Уæхæн хабар, уæхæн уæззау цæф,
Еугур æрвдзавд фæцан, æнæгъомбæл.
Аслæнбæг, фæккодтай нæ зæрддзæф,
Дæ мæрдæй нæбал ан цæрунгъон дæр.

Цитæ ма æййафдзæй мæ тухст сæр.
Ку нæбал дæн дзурдгъон фур адæргæй.
Ахур дæн мæ мадæбæл куддæр,
Дæу циртмæ ба цæун къæхтæ къуæргæй.

Нæ уарзун нæ зудтай æгирид,
Гъолон уарзт дæ кодтан мах не ‘гас дæр.
Дæ реубæл ниддæвдæг æй сигит,
Махæн ба ма уæддæр уодæгас дæ.

Адзалæн мадзалвæдгæ нæййе,
Æппунæдзох кодтай медбилходæ.
Ци бийнонтæ уадзис дæ фæсте, –
Мæрдтæй сæбæл кæнæ хуæрзауодæн.

Аслæнбег… Аслæнбег… Нæбал нин дæ ду дæр. Некæдбал æрбахездзæнæ нæ къæсæрбæл. Некæдбал дин фегъосдзинан дæ фæлмæн дзурд, нæбал дин фæууиндзинан дæ медбилти бахудт…

Аци дзурдтæ финсгæ бæргæ кæнун, æууæндгæ ба сæбæл мæхуæдæг дæр нæ кæнун. Æруагæс дæр ми нæ кæнуй, ме ’фсонæрхæги дæр некæд æрцудайдæ, есгæд бон, «нæбал дæ…», зæгъгæ, мæ цъухæй исхаудтайдæ уæхæн загъд, е.

Уотæ нæрæмон цæмæн разиндтæ?.. Дæ разæй мæнæн цæугæ адтæй еци æносон дуйнемæ. Кумæ ратагъд кодтай? Æз ма мæ зæрдæ дæубæл ку дардтон, мæхецæн ди устур нифситæ ку æвардтон… Куд тагъд рауæгæ дæ дæ уæлиуон цардæй, куд тагъд нæбæл исистай дæ къох. Гæрр! Дæ фæсте кæугæ, дзиназгæ ке ниууагътай, уонæбæл дæр куд нæбал расагъæс кодтай?..

Æ рантæсунмæ ци минкъий бæдолæмæ фæббæлдтæ, уой дæ къохмæ дæр ку нæбал исистай, æ фæлмæн ростæбæл ин дæ куствæллад къохтæ дæр ку нæбал æрдаудтай. Æвæдзи дæмæ махмæ ести уайдзæфтæ адтайдæ, фал дин еци æнæтæрегъæд уод ба Хуцауи бунмæ ци ракодта?

Аслæнбег… Аслæнбег… Де ‘рбахизтæй, дæ байдзулд ку фæрраздæр уидæ, ду кæми уисæ, уоми нæмæ  цазæ дæр хорбонау ку кастæй. Хор дæр ма еугуребæл ку нæ хъæртуй, уæд дæу уарзæгой зæрдæ ба æнккæтебæл куд хъæрттæй? Уæллагæй дин ци устур тухæ лæвæрд адтæй!

Цард-цæрæнбонти ку некæд неке зæрдихудти бацудтæ, ку некæд неке басайдтай, уæд нур ба не ’нккæтей зæрдихудти куд бацудтæ, куд нæ фæссайдтай?

Аслæнбег… Аслæнбег… Дæ уод адæмæн ку фæгъгъардтай, ихæсгинæй ку некæд некæмæй байзадтæ, уæд мах ба дæхецæй ихæсгин цæмæн фæккодтай? Гъо, устур бунæтти некæд фæккустай, къæлæтгин бадæнбæл некæд фæббадтæ. Ци адтæ, уомæй адтæ хуæрз хумæтæг, хуæрзуод, рæстзæрдæ адæймаг. Гъо, беретæ фæббадунцæ бæрзонд бунæтти, фал аци дуйнейæй ку рахецæн унцæ, уæдта сæбæл еу куй рæйæг дæр нæ фæууй. Сæ рамæлæт гъаргæ дæр некæмæ бакæнуй, сæхе куд неке гъудæй, сæхуæдтæ дæр уотæ неке фæгъгъæунцæ.

Аслæнбег… Аслæнбег… Ду ба кæд хумæтæг лæг адтæ, уæддæр сæдæгай адæймæгути зæрдитæ низмæлун кодтай, берети цæстисугтæ æвæрсгæй уадæнцæ сæ ростæбæл дæ кири уæлсæргъæ.

О, Исфæлдесæг! Æгæугæ мардæй рамæлунæй нæ бахезæ. Уомæй æгадæдæр Дигорæмæ некæд неци адтæй. Уомæй æлгъистагдæр!

Аслæнбег… Аслæнбег… Гæлæхха, еунæг каст ма ракæнæ дæ кирæй. Мæнæ дæ уæлсæргъæ ку марой кæнунцæ дæ цардæмбал, дæ бæдæлттæ, уони кæстæртæ. Уогæ еци кæстæртæ нерæнги ма æгæр æнагъон æнцæ, фал ку байрæзонцæ, уæдта дæбæл æнæмæнгæ фæрсдзæнæнцæ. Уодзæнæй сæ нанайæн, ци син разæгъа, е.

Аслæнбег… Аслæнбег… Сабийдоги еу тæбæгъæй ци хуæруйнаг хуардтан, еу едугæй ци комидзæгтæ кодтан, уони мин мæ фæрстæй ку фæккодтай. Дæ къуæллитæ къохтæ дæ дзиппи бауолæфуни номбæл ку некæд ниццавтай, уæд нур кæрæдзебæл æвæрдæй куд бухсунцæ? Алцæбæл дæр фæлтæрд, алцæмæн дæр фæразон ку адтæ, уæд дæбæл нур ба ци ’рцудæй. Кумæ ратагъд кодтай? Дæ фидæ æма дæ мадæбæл  нæбал бухстæ, æви де ’дзард кæстæр æнсувæрмæ фæккæсунмæ фæннæхстæр дæ?..

Нæ ’й лæдæрун, нæма мæмæ гъаруй дæ мæлæт. Æгæр æвгъау адтæ не ’хсæнæй фæгъгъæунмæ, æгæр! Уогæ ма нур дæ фæсмæрдæ ци давунцæ нæ тæрхæнттæ. Уогæ ма нур ци уайуй нæ гъарæнгæй? Æррæстæ нæхецæн зæрдæвæрæнтæ кæнæн, æндæр нецибал. Исон мæ рафинсдзæнæнцæ, зæгъгæ, мин зæрдитæ ку æвардтай. Нур ба еци исон исæносон æй. Гъостæбæл ма дудзигъæрау уайуй дæ зæрдæвæрæн дзубанди. Ци хæстæг æвæрд адтæ мæ уодмæ æма ми ци хъæбæр райдард дæ! Кумæ томар кæнон дæ фæсте, кутемæйти дæ баййафон?

Аслæнбег… Аслæнбег… Мæ къох нецæмæбал тасуй. Æррæстæдæр ма боневгъуйæнтæ кæнун. Ду бæргæ фæййервазтæ аци хæран цардмæ кæсунæй, мæнæн ба ма сæмæ кæсгæ ’й. Нæ сæ уодæнсуй мæ зæрдæ, нæ сæ есуй æхемæ мæ уод. Уæддæр лæсун сæ фарсмæ, райсун син се ’нæхснад къохтæ. Ду ба уоми рæстити хæццæ дæ. Æууæндун, дæ бунат дзенети цъæх зæлдæбæл ке ’й, уобæл. Еунæг гъуддаг ма мин хуæцуй мæ фарсбæл. Дæ фæсте ци бæдæлттæ ниууагътай, уони æз уиндзæнæн дæ бæсти, уони цæститæй мæмæ ходдзæнæ, уони уарздзæнæн дæ бæсти. Е дæр устур амонд æй мæнæн. Кæддæр æ цонгбæл кæмæн рахуæстæн, æ фиди хæдзарæй ке рахудтон æма дæ уатмæ ке бахудтон, дæ еци уодæмбалæн уæддæр æ батухсти кæд цæгиндзау лæуунгъон бауинæ. О, Хуцау, еци хъаурæ мин раттæ!

Аслæнбег… Аслæнбег… Бацудтæ де ’носон дуйнемæ. Корун ди æма ма мин  мæ фæстаг курдиадæ исæнхæст кæнæ. Ду ци уæлмæрдти уодзæнæ, уоми æвæрд æй мæ мадæ дæр… Корун ди æма си мæн бæсти хатиртæ ракорæ мæ кæддæри æнæсæрфат миути туххæй. Кæд мин дæумæ гæсгæ ниххатир кæнидæ. Дæу уæлдай гъолондæр уарзт кодта. Æруагæс ми кæнуй, дæумæ байгъосдзæнæй…

Аслæнбег… Аслæнбег… Мæ зæрдæ дæбæл дарун…

КОЛИТИ Витали