Цæгат Кавкази суворовон тугъдон училищей къурсанттæ сæрмагонд æфсæддон операций архайгутæн æрæмбурд кодтонцæ cæ æрвистæг – акоппи гъæугæ цирæгътæ, аууони хизтæ, хуайраг,  цъоппин цъиндатæ, резинæ цулухътæ…

Сæ аци æрвистæг æй устур гуманитарон агъази еу хай Сурхтурусагин Воронежскаг-Шумлинскаг мотоæхсæг 19-аг дивизийæн. Ес си алли къурсантæн дæр кусти хе хай, алкедæр лæдæруй, уомæй уæлахезмæ æвæрæн ке æрветуй, уой. Сæ куст кæнунцæ ахурæй уæгъдæ рæстæги, аууони хизтæ дæр бийунцæ, уомæй ба техникæ баримæхсæн ес.

Кæстæр сержант Æлборти Эмир æй роти старшина, æма куд зæгъуй, уотемæй сæрмагонд æфсæддон операций ка ’й, уони бунати уогæй, цæйбæрцæбæл хъæбæр æхцæуæн ин  уæхæн агъаз райсгæй.

Гæззати Даниэль, суворовон училищей 6-аг къурси хецау, хестæр гъомбæлгæнæг, зæгъуй:

– Училище устур æргом здахуй тугъдон-патриотон гъомбæладæмæ. Нæ рауагъдонтæй беретæ ’нцæ сæрмагонд æфсæддон операций архайгутæ. Ка фæммард æй, уони нæмттæ нæ зæрдити хæссæн. Æ тугъдон ихæс ка æнхæст кæнуй, уонæн ба агъаз æрветæн.

Сурхтурусагин Воронежскаг-Шумлинскаг мотоæхсæг 19-аг дивизи хестæр афицери агъазгæнæг Наталья Ракитянская куд радзурдта, уотемæй уæлдай ахсгиаг е æй, æма аци гуманитарон агъаз æмбурд кæнунцæ нæ меценаттæ æма гъæздугутæ нæ, фал Иристони хумæтæг цæргутæ.

– Хумæтæг адæм сæ агъази хай, сæрмагонд æфсæддон операций раззаг ханхæбæл ка лæууй, уонæмæ ке æрветунцæ, уомæй æвдесунцæ сæ хæццæ сæ зæрдиаг бастдзийнадæ. Уордигæй ци фарстатæ ’рбахъæртунцæ, уонæн мах агорæн фадуæттæ. Суворовон училищемæ æрæги фæдздзурдтон, æма нин фæййагъаз кодтонцæ, е фиццаг хатт нæй. Арфæ син кæнун, уæхæн бæрнон сувæллæнттæ ке гъомбæл кæнунцæ, уой туххæй.

Нæ уацхæссæг