Уæддæр сæ цæйбæрцитæ гъæуй, зæгъгæ, фарстай хузи сæргонди хæццæ айразмæ федералон газеттæй еуеми фæззиндтæй коррупционерти гъомурундзийнади туххæй æрмæг. Сæргонд уайдзæфи хузи рауадæй, фал ма рафæрсæ-бафæрсæ гъæуй, кæд æма хъæбæр хуарз зундгонд æй коррупционертæн (раздæр сæ давгутæ æма гæртанесгутæ худтонцæ) бафсес æгириддæр нæййес. Хумæтæги нæй е дæр, æма уой фæдбæл берæ хабæрттæгонд ке цæуй еугур адæмихæттити исфæлдистади дæр æма номдзуд финсгути уадзимисти дæр. Зæгъæн, недзаманти номдзуд финсæг Эзопи финст æмбесæндтæй еуеми кæнуй мæнæ ауæхæн цауи кой.

Еу лæг, дан, уæлдай æновуддæрæй табу кодта Гермесæн – бердзейнаг мифологимæ гæсгæ хуцæуттæй зæнхон  адæммæ уацхæссæгæн, фиййæутти, фонсдаргути æма бæлццæнтти бардауæгæн. Æма ин е дæр уой туххæй балæвар кодта, сугъзæрийнæ æйкитæ ка хаста, уæхæн хъаз. Лæгмæ е фагæ нæ фæккастæй, фæндадтæй æй уайтæккæ рагъæздуг ун. Уотæ æнгъалдта, æма хъаз медæгæй æнæгъæнæй дæр сугъзæрийнæ ’й. Айтæ-уойтæ нæбал фæккодта æма ’й равгарста. Фал фæффудæнгъæл æй: хъазæн æ медæгæ разиндтæй айдагъдæр хурфидзаумæуттæ. Лæг, ци зæгъун æй гъæуй, æнæхай фæцæй, уой размæ имæ еугаййæй ци сугъзæрийнæ æйкитæ хаудтæй, уонæй дæр.

Зудæ æма кæрæф адæймæгутæ, фулдæр мин уа, зæгъгæ, æгæр ку иселлæг унцæ, уæд фенæхай унцæ, ци сæмæ фæууй, уомæй дæр ма…

Ка ’й зонуй, аци æмбесонди хабар нури коррупционертæ нæ фегъустайуонцæ. Кæд æй фегъустонцæ, уæдта сæмæ, æвæдзи, гъаргæ дæр нæ бæкæндзæнæй, уомæн æма Уæрæсей Слестгæнæн комитети сæрдар Александр Бастрыкин куд загъта, уотемæй коррупционери неци бауорамдзæнæй æ фудмиутæ кæнунæй, сауæнгæ ин мæлæтæй тæссаг ку уа, уæддæр…

Æма æнæфсесæй гъæйтт-гъæйтт кæнунцæ. Раст зæгъгæй, кæбæлдæрти си æрцæуй, мæнæ æмбесонди ци лæги кой цæуй, уой цау. Александр Бастрыкини загъдмæ гæсгæ, аци анзи фараст мæйемæ Слестгæнæн комитети дæлхайæдтæ исаразтонцæ 24 мин уголовон гъуддаги коррупцион статьятæмæ гæсгæ – фарæ еци рæстæгмæ цæйбæрцæ арæзт æрцудæй, уомæй 16 проценти фулдæр. Тæрхондæнттæмæ æрвист æрцудæй 900 коррупционерей нихмæ арæзт 408 уголовон гъуддаги. Кедæрти алæмæти æгæрон мулкитæ си ист æрцудæнцæ, кадæртæ ба си уомæй фæййервазтæнцæ, уомæн æма сæ рагацау баримахстонцæ.

Мæнæ ци нимæдзти кой искодта А. Бастрыкин, етæ кæд цийфæнди берæ зиннунцæ, уæддæр, баруагæс уи уæд, сæ коррупцион фудракæндти туххæй дзуапп байагорун кæмæй гъæуй, æма нерæнгæ ма æнæхъоргондæй ка изайуй, уони бæрцæ ба зингæ фулдæр æй. Кæддæр уа, уæддæр сæ дзуапп дæттун ке багъæудзæнæй, уой ба куд нæ лæдæрдзæнæнцæ, æма сæ хæранæй æмбурдгонд мулкитæн римæхсæнтæ аразунцæ, сауæнгæ фæсарæнти, абони нæ Фидибæсти нихмæ архайæг паддзахæдти дæр.

Æма уомæн уæддæр ескæд кæронгонд æрцæудзæнæй? Аци фарстамæ гæсгæ æрхæссуйнаг ан Уæрæсей Федераций Конституцион тæрхондони сæрдар Виталий Зорькини загъд. Айразмæ «Российская газета»-йи ци уац ниммухур кодта, уоми куд баханхæ кодта, уотемæй æ гъудимæ гæсгæ коррупци æй, искунæггæнæн кæмæн нæййес, уæхæн фæззинд, кæци едаггун æй адæймагæн е ’рдзон исконди. Æности дæргъи коррупци æй адæймагади æмдзæуæг, барадон паддзахади бундортæн æма баради  рæстмæцудæн тæккæ тæссагдæр æвзедæн уогæй… Фал уæддæр æхсæнадæ ба ихæсгин æй æ нихмæ фæрраздæр уни аллихузон мадзæлттæй архайунæй. Уогæ етæ цæйбæрцæбæл ахедгæ  рауайдзæнæнцæ?.. Куд фæззæгъунцæ, рæстæг æвдесдзæнæй…

Аци фарси æрмæгутæ бацæттæ кодта БИЧИЛТИ Алетæ