Номдзуд æфсæддон архайæг, Советон Цæдеси Бæгъатæр, артиллерий инæлар-майор Карсанти Дриси фурт Хъазбеги, дæ тугъдон цардвæндаги цаутæй дин тæккæ зæрдæбæлдаруйнаг кæци æй, зæгъгæ, ку бафæрсиуонцæ, уæд алкæддæр æ дзуапп уидæ: «Уæлдай табуйагдæр мин æй Уæлахези Бон!..» Æма е хумæтæги нæй, уомæн æма Устур Фидибæстон тугъди уодуæлдайæй фæхъхъазауат кодта Уæлахези сæрбæлтау. Æма си боз уогæй, сæрустурæй имисæн. Абони нин уомæн уæлдай ахсгиаг рæуагæ ес – Карсанти Дриси фурт Хъазбеги райгурдбæл 8 апърели исæнхæст æй финддæс æма фондзинсæй анзи (1910-1997).

Карсанти Дриси фурт Хъазбег райгурдæй 1910 анзи 8 апърели Елхотти. Ами ибæл райевгъудæнцæ æ сабийбонтæ. 1926 анзи каст фæцæй скъола. Еци æнзти парти уотæ фæдздзурдта: «Бæстæ раййевæн индустриализаций рельситæмæ!» Сæдæгай гъæуккаг лæхъуæнтæ рандæнцæ промышленнон кустуæттæмæ æма арæзтæдтæмæ. Косунмæ рандæй Карсанти Хъазбег дæр.  Куста Беслæни нартихуари комбинати. Дæснийадæ имæ нæ адтæй, кодта аллихузон агъазадон куститæ. Куста дусвæлдæхтæй, сауæнгæ ма имæ грамотæ дæр æрхаудтæй. Фæстæдæр æй рарвистонцæ Гизæлдони гидроэлектростанций арæзтадæмæ.

Уæдмæ æ райгурæн гъæуи цардарæзти берæ зæрдæмæдзæугæ æййивддзийнæдтæ фæззиндтæй, аразун си байдæдтонцæ еумæйаг хæдзарадæ (колхоз), исхудтонцæ ’й «Нæуæг Елхоттæ». Раст еци рæстæг, 1930 анзи,  Хъазбег дæр æрæздахтæй æ фидиуæзæгмæ. Кустагор ку бацудæй колхози сæрдармæ, уæд ибæл е хъæбæр бацийнæ кодта, æ зæрдæмæ фæццудæй фæллойнæмондаг, зæрдæргъæвд æма хуæрзæгъдау лæхъуæн, æма ин бабарæ кодта  будурикустгæнæг бригади сæргъи æрлæуун. Æ кустадон ихæстæ куд æнхæст кодта, уомæй си колхозонтæ дæр æма хæдзаради разамунд дæр арази адтæнцæ… Æхе зæрдæмæ дæр цудæй куст, фал ин уæддæр цидæр ба нæ фагæ кодта – рагæй дæр имæ адтæй сосæг бæлдæ – æфсæддон, сурх командир исун. Æ еци бæлдæ ’й æнцад нæ уагъта, æма адтæй нæ адтæй, уæддæр æ исæнхæст кæнуни фæндæй 1932 анзи ахур кæнунмæ бацудæй Мæскуй Л.Б. Красини номбæл артиллерион училищемæ.

Каст æй фæцæй 1934 анзи фæззæги,  æма ’й рарвистонцæ Ленинградмæ хæстæг сахар Пушкини ка æрбунæттон æй, еци 1-аг артиллерион полкмæ, уоми ба ’й иснисан кодтонцæ батарейтæй еуей взводи командирæй.

Æригон афицер тугъдон ардбахуæрд райста 1939-1940 æнзти зумæги Карели зæнхкъобали уорсфиннæгти нихмæ тугъди. Уæд архайдта, историй Маннергейми номæй ке зонунцæ, еци агъазиау  федар ханхæ батонунбæл тугъдтити. Æдæрсгæ бæгъатæр арæхстгинæй равдиста уоми æхе. Уомæн бæлвурд æвдесæн æй, хуæрзеуæг ин раттуни туххæй е ’фсæддон разамунди бацæттæгонд  гæгъæдий финст: «Старший лейтенант Карсанов за весь период боевых действий в борьбе с белофиннами проявил героизм, мужество и отвагу. Служил примером героизма не только для личного состава артиллерийского полка, но и для стрелковых частей, которых поддерживала его батарея. Командуя батареей большой мощности, под ружейно-пулеметным огнем разведал и разрушил несколько каменно-земляных и железобетонных сооружений, обеспечив тем самым успешное продвижение нашей пехоты…», «разведал и разрушил». Ке зæгъун æй гъæуй, æнцонтæй нæ бафтудæнцæ къохи. Знаги римæхст доттæ æма дзоттæ нæмгути къæр-къæр æма скъотти буни хъæбæр зин иссерæн адтæнцæ, гъудæй уодуæлдай бæгъатæрдзийнадæ, уæдта хъæбæр дæсни артиллерист ун. 1940 анзи 7 апърели ССР Цæдеси Сæйраг Совети Указмæ гæсгæ Карсанти Дриси фурт Хъазбегæн еци тугъди бæгъатæрдзийнадæ æма лæгдзийнадæ равдесуни туххæй лæвæрд æрцудæй Советон Цæдеси Бæгъатæри кадгин ном. Уæди уæнгæ уæхæн ном ирон адæмæй райста айдагъдæр Остати Алексей, Хъазбег адтæй дуккаг.

Карсанти Хъазбег æ рæстæги бацæттæ кодта æ имисуйнæгти киунугæ «Огонь ведут гвардейские минометы». Уагъд æрцудæй ССР Цæдеси гъæуайкæнуйнади Министради æфсæддон рауагъдади 1982 анзи.

Устур Фидибæстон тугъд Карсани-фурти æрæййафта М.В. Фрунзей номбæл Æфсæддон академий ахур кæнгæй. Цæмæй æй фронтмæ рарвистайуонцæ, уой туххæй цалдæр хатти курдиадæ балæвардта æ уæлдæр æфсæддон разамундмæ, æма етæ дæр æрæгиау исарази ’нцæ æ хæццæ. Гъе уотемæй балæудтæй Мæску гъæуайгæнгути фарсмæ, иснисан æй кодтонцæ уæди рæстæги тæккæ цæмæдесагдæр артиллерион тохæнгарз «Катюша»-ти гвардион дивизиони командирæй.

Номдзуд  «Катюша»-ти туххæй минкъий финст не ’рцудæй мухури фæрæзнити, рацудæнцæ хецæн киунугутæ дæр. Фал си цæмæдæр гæсгæ, куд гъæуй, уотæ ахид ба сæрмагондæй нæ фæууй Карсани-фурти кой. Е раст ке нæй, уомæн æрхæссун æнгъезуй берæ дæнцитæ. Зæгъæн, аци номдзуд тохæндзаумау исаразунбæл дууинсæй анзи ку исæнхæст æй (1981 анзи), уæд нæ бæсти сæйрагдæр æфсæддон газет «Красная звезда» аци ахсгиаг цауи туххæй радзорунæн сæрмагондæй байагурдта Карсанти Хъазбеги. Æ дзубанди ин ниффинста зундгонд æфсæддон журналист. Уотемæй уæд мухургонд æрцудæй аци газети. Æма си мах дæр абони пайда кæнæн, махмæ гæсгæ, Карсани-фуртæн æхе зæгъуйнæгтæ рæстмæдæр уодзæнæнцæ.

– Куддæр тугъд райдæдта, уотæ нин нæ къурс еугурæй дæр Мæскумæ рарвистонцæ. Ами мæ рарвистонцæ 1-аг гвардион минометæйæхсæг полкмæ штаби сæргълæууæги хуæдæййевæгæй. Æргом ку зæгъон, уæд мæ еци кусти бунат  бустæги хъæбæр нæ цудæй мæ зæрдæмæ, – зæгъуй Карсани-фурт. – Æз комкоммæ тугъдон гъуддæгути архайун ахур адтæн æма мин штаби мæ куст бустæги зæрдæмæдзæугæ нæ адтæй.

Уогæ уой дæр зæгъун гъæуй, æма уæди уæнгæ реактивон тохæнгæрзтæ мæ зæрдæмæ уоййасæбæл нæ цудæнцæ. Æнæхæтæл дзармадзантæ ци хузи æма куд гъæуама æхсонцæ, уой æнхæст нæ лæдæрдтæн. Фал куд æхсунцæ, уой фиццаг хатт ку фæууидтон, уæдта мæ гъуди цæхгæрæййивд ракодтон. Баруагæс ми æй, нæуæг тохæндзаумауæн ци исонибон ес идарддæри архайди, уой устур нисанеуæг.

Уæцхæссæг æ финст æрмæги куд баханхæ кодта, уотемæй Карсани-фурти хæццæ сæ дзубанди цудæй Ф.Э. Дзержинскийи номбæл академий музейи. Инæлар еу усмæ нигъгъос æй, æ рази ци къохфинститæ адтæй, уонæмæ нимдзаст æй. Уæдта бабæй æ зæгъуйнæгти кой идарддæр кодта:

– Зæгъун мæ фæндуй, советон адæм фуруарзонæй «Катюша» ке худтонцæ, гитлеронтæ ба «зиндони машинæ» кенæ «æрра батарейæ», уой туххæй. Еци мæлæтхæссæг тохæндзаумау Советон Цæдеси фæззиндтæй Фидибæстон тугъди хуæдразмæ, цæмæй æй уадзун райдæдтайуонцæ, уой туххæй партий Центрон Комитети Политбюро æма ССР Цæдеси Адæмон Комиссарти Совет сæрмагонд Унаффæ рахастонцæ 1941 анзи 21 июни.

– Циуавæр адтæй уогæ еци тохæндзаумау?

– БМ-13,  æвæрд цудæй ЗИС-5, зæгъгæ, хуæдтолгæбæл. Ефтигъд уидæ, æ калибр 132 миллиметри кæмæн адтæй, уæхæн æхсæрдæс æхсæн ракетитæй. Ракети уæзæ – цуппар æма дууинсæй кили – тахтæй 8500 метрей уæнгæ. Æ фехсунбæл кустонцæ авд æфсæддони, цуппар-дæс минутти сæ гъудæй айдагъдæр, цæмæй «Катюша» нæуæгæй цæттæ адтайдæ знаги дæрæн кæнунмæ. Хуæдтолги къæбинæй æй аразтонцæ, кумæ гъудæй æхсун, уордæмæ. Сахатмæ ин æнтæстæй дæс хатти фехсун.

Капитан И. Флеров разамунд кæмæн лæвардта, еци æфсæддон хай сахар Орши алфамбулай тугъдтити рæстæг фиццаг хатт куд испайда кодта еци тохæндзаумауæй, уой туххæй берæ финст æрцудæй, æма еугур еци æвдесæнтæй мæ фæндуй æрхæссун мæнæ ауæхæн æвдесæн: «Еци æхстити фæсте, игъосун кодта Советон Цæдеси Маршæл С. Тимошенко Уæлдæр командæкæнуйнади Ставкæмæ, знагæн уойбæрцæбæл зæрандзийнадæ хаст æрцудæй æма  бони дæргъи сæ мард æма цæф æфсæддонти ластонцæ, æнæгъæнæ суткæ сæхе æрлæдæрунгъон нæбал адтæнцæ…»

– Еци тохæндзаумау «Катюша» цæмæ гæсгæ исхудтонцæ?

– Е дин фарста, – медбилти  бахудтæй Хъазбег Дриси фурт. Æцæгæйдæр цæмæн? Еци рæстæг хъæбæр зундгонд адтæй зар «Катюша». Фал мæ дзуапп æнхæстдæр уодзæнæй, уотæ ку зæгъон: аци тохæндзаумаубæл æвæрд адтæй нисан «К», Воронежи Коминтерни номбæл заводи уагъд ке цудæй, уомæ гæсгæ.

– Æндæр заводтæ дæр ма уагътонцæ «Катюша»-тæ?

– Мæскуй завод «Компрессор», Ленингради К. Маркси номбæл завод. 1942 анзи уæнгæ не ’фсади адтæй мин уæхæн тохæндзаумауемæй фулдæр.

– Фиццаг гвардион минометæйæхсæг полк ба куд арæзт æрцудæй?

– Æмбурдгонд æрцудæй хъæбæр цубур рæстæгмæ. Дивизион куддæр банхæст уидæ адæм æма тохæндзаумауæй, уотæ æрвист æрцæуидæ тугъдмæ. Полкки командир майор В. Шмаковæн балигъстæ кодтон, цæмæй мæ дивизиони командирæй иснисан кæна, баууæндун æй кодтон, уотемæй нæ еумæйаг гъуддагæн пайдадæр уодзæнæй, штаби афицери бунати бадунæй.

– Дæ дивизион знаги фиццаг цæф кæми никкодта?

– Инæлар А. Городнянский разамунд кæмæн лæвардта, еци 13-аг æфсади исконди уогæй. Е адтæй гъæу Колоднайи рази. Фиццаг æнæуой дзармадзантæй фехститæ кодтан, уой фæсте ба, «Катюша»-ти ци дууадæс установки нæмæ адтæй, уонæй знаги еу цæф никкодтан. Еци усми уомæн – æ рæнгъонтæн дæр æма æ афицертæн дæр – сæ сæртæ разилдæнцæ, исæрра ’нцæ. Арти пеллон… Исрæмугъдтитæ… Зиндонæ…

Уой фæсте ба нæ багъудæй фæстæмæ рацæун. Еци ихæс исæнхæст кæнун æ къохи бафтудæй хестæр лейтенант Г. Фрингæн. Цалинмæ мах нæ комиссар Н. Ковалеви хæццæ нæуæг бардзурдтæмæ æнгъæлмæ кастан, уæдмæ ин бантæстæй нæ дивизион немуцаг-фашистон танкитæй тæссаг уавæрæй райеуварс кæнун.

Карсани-фурти радзубандимæ ма æнгъезуй уой бафтаун, æма айдагъ уæд знагæй фæгъгъудæй сæдæгай рæнгъонтæ æма афицертæ, аст танки æма инсæй хуæдтолги. 1941 анзи 13 ноябри Карсани-фурти дивизиони «Катюша»-ти æмæхстæй Скриманови алфамбулай бантæстæй нæ фестæгæфсæддонтæн сæ размæцудæн фæндон над байгон кæнун. Еци æмæхстæй фегуппæг æнцæ фашистти фæндитæ – етæ гъавтонцæ Скриманови ’рдигæй Волоколамски сосе надмæ байервæзунмæ.

Мæскуй бунмæ тугъдтити Карсани-фурти тугъдонтæ куд æхсаргинæй фескъуæлхтæнцæ, уой туххæй 16-аг æфсади артиллерийæн командæгæнæг инæлар В.И. Казаков уотæ финста: «Дивизион, которым командовал Карсанов, благодаря личным качествам и высокой боевой выучке наносил сокрушительные удары по врагу. От огневого воздействия дивизиона пехота противника буквально обезумела, оставшиеся в живых бежали куда глаза глядят… Под Скримановым во время обстрела немецкие солдаты бежали в сторону расположения наших войск»…

Уой фæсте дивизион Истрайи фалдзости дууæ суткей дæргъи федар лæудтæй знаги мотомеханизацигонд хæйтти атакити нихмæ, сæ над син æрæхгæнгæй. Агъазиау лæгдзийнадæ æма æхсардзийнадæ ке бавдиста, уой туххæй Карсани-фурт хуарзæнхæгонд æрцудæй Сурх Турусай орденæй.

*  *  *

Нæ идарддæри дзубандий бабæй æримисæн, Карсани-фурт журналисти хæццæ фембæлди рæстæг уæди хабæртти фæдбæл ци загъта, уой. Уæд  ракодта мæнæ ауæхæн ахсгиаг цауи кой:

– Паддзахадон Гъæуайкæнуйнади комитет 1941 анзи 8 сентябри унаффæ рахаста гвардион-минометон хæйттæн, командæгæнæгæй иснисан кодтонцæ инæлар В. Аборенкови. Уой фæсте минометон æхсæг æфсæддон хæйтти нимæдзæ цæхгæр ирæзун райдæдта. 1941 анзи декабри уæнгæ немуцаг-фашистон æрбалæборгути дæрæн кодтонцæ уæхæн аст полкки æма дууæ æма дууинсæй хецæн дивизиони.

– Зундгонд куд æй, уотемæй уе ’фсæддон хæйттæ уæлдай æхсаргинæй сæхе равдистонцæ Мæскуй бунмæ тугъдтити.

– Адтæй уотæ дæр. Константин  Рокоссовский ци 16-аг æфсадæн командæ кодта, уой рæнгъити уогæй, уæлдай хъæбæрдæр мæ зæрдæбæл бадардтон гъæу Скирманови рæбун карзæй-карздæр  тугъдтитæ. Е адтæй Мæскуйæй цуппаринсæй километри идарддæр. Еуæй-еу хатт багъæуидæ, знаги танкитæй нæмæ ка  ’рбахæстæг уидæ, уони комкоммæ æхсуни сæр дæр. 13 январи ба не ’фсæддонтæ гъæу байахæстонцæ, фал знаг уæддæр нæ нихмæ æрæвардта дзæвгарæ тухтæ. Нæ дивизионæн цæугæ рауадæй гъæу Данькови размæ. Ами дæр нæ багъудæй дзæвгарæ «бакосун»…

Мæскуй бунмæ гитлеронтæ дæрæнгонд ку ’рцудæнцæ, уæд мин ихæсгонд æрцудæй 23-аг гвардион минометон полк æрæмбурд кæнун æма архайдтон Цæгат-Нигулæн фронти. Уой фæсте тох кодтон Сталингради фронти, Дони рæбунти, разамунд лæвардтон æфсæддон къуарæн. Уоми ба уидæ аст-дæс минометон полкки. Уой фæсте еци æфсæддонти къуар равардтон Ростови бунмæ æндæр командири къохтæмæ, мæхуæдæг бабæй Мæскуй æмбурд кæнун райдæдтон 7-аг гвардион-минометон дивизи.

– Е ба кæмити тох кодта?

– Даргъ æма зин нæдтæбæл нæ багъудæй рацæун. Смоленск, Минск, Витебск, Каунас, Кенигсберг – æртæ мин километремæй фулдæр рауадæй æ хъазауатон нæдти дæргъæ нæ Сурхтурусагин, Кутузови, Суворови 2-аг къæпхæнти ордентæхæссæг гвардион-минометон дивизийæн, уæхæн кадгин ном нин аккаггонд æрцудæй 1945 анзи. Нæ дивизимæ ци бригадитæ хаудтæй, уони ба худтонцæ Кенигсбергаг,  Сурхтурусагин…

Карсанти Хъазбег уоййасæбæл æхцул адтæй æ райгурæн гъæубæстæбæл, æма ин куддæр равгæ фæууидæ, уотæ ‘й æнæмæнгæ бабæрæг кæнидæ, архайдта сæ еугур гъуддæгути дæр. Æма ин ами дæр устур кадæ кодтонцæ. Аци къарти уинетæ, æ номбæл скъолай æма гъæуи Намуси Аллейи ин ци бюст, æвæрд ес, уони.

Карсани-фурт  æ тугъдонти хæццæ ци тугъдтити архайдта, уонæми сæхе уоййасæбæл æхсаргинæй равдистонцæ, æма е алкедæр хецæнæй æримисуни аккаг æй. Фал нин нуртæккæ уæхæн фадуат ке нæййес, уомæ гæсгæ си уæддæр кæцидæрти кой ракæндзинан. Зæгъæн, фескъуæлхтæнцæ Новгороди облæсти поселок Демьянскбæл агъазиау тугъди. Уой туххæй Карсани-фуртæн тугъдон  Сурх Турусай орден лæвæрд æрцудæй – æ фиццаг уæхæн хуæрзеуæг; Сталингради тугъди, æстуд немуцаг инæлар Манштейн разамунд кæмæн лæвардта, знаги еци æфсæддон къуари нимпурст Котельничнийи райони фегуппæг кæнуни, сахар Ростов знагæй исуæгъдæ кæнунбæл тугъдтити.

… Уæдмæ Карсанти Хъазбегмæ фæдздзурдтонцæ Мæскумæ, уæлдай ахсгиагдæр ихæс ин бабарæ кæнуни туххæй. Уоми ин равардтонцæ цин инæлар-майор æма ин байхæс кодтонцæ, æртæ минометон бригади кæми уодзæнæй, еци æвдæймаг гвардион минометон дивизи исаразун. Аци дивизи инæлар-майор Карсани-фурти разамундæй 1943 анзи июни бацудæй знаги нихмæ тохи æма тугъди кæронмæ æнтæстгинæй фæццудæй æ намуси нæдтæбæл. Æ дæрæнгæнæг содзгæ нæмгутæ немуцаг-фашистон æрбалæборгути сæртæбæл ехуарæгау калдæнцæ Спас-Демески æма Ельняйи алфамбулай, фæстæдæр ба Смоленщини будурти, Белоруссий, Прибалтики æма Искæсæн Пруссий зæнхитæбæл тугъдтити, æнæбауорамгæ бампурстæй байста сахар-федар Кенигсберг. Дивизи тохгæнгæй рацудæй 3,5 мин километремæй фулдæр, къуар хатти æй исхуарзæнхгин кодтонцæ ордентæй, æ командирæн ба лæвæрд æрцудæй Кутузови дуккаг къæпхæни ордени, Суворови дуккаг къæпхæни орден, тугъдон Сурх Турусай æртиккаг орден æма Сурх Турусай орден. Нæкæси, Советон Æфсади инæлартæй, Кутузови дууæ ордени кæмæ адтæй, уæхæнттæ берæ нæ адтæй.

Устур Фидибæстон тугъди рæстæг Карсанти Хъазбеги æскъуæлхтдзийнæдтæ цæйбæрцæбæл алæмæттаг адтæнцæ æма син цæйбæрцæбæл бæрзонд аргъгонд цудæй, уомæн æвдесæн æй е дæр, æма 1945 анзи 24 июни Мæскуй Уæлахези Парад арæзт ку ’рцудæй, уæд уоми архайунмæ е дæр хунд æрцудæй нæ бæсти номдзуддæр балхонти хæццæ – рацудæй си Прибалтики 1-аг фронти артиллеристти еугонд батальони сæргъи.

Карсани-фурт М.В. Фрунзей номбæл Æфсæддон академий кæронмæ каст фæууни фæсте командæ кодта аллихузон артиллеристон еугæндтæн, куста Æфсæддон академий, куста ма си, 1980 анзи отставки ку рацудæй, уой фæсте дæр. Æ гъæздуг фæлтæрддзийнадæй æма арф зонундзийнæдтæй хайгин кодта уоми ахурдзаути æма сæ ахургæнгути дæр. Агъазиау адтæй афицерти кадрти цæттæ кæнуни, академий нæуæг æфсæддон-техникон надмæ ракæнуни, сæрмагонд лаборатори исефтонг кæнуни æма академийæн фæсахури ахургæнæн фæзæ исаразуни гъуддæгути æ архайди ахедундзийнадæ. Уомæн æвдесæн – æ тугъдон хуæрзеугутæбæл ма бафтудæй æндæр бæрзонд хуæрзеугутæ: Фæллойнадон Сурх Турусай орден, 1995 анзи нæ Цитгин Уæлахези 50-анзей кадæн Маршæл Георгий Жукови номбæл ке иснисан кодтонцæ, еци орден. Зæгъун гъæуй уой, æма æ еци хуæрзеуæги номер адтæй фæндзæймаг, гъома, не ’мзæнхон нимад æрцудæй нæ бæсти номдзуддæр æфсæддон архайгути фиццæгти хæццæ.  Æ рæстæги ма ин лæвæрд æрцудæй сахар Дзæуæгигъæуи кадгин гражданини ном, исаккаг ин кодтонцæ Иристони тæккæ цитгиндæр хуæрзеуæг – майдан «Иристони намусæн».

…Советон Цæдеси Бæгъатæр, артиллерий инæлар-майор Карсанти Дриси фурт Хъазбег æ уæлзæнхон цардæй рахецæн æй 1997 анзи 27 мартъий. Æфсæддон кадæ æма ради хæццæ ’й байвардтонцæ Мæскуй Ново-Кунцевой (Троекурово) уæлмæрдти, æ цардæмбал Галинæ Темболати кизги фарсмæ… Бæгъатæртæ æностæмæ цæруйнаг исунцæ сауæнгæ сæ фæсмæрдæ дæр, зæгъгæ, ку фæззæгъунцæ, уæд е берæ цæмæйдæрти раст æй. Уотæ зæгъун æнгъезуй Карсанти Хъазбеги туххæй дæр. Абони дæр не ’хсæн æй уомæй, æма æ ном хæссунцæ Мæскуй 494-аг æма æ райгурæн гъæу Елхотти астæуккаг скъола, Алагири æма Елхотти гъæунгтæ. Цалдæр анзей размæ ба Елхотти бæрæгастæу Намуси Аллейи æвæрд æрцудæй æ бюст. Æ номерæнæн финст цæунцæ æмдзæвгитæ, зартæ…

ХЕКЪИЛАТИ Маринæ