Уæрæсей 4 ноябри бæрæггонд цæудзæнæй нæ паддзахадон бæрæгбæнттæн сæ ахсгиагдæртæй еу – адæмон еудзийнади Бон. Уой фæдбæл Цæгат Иристони дзиллæ арфæ кæнунцæ нæ республики Сæргълæууæг Сергей Меняйло æма Парламенти Сæрдар Тускъати Таймораз.

– Недзаманти нæ фидтæлтæ тухгæнæг знæгтæ ци федар нихкъуæрд райстонцæ, е адтæй Уæрæсей паддзахади еугур адæми еудзийнадæ, сæ райгурæн зæнхæбæл æновуддзийнадæ, уарзт сæмæ ци æгæрон разæнгарддзийнадæ  æвзу-рун кодта, уони фæрци. Е адтæй адæми æнæбасæтгæ нифс! Е еудадзугдæр цардгъон адтæй нæ фидтæлти зæрдити, æхсистæй сæдæгай æнзти æма некæд хецæн кодта махæй.

Уæрæсей Президенти унаффæй 2025 анз Фидибæстæ гъæуайгæнгути анзбæл нимад ке ’рцудæй, е нæ аци бæрæгбон кæнуй уæлдай ахсгиагдæр æма намусгиндæр. Уомæн æма Райгурæн бæстæ гъæуай кæнуни цæттæдзийнадæ æнцойнæ кæнуй адæми еудзийнадæбæл, е нин фадуат дæттуй паддзахади федардзийнадæ æма æ хебарæдзийнади сæрбæлтау уодуæлдайæй архайунæн…»

Тускъати Таймораз дæр æ арфи финстæги баханхæ кодта адæмон еудзийнади Бони бæрзонд ахедундзийнадæ:

– Берæнацион Уæрæсе æй, гъæздуг истори, арф уодварнон æма культурон æгъдæуттæ кæмæн ес, бæсти евгъуд, абони æма исонибон æнгом баст кæми ’нцæ, уæхæн устур паддзахадæ. Нæ рагисторий хабæрттæмæ ракæсгæй, бæлвурдæй балæдæрæн ес уой, æма тæккæ карздæр, зиндæр æма лæгæвзарæндæр рæстæгути дæр нæ бæсти адæми граждайнаг еудзийнадæ æма Фидибæсти ирисхъæбæл бæрнондзийнадæ алкæддæр агъазгæнæг адтæнцæ Уæрæсей сæребарæдзийнадæ æма хуæдбарæдзийнадæ багъæуай кæнуни гъуддаги.

Цæгат Иристони берæ æности дæргъи цæрунцæ сæдæ адæмихаттемæй фулдæр. Республики цæргути культури, уодварнон хæзнатæ æма национ æгъдæутти фæрци гъомусгин æй æ адæми еудзийнадæ. Æма еци æууæл фæрнгундæр исонибони бундор ке уодзæнæй, е дузæрдуггаг нæй!..»