Цӕгат Иристони Хецауади Сӕрдари ихӕстӕ рӕстӕгмӕ ӕнхӕстгӕнӕг Тускъати Таймораз республики цардарӕзти еумӕйаг берӕвӕрсуг фарстатӕбӕл архайгӕй, ӕнӕмӕнгӕ иссеруй рӕстӕг, хецӕн адӕймӕгути хӕццӕ хецӕнӕй фембӕлунӕн, ци фарстати фӕдбӕл ӕййафунцӕ тухстдзийнӕдтӕ, уонӕмӕ ӕркӕсунӕн ӕма син бӕлвурд дзуапп раттунӕн.

Ӕрӕги ин уӕхӕн фембӕлд адӕтй Дзӕуӕгигъӕуи цӕргутӕй къуарей хӕццӕ. Архайдтонцӕ ма си Дзӕуӕгигъӕуи бунӕттон хеунаффӕйади администраций сӕргълӕууӕг Милдзихти Вячеслав, уӕдта сахари аллихузон службити разамонгутӕ.

Хъесати Астани гъӕунги 21-аг хӕдзари цӕрӕг фегъосун кодта сӕ тургъи цӕргути курдиадӕ. Гъуддаг уой медӕги ӕй, ӕма ӕрӕги хӕдзарӕмӕ бауагътонцӕ нӕуӕг донуадзӕн хӕтӕлтӕ. Фал абони уӕнгӕ тургъӕ ӕмтъери ‘й, ӕ фӕзуатмӕ ин нӕуӕгӕй базелун гъӕуй. Тургъӕ ӕма ӕ алфамбулай хӕдзӕртти цӕрӕг адӕм корунцӕ, цӕмӕй цалцӕггонд ӕрцӕуа ӕ астӕугъӕунгӕ дӕр. Уомӕй уӕлдай, сӕ дзубандимӕ гӕсгӕ, барӕвдзитӕ кӕнун гъӕуй спортивон фӕзӕ дӕр.

Хъесай-фурти гъӕунги цӕргути курдиадӕмӕ ӕркӕсгӕй, сахари администраций бӕрнон косгутӕ зӕрдӕ байвардтонцӕ, анзи кӕронмӕ амунд фарстатӕ ралух кӕнунбӕл ке байархайдзӕнӕнцӕ, уомӕй.

Раздӕри пълантӕмӕ гӕсгӕ, еци хӕдзӕртти астӕугъӕунгӕ цалцӕггонд гъӕуама ӕрцудайдӕ 2022 анзи. Фал бунӕттон цӕргути курдиадӕ хинцгӕй, еци куститӕ раййивтонцӕ аци анзмӕ. Спортивон фӕзӕ дӕр дууӕ мӕйей ӕмгъудмӕ цалцӕггонд ӕрцӕудзӕнӕй. Еци унаффитӕ хуарзбӕл банимайгӕй, Тускъай-фурт куд фӕннисан кодта, уотемӕй комкоммӕ ӕ цӕстӕ дардзӕнӕй, Хъесай-фурти гъӕунги цӕргути курдиадитӕ куд ӕнхӕстгонд цӕунцӕ, уомӕ.

Фембӕлдмӕ ка ‘рбацудӕй, уонӕй еу – Черкасти Заремӕ. Силгоймаги загъдмӕ гӕсгӕ, ӕ фурт аци анз хъӕбӕр хуарз бӕрӕггӕнӕнти хӕццӕ каст фӕцӕй астӕуккаг скъола, ӕвзонг лӕхъуӕн «сугъзӕрийнӕ» майдан райста Цӕгат Иристони Сӕргълӕууӕги ихӕстӕ рӕстӕгмӕ ӕнхӕстгӕнӕг Сергей Меняйлой къохӕй. Нур биццеу идарддӕр ахуркӕнуйнаг ӕй Уӕрӕсей Федераций Президенти рази Адӕмон хӕдзарадӕ ӕма паддзахадон служби Академий. Мадӕ ӕ сувӕллони гъомбӕл кӕнуй еунӕгӕй, бийнонти фӕрӕзнитӕ фагӕ нӕ ‘нцӕ лӕхъуӕни ӕндӕр сахармӕ ахурмӕ рарветунӕн. Уомӕ гӕсгӕ силгоймаг ракурдта, цӕмӕй син ӕхцайӕй фӕййагъаз кӕнонцӕ.

Тускъати Таймораз зӕрдӕ байвардтӕ биццеуӕн ӕмдзӕрӕни бунат радех кӕнуни фӕдбӕл академий разамунди номбӕл финстӕг рарветунӕй. Бийнонтӕн ӕхцайӕй фӕййагъаз кӕнуни фарстамӕ дӕр каст ӕрцӕудзӕнӕй.

Уотӕ, еугур фарстати – ӕхсӕнадон транспорти куст, гъӕунгти фӕлгонцадӕ, фӕндаггон змӕлди ӕдасдзийнадӕ ӕма иннети фӕдбӕл дӕр хаст ӕрцудӕй ахедгӕ унаффитӕ. Алли курдиадӕ исӕнхӕст кӕнунӕн дӕр ӕвӕрд ӕрцудӕй бӕлвурд ӕмгъудтӕ.