Нæ газети абони номери фæрстæбæл фулдæр бунат равардтан нæ номдзуддæр финсгутæй еу, Уруймæгти Алимæрзай кизгæ Езетхани туххæй æрмæгутæн. Уотæ цæмæн бакодтан, уомæн ес еуцалдæр рæуаги.

Еуемæй, æ райгурдбæл 12 декабри исæнхæст æй 120 анзи, æма уой фæдбæл ци зæгъуйнæгтæ æнгъезуй, уони куд нæ зæгъæн гъæугæ хузи!

Иннемæй ба нин хъæбæр гъулæг адтæй, уæхæн ахсгиаг цау цæмæдæр гæсгæ æгириддæр ке нæ æрæстæфтæнцæ нæдæр нæ республики культури министрадæ, нæдæр финсгути Цæдес, нæдæр дзиллон хабархæссæг фæрæзнитæ. Уогæ «цæмæдæр гæсгæ», зæгъгæ, зæгъун раст нæй. Кæддæр райгъустæй кедæр соцъа загъд, гъома, Езетхан уруссагау финста æма нæ национ литературæмæ неци барæ даруй. Фудзунддæр загъдæн æримисæн нæййес. Æнæгъæнæ Советон Цæдеси номдзуддæр финсгутæ нæ национ литератури искурдиадæгиндæр минæварбæл ке банимадтонцæ, нæ адæми уодиконди алæмæтдзийнадæ дуйнетæбæл ке фæрци базудтонцæ, еци финсæг нæхецæн ба цитгийнаг куд нæ уа?

Нæ номдзуд поэт Плити Грис æ имисуйнæгти Уруймæгти Езетхан ни беретæй ирондæр адтæй, зæгъгæ, хумæтæги нæ финста. Гриси финст уац абони мухур кæнæн 5-аг фарсбæл.

Зæгъуйнаг ма ан уой дæр, æма хестæр фæлтæртæ ма ’й абони дæр хуарз гъуди кæнунцæ, Уруймæгти Езетхани уадзимистæ куд уарзон адтæнцæ нæ дзиллæн, куд æхсицгонæй сæ кастæнцæ, киунугæдæнтти ин æ киунугутæмæ адæм кезуй куд лæудтæнцæ. Уомæ гæсгæ ин мах дæр абони кадæ кæнæн æма, ци æрмæгутæ мухур кæнæн, уонæй уæлдай ма идарддæр дæр кæндзинан æ кой…

Уæдта ма игъосун кæнæн уой дæр, æма Уруймæгти Езетхани кадæн сæрмагонд номерæн мадзал арæзт æрцæудзæнæй 18 декабри æ райгурæн Киристонгъæуи (Дигорай) культури Хæдзари. Зæрдиагæй уæ хонæн уордæмæ!..