æма фæткитæ лæмбунæгдæр базонунмæ разæнгарддзийнадæ. Сæрмагондæй ба ма уой зæгъун гъæуй, æма Жаннæ æ сæйрагдæр ихæсбæл нимайуй нæ зæлгæ маддæлон æвзаг багъæуай кæнун, æ исонибон цæмæй зæрдæмæдзæугæдæр уа, уобæл æй æ алли бони сагъæс æма бæлвурд архайд.  Фæндуй æй, цæмæй нæ дзиллæ æмхузонæй сæ равгитæ æма фадуæтти æмбæрцæ агъаз кæнонцæ маддæлон æвзагбæл ци мухури фæрæзнитæ цæуй, уони ирæзтæн, цæмæй æвзаги фарнæ гъомусгиндæр кæна. Уой фæдбæл Жаннæ æхуæдæг æнтæстгинæй пайда кæнуй, æ къохи ци гæнæнтæ ес, уонæй æнхæстæй.  Гъома, цæмæй эфири фулдæр игъуса маддæлон æвзаг.  Маддæлон æвзаги сæрбæлтау æ хъазауат арфиаг ке æй, æцæг журналисти ном кади хæццæ ке хæссуй, е æнæргъудийæй нæ изайуй. Æ æвæллайгæ фæллæнтти туххæй хуарзæнхæгонд æрцæуй аллихузон хуæрзеугутæй. Зундгонд куд æй, уотемæй нæ маддæлон æвзагбæл журналистики æнтæстгинæй ка архайуй, уонæн нур цалдæр анзей дæргъи лæвæрд цæуй нæ республики Хецауади сæрмагонд преми «Мæ уарзон Иристон». Æма аци преми аци анз аккаггонд æрцудæй Сосранти Жаннæн дæр.

Æма  ин уой фæдбæл зæрдиагæй арфæ кæнæн!.. Никки бæрзонддæр исфæлдистадон æнтæстдзийнæдтæ дæ къохи æфтуйæд Жаннæ, дæ размæ æвæрд нисантæмæ федар къахдзæфтæй цо!.. Устур фарнæ æма амондæй хайгин уæнтæ дæ рæсугъд бийнонтæ!

ДÆ ФÆЛЛÆНТТÆ, ЖАННÆ, АРФИАГ ÆНЦÆ ÆМА СÆ ФÆРАЗУНГЪОН УО!..

КОЛИТИ Витали, Уæресей финсгути Цæдеси иуонг

Сосранти Жаннæ… Уотид æ фæууиндæ нæ, фал ин айдагъдæр æ кой ку фегъосай, уæддæр адæймаги зæрдæ цидæр æхцæуæндзийнадæ æ фæлмæн уолæнти æрбатохуй.

Нæ еугуремæн дæр уойбæрцæбæл уарзон æй, æма уой æнхæстæй раргом кæнунæн цийфæнди циргъæвзаг дæр, мæнмæ гæсгæ, фагæ арфи дзурдтæмæ арæхсгæ дæр некæд искæндзæнæй.

Жаннæ æхуæдæг дæр, æвæдзи, лæдæргæ нæ, фал ибæл æ гъудити дæр нæ расагъæс кæнуй, адæмæн цæйбæрцæбæл хеуон æй, уомæн æма кумæдæриддæр бацæуй, уордæмæ æхецæй æ рæстуоди фарнæ æхецæй никки раздæр бакъахдзæф кæнуй.

Ес дæсни дзурдарæхст, фæлтæрдгун журналисттæ, сæ искурдиадæй рохс кæнунцæ телевизормæ кæсгути, фал Жаннæ адæми хæццæ еумæйаг æвзаг куд тагъд райеруй, уотæ ба ефстæгтæн æнтæсуй. Уайтæккидæр æнæзонгæ адæймаги æхебæл уотæ æрæууæндун кæнуй, æма ке хæццæ фæдздзубанди кæнуй, е ин æ зæрди сауæнгæ арфдæр къумти сосæг римæхстæй ке фæддаруй, уони дæр раргом кæнуй.

Жаннæбæл æнзтæ цæйбæрцæ нæма цæуй, дууæ уой бæрци ба ‘й æ фæлтæрддзийнадæ, æ курухондзийнадæ. Ци равдиститæ рахæссуй адæми рæнгъæмæ, уонæбæл алкæддæр мах исæмбæлæн зæрдæхцæуæнæй.

Мадта уой дæр ма зæгъун гъæуй, æма Жаннæ айдагъ æ исфæлдистадæй нæ хæссуй нæ дзиллæн зæрдæхцæуæндзийнадæ, фал ма рауонциуондзийнадæ æвдесуй берæ аллихузон ахедгæ æхсæнадон мадзæлттæ ке аразуй, уомæй дæр. Нур цалдæр анзей дæргъи æ райгурæн Хæзнидони, фæййархайуй Устур Фидибæстон тугъди архайгути номерунæн арæзт цитгин мадзæлтти æма уой туххæй дæр Жаннæ æй устур арфити аккаг. Еци мадзалмæ хунд æрцæунцæ иуазгутæ æма архайгутæ айдагъ Хæзнидони æма Ирæфи райони цæргутæ нæ, фал нæ республики æма Уæрæсей æндæр рауæнтæй дæр. Е ба дзорæг æй, махæн нæ Фидибæстæ еу  ке æй, дехтæгæнæн ин ке нæййес, уæдта нæ бæгъатæр фидтæлтæ сæ тог дзæгъæли хумæтæги ке нæ никкалдтонцæ нæ Райгурæн бæстæ багъæуай кæнуни сæрбæлтау, уобæл.

Аци мадзали рæстæг сæ хъауритæ равдесунцæ нæ исонибони фæлтæр спортивон еристи архайгæй, уæдта ма кæрæдзей хæццæ дæр зонгæ кæнунцæ, сæ бастдзийнадæ федардæр кæнуй.

Бустæги цæмæдесаг ба си рауайуй литературон-аййевадон уадзимистæ дзоруни мадзал. Алли æвзæгтæбæл райгъусунцæ финсгути æмдзæвгитæ тугъдон, сабурдзийнади тематикæбæл. Уæлдай æхцæуæндæр ба си фæууй, нæхе маддæлон æвзагбæл ку фæдздзорунцæ уадзимистæ, уæд е. Фал ма æригон ахурдзаутæ сæхе къохтæй финст æмдзæвгитæ кæсун ку райдайунцæ, уæдта игъосгутæн зæнхæ сæ къæхти буни бæмпæгæй фæлмæндæр фестуй.

Æма етæ еугур дæр æнцæ Жанни уодуæлдай хъиамæтти фæрци. Сосранон æхуæдæг нæ маддæлон æвзаги ирисхъæмæ ци бæрнон цæстингасæй кæсуй, æ идарддæри райрæзтбæл ин куд архайуй, уомæн ба æвдесæн æнцæ æ берæнимæдзон телеравдиститæ. Сæ еу иннемæй цæмæдесагдæр, медесгундæр.

Жаннæ æ исфæлдистадон къуари хæццæ Иристонæй кæци къумæй нæ ракастæй, æ къах кæци къахвæндагбæл нæма нифсарстæй, уæхæн си, æвæдзи, нæбал ес. Куд адæймаг, уотæ Сосранти Джабраили кизгæ Жаннæ æй хуæдæфсармæ, æгъдаубæл хуæст. Мæхуæдæг æй берæ хæттити фæууинун хуæнхбæсти бæрæгбæнтти рæстæг алкæддæр фæууй, уæхæн рауæнмæ нæ фидтæлти фæнзуйнаг æгъдæуттæмæ гæсгæ силгоймаг гъæуама цæхуæн дарæси цæуа, уæхæн фæлусти. Æ сæрбæл æнæмæнгæ фæууй нæхердигон сæрбæттæн. Силгоймаг бæгъæнсарæй махмæ ке некæд цудæй ковæндонæмæ, уой æ зæрдæбæл даргæй, æгъдау кæнуй æцæг дигорон силгоймагæн куд æмбæлуй, уотæ. Фиццаг бакастæй, цума уоми уадессагæй неци ес, фал еумæйаг æгъдæуттæ æма фæткитæ уæхæн листæг гъуддæгутæбæл æнцойнæ кæнунцæ.

Æз Жанни фæсмæрун, уартæ ма студенткæ ку адтæй, уæдæй нурмæ. Мæ цæстæ дардтон æ фиццаг къахдзæфтæй ба абони уæнгæ æ размæцуд куд федардæр кодта, уомæ. Жаннæ нæ адæмæн цæйбæрцæбæл устур хуæрзти бацудæй, уонæн зинтæй ес банимайæн. Уæдта ма еу менеуæг ес аци силгоймагмæ – æй хуæрзæгъдау, хуæдæфсармæ. Некæд неке бадæмдта, цæмæй ин нæ республики хецауади ‘рдигæй хуарзæнхитæ лæвæрд цæуа, некæд неци агоруй æхе цъухæй, кедæртау еске къæбинетти дуæрттæ нæ сæттуй хуæрзеуæгагор, лæбурдтитæ нæ кæнуй. Æхе ниттумугъ кодта æма архайуй. Кæд ин ести хуæрзеуæг исаккаг кæнонцæ, уæд хуарз, кæд нæ, уæддæр æ бон цæйбæрцæбæл æй, уой бæрцæбæл æ байвæрæн хæсдзæнæй еумæйаг гъуддагмæ, нæ адæми уодварнон культурæ бæрзонддæр кæнунмæ. Е дæр æцæг адæймаг æма патриоти менеуæг æй. Æма уæхæн менеугутæ ба Жаннæмæ берæ ес.

Еугæр хуæрзеугути кой искодтон, уæд куд нæ зæгъон, мæнмæ гæсгæ, нæ дзиллæн æгæрон æхцæуæн ка адтæй, еци цауи туххæй. Нуриуæнгæ ин ци хуарздзийнæдтæй арфæгонд æрцудæй, уонæбæл ма æрæги бафтудæй еума – Жаннæн æ æвæллайгæ æнтæстгин кусти туххæй аккаггонд æрцудæй нæ маддæлон æвзагбæл журналистики нæ республики Хецауади преми «Мæ уарзон Иристон». Ку зæгъун, берæ адæмтæ æхцæуæнæй исæмбалдæнцæ еци хабарбæл. Мах дæр, редакций косгутæ, зæрдиагæй ин арфæ кæнæн æ нæуæг æскъуæлхтдзийнади фæдбæл.

Жаннæ!.. Мах дæ алкæддæр нæхеуонбæл нимадтан æма нимайæн. Де ‘нтæст мах æнтæст дæр æй, уомæн æма нæ уодтæ еумæйаг гъуддагбæл гъарæн, нæ цард иснивонд кодтан, цæмæй нæ маддæлон азæлгæ дзурд игъуса æма рæстæги æмæнтъерити ма фесæфа, уомæн.

Æнæнез æма нин дзæбæх уо! Исфæлдистадæй зиндæр куст зæнхи цъарæбæл неци ес, зин рæдæхсæн ибæл æй. Ду ба бал ибæл нерæнги æнæфæккеугæй цæуис æма дæ идарддæр дæр дуйней фарнæ гъеуотæ рауадзæд!