Нури доги нæ цардиуаги ци берæ аллихузон нæуæгдзийнæдтæ фæззиндтæнцæ, етæ нин, уæлдайдæр ба хестæр фæлтæрæн, кæд цæмæйдæрти æнхæст бæлвурд нæ фæуунцæ, уæддæр уой ба лæдæрæн, æнæмæнгæ гъæугæ ке ’нцæ нæ цардиуагæ æнтæстгиндæрæй аразуни гъуддæгути. Зæгъæн, ахид æригъосæн креативон индустритæ, зæгъгæ, загъд. Уотæ хонунцæ экономики хай, кæцими товартæ æма лæггæдтæ арæзт цæунцæ интеллектуалон фæллойнæ æма исфæлдистади бундорбæл. Æма си архайунгъон ка уа, етæ ба цæттæгонд цæунцæ сæрмагонд ахургæнæндæнтти. Уæлдай æргом ба æздæхт цæуй кæстæрти ахур кæнунмæ – уонæн сæрмагондæй игонгонд цæунцæ креативон индустрити скъолатæ. Æрæги фиццаг уæхæн скъола байгон æй Цæгат Иристони дæр.

Федералон программи бундорбæл аййевæдти Лицейи æрæги байгон æй креативон индустрити фиццаг скъола. Мадзалмæ ’рбацудæнцæ Цæгат Иристони Сæргълæууæг Сергей Меняйло æма Хецауади Сæрдари хуæдæййевæг Плати Альбинæ.

Нæ республики культури министри фиццаг хуæдæййевæг Рæмонти Маринæ куд радзурдта, уотемæй нæуæг скъолайæн вазуггин ахедундзийнадæ ес.

– Креативон индустрити скъола æй 14-17-анздзуд искурдиадæгин фæсевæди нæуæг фæзæ. Аци рауæн сувæллæнттæ ахур кæндзæнæнцæ нуриккон электрон музыкæ, звукорежиссурæ, дизайн, къартæ æма видео есуни дæснийæдтæбæл.

Цуппар хайади дæр æнцæ абони царди ахсгиаг æма гъæугæ фæззелæнтæ. Фæсевæдæн хъæбæр хуарз нуриккон ефтонггæрзтæ æвæрд æрцудæй. Дууæ анзей ахури фæсте айдагъ зонундзийнæдтæ нæ райсдзæнæнцæ, фал ма æвдесæндари гæгъæди дæр. Аци нæуæгдзийнæдтæ æригæнтти сæхемæ хъæбæр æлвасунцæ, æма нæмæ нуриуæнгæ цуппар къуаремæ дæр бе-
рæ сувæллæнттæ ’рбацудæй ахурмæ. Аййевади надбæл си ке бафæндæ уа рацæун, уомæн фадуат ес мах скъолай райдайæн зонундзийнæдтæ райсунæн, – загъта Рæмонти Маринæ.

Сергей Меняйло æрзилдæй скъолай алли хайадæбæл дæр. Звукорежиссури студий республики Сæргълæууæгæн сувæллæнттæ равдистонцæ, еу мæйæмæ ахурти сæ къохи ци зонундзийнæдтæ бафтудæй, еци цæстуингæ æрмæг. Аци хайади æригон ахургæнæг Владислав Федотов дзурдта, звукорежиссури къабазæ нæуæгдæр уавæртæмæ ке рахизтæй, зæлтæ æма акустики кæдзос муртæй зæрдæ ке цийнæ кæнуй, сæ къæбинет ци техникæй ефтонггонд æй, уæхæн ба Цæгат Кавкази дæр ке нæййес, уой туххæй.

Сергей Меняйло аразийæй байзадæй нæуæг скъолай уавæртæй. Уой туххæй æ радзубандий уотæ загъта:

– Абони цæрæн нимæцон экономикæ æма технологити рæстæги. Ци æй индустрийæ? Экономики къабазæ. Æма аци скъола дæр исуодзæнæй нæ республики экономики ирæзти агъазиаудæр хæйттæй еу. Ес нæмæ искурдиадæгин сувæллæнттæ. Мæнæ абони ци æнтæстдзийнæдтæ фæууидтон, етæ мах фæлтæри къохи æнцонтæй нæ бафтудайуонцæ, уомæн æма нин нæ адтæй гæнæнтæ. Зæгъæн, дизайн райсæн, ами гъæуама адæймагмæ, æнæмæнгæ, бæрзонд къæпхæнбæл æвæрд искурдиадæ уа, дизайни къабазæ æнцон нæй, хумæтæги хузтæ си не ’скæндзæнæ. Скъолай хайæдтæ идарддæр дæр ма кæндзæнæнцæ урухдæр, нур ба бал нæ фадуат ци амудта, уой исаразтан.

Æ радзубандий ма республики разамонæг уой дæр баханхæ кодта, æма креативон индустри нуриккон рæстæги домæн æй. Федералон æмвæзадæбæл ку цудæй дзубанди, уæд фиццагидæр амунд цудæй е, æма экономики алли къабази дæр, æнæмæнгæ, æргом æздахун гъæуй креативон индустрий райрæзти гъуддагмæ. Уомæн æма нуриккон царди ахсгиаг мадзал æй, æма си раст пайдагæнгæй, экономикон ирæзти бæрæггæнæнтæ бæрзонддæр кæндзæнæнцæ.

Æма Сергей Меняйло æхцæуæнæй загъта:

– Байгъустон æригон кизгуттæ æма биццеутæмæ æма дес дæр куд нæ кæнун, æцæг цæттæ журналисттæ æма амонгутæ ’нцæ нуриуæнгæ бал. Сæ гъудитæ æма фæндитæ куд æргом æма нифсгунæй зæгъунцæ, амонунцæ нуриккон ефтонггæрзтæй пайда кæнуни сæ арæхстдзийнадæ. Мах агъаз кæндзинан фæсевæдæн сæ нæуæг проекттæ æнхæст кæнуни гъуддæгути, уæхæн скъолатæ ба ма байгон кæндзинан нæ республики иннæ районти дæр.

ГИБИЗТИ Регинæ