Уотæ дзурдтонцæ нæ фидтæлтæ, æма сæ еци загъд цæйбæрцæбæл раст æй, е ба ирдæй-ирддæрæй рабæрæг уй багъæуаги лæгдзийнадæ бавдесуни рæстæг ку ралæууй, уæд. Еци фæткæ нæ адæмæн недзамантæй ардæмæ табуйаг адтæй фæлтæрæй-фæлтæрмæ. Уотæ ’й абони дæр – нæ фæсевæд сæхе æхсаргинæй æвдесунцæ сæрмагонд æфсæддон операций архайгæй. Æма сæ Фидибæстæ дæр арфиагæй цитгин кæнуй.

Нæ бæсти разамонæг Владимир Путин Фидибæстæ гъæуайгæнæги Бони фæдбæл æрæги фембæлд исаразта Кремли, уоми æ радзубандий уотæ баханхæ кодта:

– Абони Уæрæсе тох кæнуй æ исонибони, хуæдбаради, раст æма рæстдзийнади сæрбæлтау, æма еци тохи тæккæ разæй æнцæ – тухгин, æхсаргин, уодуæлдайæй архайæг адæймæгутæ…

Æма еци фембæлди рæстæг Владимир Путин, сæрмагонд æфсæддон операций архайгутæй Уæрæсей Бæгъатæри ном аккаггонд кæмæн æрцудæй, уонæн равардта нæ бæсти сæйрагдæр хуæрзеуæг – «Сугъзæрийнæ Стъалу». Уонæй еу адтæй не ’мзæнхон дæлболкъон Герити Инал.

Инал 1-аг къласæй 11-аг къласи уæнгæ ахур кодта сахар Мæздæги Уæрæсей Бæгъатæр Карен Шишкини номхæссæг 7-аг астæуккаг скъолай.

Æма сæ рауагъдони æскъуæлхтдзийнæдти хабарбæл цийнæ кæнгæй, ахургæнæндони директор Маринæ Панасенко радзурдта:

– Мах скъола каст ка фæцæй, уони туххæй мæ бон æй федарæй зæгъун: куд аккаг кæстæртæ, уотæ сæхе бавдистонцæ æма æвдесунцæ лæгигъæдгунæй, æма си мах боз ан. Уæлдай æхцæуæн ба нин е æй, æма нæ фæллæнттæ ке фæррæстмæ ’нцæ.

Иналæн 5-аг къласæй 9-аг къласи уæнгæ адтæй æ къласи разамонæг дессаги дæсни ахургæнæг, историк Владимир Курилов, гъулæггагæн, абони не ’хсæн набал æй, рохсаг уæд… Куд æцæг патриот, уотæ æ ахургæнуйнæгти зундирахаст федар кодта адæймаги тæккæ хуæздæр менеугутæ, ахид аразта зонадон балцитæ цæмæдесаг рауæнтæмæ, архайдтонцæ аллихузон интеллектуалон конкурсти. Инал æнæ фидæй ке ирæзтæй, уомæ гæсгæ æ гъомбæлади хуарзæрдæмæ фæббæрæг æнцæ æма  ин æ ирисхъи райдайæни устур агъаз фæцæнцæ æ курухон ахургæнæги амунддзийнæдтæ. Хестæр кълæсти ба æ къласæн разамонæг адтæй Верæ Пивоварова. Дзубанди дæр ибæл нæййес, æ сæйрагдæр гъомбæлгæнгутæ ба уæддæр адтæнцæ æ мадæ Сейлихан, æ баба æма нана. Скъола фæууни фæсте, биццеу ахур кæнунмæ бацудæй сахар Новосибирски уæлдæр тугъдон-командон училищемæ. Служби фæсте æй рарвистонцæ сахар Хабаровскмæ. Цалдæр анзей размæ бийнонти гъуддаг бакодта. 2022 анзи кæрони æригон афицер иссæй сæрмагонд æфсæддон операций архайæг. Æ фиццаг хуæрзеуæг – Лæгдзийнади орден дæр 2023 анзи Кремли райста Владимир Путини къохæй. Уæрæсей Бæгъатæри ном Иналæн лæвæрд æрцудæй,  разамунд кæмæн лæвардта, еци дæлхайадæ зиндзæуæн дони сæрти бахезун сæ къохи фиццæгти хæццæ ке бафтудæй, æма уоми билæбæл ке бауорæдтонцæ знаги, æма уой фæрци уæгъдæгонд ке ’рцудæй Запорожьей сæйраг цæрæнбунат – сахар Гуляйполе. Мах нæ сæртæ бæрзонд дарæн нæ рауагъдонæй. Уонæй ма еу – Атабек Мухлисов дæр, сæрмагонд æфсæддон операций архайгæй, æрæги хуарзæнхæгонд æрцудæй Лæгдзийнади æртиккаг орденæй.

*  *  *

Райдайæн кълæсти ахургæнæг Маринæ Антонова дæр цубурæй радзурдта Инали туххæй:

– Æз æй багъуди кодтон, куд зундгин, алци зонунмæ бæллагæ биццеуæй æма хуæрзæгъдаугин ахурдзауæй!..

… Мæздæги районæн ес тугъдон намуси цаутæй гъæздуг истори. Уæрæсей Федераций Бæгъатæри ном, æ фæсмæрдæ лæвæрд æрцудæй Карен Шишкинæн, сæ фидиуæзæг, сæ хеуæнттæ æма æмзæнхонти хæццæ бастдзийнадæ дарунцæ Уæрæсей Бæгъатæртæ Виктор Васенко, Виктор Величко, Максим Стефанов, Альберт Гоов, нур ба се ’мрæнгъæ æрлæудтæй Герити Инал дæр.

Аци бæнтти Герити Инал æ бæрзонд хуæрзеуæги туххæй ин ка арфитæ кæнуй, уони хæццæ ан мах дæр. Идарддæр дæр æнтæстгин уо, Инал! Æма де ’фсæддон ихæстæ исæнхæст кæнгæй, сæрæгасæй изæздæхæ дæ хъазауати рауæнæй.

БИЧИЛТИ Алетæ

БÆГЪАТÆРИ ФÆНЗГÆЙ, ДЗИЛЛИТÆ ДÆР ФЕЗМÆЛУНЦÆ…

Уотæ ке æй, е секкаг нæй. Алли рæстæгути дæр бæгъатæртæ дзиллæн адтæнцæ нифсдæттæг æма разæнгардгæнæг. Æма абони ба ка ’нцæ нæ доги бæгъатæртæ?

БИЦЪОТИ Олег, Алагири райони медгъуддæгути ветеранти Совети сæрдар:

– Ес уæхæн зундгонд загъд: «Рæстæг мах равзурста. Алли рæстæгæн дæр ес æхе бæгъатæртæ. 2022 анзи феврали мæйæй фæстæмæ, Фидибæсти сæрбæлтау тохи ка бацудæй сæрмагонд æфсæддон операций архайгæй,  алли бон æ цардæн тæссаг уогæй, æдæрсгæй ка тох кæнуй, нæуæг фашистти нихмæ, етæ ’нцæ. Сæ къартæ син берæ рауæнти ке уинæн – бæгъатæр æма нифсхаст адæм: Дзантиати Аслан, Дигойти Казбек, Козати Руслан, Мухтарти Аслан… Гъулæггагæн, беретæ си сæрæгас нæбал æнцæ, рохсаг уæнтæ, сæ рохс нæмттæ ни иронх ма уæнтæ фæлтæрæй-фæлтæрмæ. Куд ни нæ ’нцæ иронх нæ доги æцæг бæгъатæртæ: Плити Иссæ æма Хъарати Александр, æхсаргин ахургæнæг Басити Чабæхан, фæммард æй немуцаг фашистти къохтæй… Уони къартæ ’нцæ скъолати фæрстæбæл, номерæнæн. Уони æскъуæлхтдзийнæдтæбæл æнцойнæ кæнуй  ахурадон уагæдæнтти ахурдзаути ’хсæн æфсæддон-патриотон гъомбæладæ.

САЙЛАОНТИ Алан, Еугуруæрæсеуон æхсæнадон организаци «Фиццæгти змæлд»-и муниципалон координатор:

– Мæнæн абони бæгъатæртæ, фиццагидæр, æнцæ нæ гъæуайгæнгутæ, фронти раззаг ханхæбæл ка лæууй, еци лæхъуæнтæ. Етæ аллибон дæр, сæ цардæн тæссаг уогæй, тох кæнунцæ, цæмæй исонибони дæр нæ сæрмæ уа цъæх арв. Етæ ’нцæ нæ абони æцæг бæгъатæртæ, æма си хъæбæр арфиаг ан, нæ сæртæй син ниллæг ковæн.

Фал бæгъатæртæ айдагъ тугъди будури нæ фæуунцæ. Мæнмæ гæсгæ, бæгъатæрти нæмттæ хæссунцæ нæ ахургæндтæ, инженертæ, конструктортæ – кадæриддæр æвæллайгæй архайуй, цæмæй нæ паддзахадæ хъаурæгин æма уæгъдебарæ уа, етæ…

Цалинмæ еуетæ гъæуай кæнунцæ арæнтæ, уæдмæ иннетæ ба аразунцæ техникон фæрæзнитæ, кæцитæ нин нæ паддзахадæ хъаурæгиндæр кæнунцæ. Е ба ’й уæззау куст æма нæ Фидибæсти гъомусадæ агъазиауæй-агъазиаудæр кæнуни гъуддагмæ устур байвæрæн хæссуй.

Уони æмрæнгъæ ма лæуунцæ дохтиртæ æма ахургæнгутæ, кæцитæ зиндзийнæдтæ нецæмæ даргæй, сæ равзурст дæснийæдтæбæл  еузæрдиуон æнцæ. Хумæтæг адæм дæр кæддæриддæр цæттæ ’нцæ, багъæуаги сæ агъази хай раттунмæ. Цубур дзурдæй, мæн цæсти бæгъатæр æй, æхе разæй иннетæбæл æма æ Райгурæн бæстæбæл сагъæс кæнунгъон ка разиннуй, е. Нæ алфамбулай уæхæнттæ ба берæ ес, фал сæ алкæд не ’рæстæфæн.

ТОБОЙТИ Валерия, тогуадзæн Станций косæг:

– Мæнæн нури бæгъатæрти æмрæнгъæ лæуунцæ, уæззау уавæри ка бахауй, уонæн рæстуодæй ка фæййагъаз кæнуй, зæгъæн, тог ка раттуй, етæ. Ахид игъосункæнуйнæгти, ку фæззиннуй хабар, кадæр фæндаггон фидбилизи бахаудтæй, зæгъгæ, æма тогфедуд фæцæй, уæд æнæфæстæмæ фæккæсгæй беретæ æрбалæуунцæ тогесæн Станций размæ. Æма уони фæрци берæ адæми цард фæййервæзуй. Æма уомæ гæсгæ, уони дæр исхонун æнгъезуй бæгъатæртæ.