Хуæрзæрæги, 29 октябри авд æма фондзинсæй анзи исæнхæст æй Ленинон фæскомцæдеси исарæзтбæл.

Æма еци цауи фæдбæл абони мухур кæнæн цалдæр æрмæги. Ка ’й зонуй, кадæртæ уотæ дæр зæгъдзæнæнцæ, гъома, фæсбæрæгбон ба ма цæмæн гъæуй сæ кой. Е раст гъуди нæй, уомæн æма фæсевæди гъомбæлади фарстатæ еубониккон нæ ’нцæ.

Æма аци æрмæгутæ дæр уомæ гæсгæ мухур кæнæн, цæмæй нуриккон ирæзгæ фæлтæртæ зононцæ, сæ фидтæлтæ, æригæнттæ уогæй, цæйбæрцæбæл æновуд адтæнцæ нæ Фидибæстæбæл, цæйбæрцæбæл бæрзонд цæстиварди сæмæ адтæй æма куд хъазауатонæй архайдтонцæ æ кадæ æма æ намуси бæрзонддзийнадæбæл. Зононцæ æма сæ фæнзонцæ уоди кæдзосдзийнадæй, сæ царди федауцæ нисантæй.

Етæ нæ исонибон æнцæ, æма нин гъæуама абони нæ сагъæсти сагъæссагдæр уа, циуавæр зундирахастбæл хуæст æнцæ, циуавæр æнцæ сæ нисантæ æма бæлдитæ.

Еума хатт ма ’й зæгъæн, нæ абониккон кизгуттæ æма лæхъуæнтæй сæ фулдæри-фулдæр æвдесунцæ сæрæндзийнадæ, се ’скъуæлхтдзийнæдтæй цитгин кæнунцæ нæ Иристон. Уомæн берæ ирд æвдесæнтæ ес, уони кой дæр фæккæнæн æма идарддæр кæндзинан нæ газети фæрстæбæл.