Нæ адæмæн ци берæ æверхъаудзийнæдтæ æвзаргæ рауадæй, æма си абони дæр ма зæрдрист кæмæй ан, уонæн сæ уæззаудæртæй иссæнцæ 1992 анзи октябри кæронбæттæни цаутæ. Уæд нæ дзилли бабæй багъудæй нæ фидтæлтиккон зæнхи сæрбæлтау бахъазауат кæнун, нæ адæми сæрæндæртæ си сæ цард иснивонд кодтонцæ… Æма уæдæй абони уæнгæ алли анз дæр 30 октябри хъонцгæнгæй имисæн нæ еци бæгъатæрти рохс нæмттæ. Уотæ аци анз дæр. Номерæн мадзæлттæ 30 октябри райдæдтонцæ сæумæй дæс сахаттебæл Горæтгæрон райони Камбилеевки гъæуæй. Еумæйаг æнсувæрон ингæнбæл деденгутæ исæвардтонцæ нæ республики Хецауадæ æма Парламенти иуонгтæ, æхсæнадæ æма ведомствити минæвæрттæ, райони цæргутæ. Уой фæсте ба номерæн мадзал рацудæй Дзæуæгигъæуи Намуси Аллейи. Мæтъæл музыки зæлтæмæ айдагъ адæм нæ, фал мæргътæ дæр нийгъустонцæ.

Номерæн мадзали архайдтонцæ нæ æдзард бæгъатæрти хеуæнттæ, нæ республики Сæргълæууæг Сергей Меняйло æма Парламенти Сæрдар Тускъати Таймораз, хецаудзийнади къабæзти разамонгутæ, депутаттæ, æхсæнадон организацити минæвæрттæ, ахургæнæндæнтти минæвæрттæ…

Адæмæй æзмæлæн нæ адтæй бæгъатæрти уæлмæрдти. Ингæнтæ сурх радардтонцæ деденгутæй. Æнæдзоргæй еугурæй дæр цудæнцæ  æдзард тугъдонтæн кадæ кæнунмæ, Иристони сæребарæ æма сабурдзийнадæ ка ’рхаста, еци бæгъатæртæн рохсаг зæгъунмæ. Сæ фæсте ке ниууагътонцæ, еци фæлтæрти ихæс æй уони зæрдæбæлдарæн.