Æзинæ, 22 августи бæрæггонд æрцудæй нæ Фидибæсти кадгиндæр бæрæгбæнттæй еу – Уæрæсей Федераций Паддзахадон турусай Бон. Уой фæдбæл нæ республики цæрæг еугур адæмихæттити минæвæрттæн дæр зæрдиагæй райарфæ кодта Цæгат Иристони Сæргълæууæг Сергей Меняйло. Нæкæси, æхецæн дæр аци бæрæгбон уæлдай æхцæуæн æй – 22 августи æй æ райгурæн бон. Никки цийнаг ба ин аци анз æй – исæнхæст ибæл æй фондз æма æртинсæй анзи. Зæрдиагæй ин арфæ кæнæн, æнæнез, царди еугур хуарздзийнæдтæй дæр хайгин куд уа.

Уæрæсей паддзахадон турусай Бони фæдбæл æ арфи нистауæни Сергей Меняйло уотæ баханхæ кодта:

– Нæ бæсти аци ахсгиаг символæн ес агъазиау ахедундзийнадæ, е æвдесæн æй нæ намусгин историй æнæферонхгæнгæ цаутæн, нæ берæ национ паддзахади уодварни сæйрагдæр хæзнатæн, туруса устур кадæ кæнуй нæ евгъудæн æма нæ нифсгунæй кæсун кæнуй нæ рохс исонибонмæ.

Уорс-цъæх-сурх туруса Уæрæсей герб æма гимни хæццæ ирд æвдесæн æй нæ федар еудзийнадæн, игурун нæмæ кæнуй дуйней устурдæр æма тухгиндæр паддзахæдтæй сæ еуей цæргутæ ке ан, уой фæдбæл сæрустурдзийнади æнкъарæнтæ. Мах, уæрæсейæгти, æнгом бæттуй еу историон хъисмæт, еудадзуг турнундзийнадæ нæ еумæйаг хæдзарæ рæсугъддæр, федардæр, гъæздугдæр æма æдасдæр кæнунмæ. Уомæн æвдесæн ба æнцæ нæ бæгъатæр æфсæддонтæ, етæ нæ паддзахадон турусай бунмæ усхъæй-усхъæмæ федар лæуунцæ цифуддæр  знаги нихмæ тохи.

Хъазар æмбæлттæ! Федарæй ми æруагæс кæнуй, идарддæр дæр зæрдиагæй ке архайдзинан, цæмæй нæ Фидибæсти гъуддæгутæ цæуонцæ бонæй-бонмæ, анзæй-анзмæ хуæздæрæй-хуæздæргæнгæ, хъазауатон куст кæндзинан нæ Фидибæсти кади æма нæ адæми амонди сæрбæлтау, кæрæдзей хуарздзийнадæмæ цæстуарзонæй бæлдзинан.

***

Уæрæсей Паддзахадон турусай Бони фæдбæл Цæгат Иристони дзиллæн зæрдиагæй райарфæ кодта нæ республики Парламенти Сæрдар Тускъати Таймораз дæр:

– Аци бæрæгбон æй нæ берæнацион адæми федар бастдзийнади, нæ бæсти хуæдбарæдзийнадæ, сæребарæдзийнадæ æма бæрзонд кади æвдесæн.

Уæрæсейаг æртæхузон туруса фæууингæй, адæймаги зæрди райгурунцæ рæсугъд æнкъарæнтæ, сæрустурдзийнадæ, фæззиннуй имæ нæуæг хъауритæ. Нæ паддзахадон туруса æй нæ цæргути патриотизми, уодварни, берæвæрсуг искурдиæдти, профессион дæснидзийнади сæйраг нисанеуæг. Турусайæн кадæ кæнгæй, куд гъæуама не ‘римæсæн нæ раздæри фæлтæрти таурæхъти дзоруйнаг тугъдон æма фæллойнадон æскъуæлхтдзийнæдтæ… Куд раздæр, уотæ нур дæр уæрæсейæгтæ кæнунцæ хъазауатон фæллойнæ, архайунцæ Райгурæн бæсти технологон æма хуæлци æдасдзийнадæ бæрзонддæр къæпхæнмæ исесунбæл. Еци-еу рæстæг нæ бæгъатæр æфсæддонтæ айнæг къæдзæхи хузæн æнæфæккеугæй лæуунцæ, мах басæттунмæ сæ бицъинæг ка ‘скъунуй, еци лæборгути нихмæ. Не ‘фсæддонти æхсарæ, уоди гъомус æма лæгдзийнадæн нæййес æмбал! Махæй алкæмæн дæр æ ихæс æй Райгурæн бæсти хуарздзийнадæбæл архайун, фулдæр кæнун æ культурон æма историон бунтæ, уарзун æй зæрдæй, патриотизм æма бийнонти уодварни традицион хæзнатæбæл гъомбæл кæнун нæ фæсевæди.