Нæ республики Парламенти Сæрдар Тускъати Таймораз ба æ арфити нистауæни уотæ зæгъуй:

– Цæгат Иристони Парламенти депутатти номæй уин зæрдиагæй арфæ кæнун Нæуæг анзи æма Цæппорсей бæрæгбони фæдбæл!

Нæуæганзон бæрæгбæнттæ ’нцæ æма уодзæнæнцæ алли фæлтæрæн дæр тæккæ уарзондæр. Етæ сæ хæццæ алли хæдзарæмæ дæр æрбахæссунцæ хуарздзийнадæ æмæ нифси рохс, тæккæ сæйрагдæр ба –хуæздæр исонибон аразунмæ тæлæни нæ еу кæнунцæ.

Зæронд анз рафæндараст кæнуни размæ, æнæмæнгæ фæгъгъæуй кустæн хатдзæгтæ искæнун. Æ кæронбæттæнмæ ци анз æрхъæрттæй, е берæ цæмæйдæрти бустæги хумæтæг нæ рауадæй, фал еумæ райсгæй ба адтæй цæмæдесаг æма фæрнгун. Нæ республики Парламенти 30-анзон юбилейи анзи мах нæ куст фæд-фæди бæркадгиндæр кодтан, раздæри фæдздзурди депутаттæн хуарздзийнадæй цидæриддæр сæ къохи бафтудæй, уонæй никки æнхæстдæргонд цудæй закъонæвæрунади бундор, нæуæг æма лæмбунæгдæр ампъезтæн экономикон æма социалон политики.

Цалдæр боней фæсте æгасцо зæгъдзинан нæуæг, 2026 анзæн. Уæрæсей Федераций Президент Владимир Путини унаффæмæ гæсгæ нæуæг анз нисангонд æрцудæй, куд Уæрæсей цæрæг адæмихæттити еудзийнади Анз. Нæ бæсти разамонæги еци хъæппæреси ахедундзийнадæ уæлдай бæлвурд æма лæдæрд æй нури рæстæгути уавæртæмæ гæсгæ. Нæ цитгин Фидибæсти нуриккон цардарæзти нæ дзиллити æхсæн æнгомдзийнадæ, кæрæдзей лæдæрундзийнадæ æма нимайундзийнадæ рæстмæ ку уонцæ, уæд нин е уодзæнæй нæ цардарæзти федарæй-федардæр бундор.

Уæрæсей хъаурæ алкæддæр адтæй æма æнæмæнгæ уодзæнæй æ берæнацион дзиллити еудзийнади фæрци, еумæйаг истори æма традицион хæзнати, фæлтæрти ’хсæн федар бастдзийнади фæрци. Нæ Фидибæсти сæрбæлтау æцæг еузæрдиуондзийнадæ нуртæккæ æвдесунцæ, сæрмагонд æфсæддон операций ка архайуй, нæ еци æхсаргин тугъдонтæ. Æнæбасæтгæ уоди хъаурæй æма алæмæти лæгдзийнадæй æнхæст уогæй, етæ æвæллайгæй гъæуай кæнунцæ нæ национ интерестæ æма нæ паддзахади æдасдзийнадæ.

Æрцæуйнаг Нæуæг анзи хуарзæнхæ уæ уæд, мæ хъазар æмзæнхонтæ! Уадзæ æма 2026 анз алли бийнонтæн дæр æрхæссæд амонд, дзæбæхдзийнæдтæ, алкæмæн дæр ни нæ тæккæ уарзондæр бæлдитæ исæнхæст уæнтæ!..