Уæхæн нифси хæццæ раздæри рæстæгути дæр цудæнцæ æма нур дæр цæунцæ нæ Фидибæсти Æфсади рæнгъити сæ цитгийнаг ихæс æнхæст кæнунмæ.

Мæнæ бабæй 1 апърели райдæдта æфсади рæнгъитæмæ фæдздзурди кампани. Иннæ хæттитæй уæлдай еци гъуддаги ци нæуæгдзийнæдтæ фæззиндтæй, уони фæдбæл æй сæ  дзубанди Цæгат Иристони æфсæддон комиссар, болкъон Владимир Скоморохи æма комиссаради граждæнти æфсæддон службæмæ цæттæ кæнун æма фæдздзурди хайади хецау, дæлбокъон Козати Батрадзæн.

Уалдзигон кампаний республики æфсади рæнгъитæмæ фæдздзордзæнæнцæ 700 адæймагемæ, еци нимæдзæ иснисан кодта зилди штаб. Республики алли муниципалон исконди дæр косунцæ æфсадмæ фæдздзурди фараст къамиси. Уой туххæй республики æфсæддон комиссар уотæ зæгъуй:

– Æфсæддон ихæс æнхæст кæнун æма æфсæддон служби фæдбæл закъонмæ гæсгæ фарæ 1 январæй 18 анземæй 30 анзей уæнгæ нæлгоймæгтæмæ фæдздзордзæнæнцæ æфсадмæ. Службæ кæнуни æмгъуд æййивд не ’рцудæй æма раздæри хузæн æй еу анз, – зæгъуй Владимир Александри фурт. Нæуæгдзийнæдтæбæл дзоргæй бафеппайдта, аци кампани ке цæудзæнæй, паддзахадон информацион системæ «Единый реестр военного учета»-йæй пайда кæнгæй. Хаст имæ ’рцудæнцæ, Уæрæсей æфсæддон хигъди æвæрд ка цæуй æма æфсæддон комиссарадти граждæнти хигъди æвæрунæн æма сæ исесунæн, уæдта электронон хунди игъосункæнуйнæгтæ граждæнтæбæл парахат кæнуни информацион хизæ. Хунди гæгъæдитæ, фиццаги хузæн, æрветдзæнæнцæ гæгъæдибæл дæр.

– Æфсадмæ ке байагурдтонцæ, уони фæндуй зонун, циуавæр æфсæддон зилдтæ, хузтæмæ æрвист цæудзæнæнцæ, уой. Аци фарстайæн æфсæддон комиссар равардта уæхæн дзуапп:

– Нæ республики æфсадмæ агурд ка ’рцудæй, етæ æрвист цæудзæнæнцæ Уæрæсей еугур регионтæмæ дæр, службæ кæндзæнæнцæ фестæг æфсæдти, уæлдæфон-космосон тухти æфсæддон хæйтти, Уæрæсей æфсæддон-денгизон хæйтти. Æ физикон æма моралон цæттæдзийнадæ бæрзонд кæмæн уа æма е ’нæнездзийнадæ кæмæн амона, еци 30 лæхъуæни ба сæ тугъдон ихæс æнхæст кæндзæнæнцæ уæлдæфон-десантон æфсæдти. Æфсæддон комиссарадтæбæл ма ихæс æвæрд ес, Национ гварди æма Æнæнгъæлæги цаути фæдбæл министради дæлхæйттæмæ æрветун.

Сæрмагонд æфсæддон операций архайунмæ, уæдта нæуæг зæнхитæмæ еу дæр си æрвист не ’рцæудзæнæй. Е æй Уæлдæр сæйраг командæгæнæги унаффæ æма цийфæндийæй дæр ихæлд не ’рцæудзæнæй, – балæдæрун кодта республики æфсæддон комиссар.

Медицинон æркасти, кæмæ фæдздзурдтонцæ æфсадмæ, еци гражданин е ’нæнездзийнади фæдбæл гæгъæдитæ ку æрбахæсса, кенæдта дохтири амундмæ гæсгæ сæйгæ ку разинна, уæд æй рарветдзæнæнцæ, æфсæддон комиссарадæ ци сæйгæдæнтти  номхигъд исфедар кодта, уоми дзæбæх кæнунмæ. Айдагъдæр уой  фæсте исбæрæг уй, бæззуй службæ кæнунмæ, æви нæ, е.

Комиссаради граждæнти æфсæддон службæмæ цæттæ кæнун æма фæдздзоруни хайади хецау, дæлболкъон Козати Батрадз:

– Æфсадмæ кæмæ фæдздзурдтонцæ, уомæн ес гæнæн æмгъуд рæстæгмæ раргъæвунæн. Еци хатдзæг искæнуй къамис, гражданин ци гæгъæдитæ ’рбахæссуй, уони хæццæ ку базонгæ уй,  уой фæсте. Ке раргъæвунцæ, уони дех кæнунцæ цалдæр къуаребæл: æнæнездзийнади уавæрмæ гæсгæ (анзи æмгъудмæ), бийнонти уавæрмæ гæсгæ (уати сæйгæмæ зелун, æ кæстæр хуæртæ æма æнсувæртæмæ зелун, æнæ мадæй сувæллон гъомбæл кæнуй, æртæ анзей уæнгæ  инвалид-сувæллон ин ес, дууæ, кенæ фулдæр сувæллæнтти фидæ ’й). Аци къуармæ хаунцæ пъæлиций, зингисервæзти нихмæ служби, ахæстдони, таможни, нацгвардий косгутæ цалинмæ бунати сæ ихæстæ æнхæст кæнонцæ, уæдмæ, уæдта цалинмæ аци ведомствити уæлдæр скъолати ахур кæнонцæ, уæдмæ. Служби æмгъудмæ хаст цæуй Уæрæсей Паддзахадон Думи, субъектти закъонæвæрунади æма муниципалон искондти депутаттæн. Астæуккаг æма профессион ахурадæ райсунæн дæр службæмæ цæуни æмгъуд раизолдæр кæнунцæ. Дæснийадæ райсуни фæсте уæлдæр скъола фæууни туххæй æфсадмæ цæуни æмгъуд æргъæвд нæ цæуй. Уæхæн барæ ма ес, æнæбари æ цæрæн бунæттæ ниууадзæг граждæнтæ æма АЙТИШНИКтæн.

Хайади хецау æрлæудтæй æфсæддон службæмæ кæнун ке не ’мбæлуй, еци граждæнтæбæл. Уонæмæ хаунцæ: е ’нæнездзийнадæ кæмæн нæ амонуй æфсæддон службæ ка кодта, кенæ кæнуй; альтернативон граждайнаг  службæ ка кодта, кенæ кæнуй, уæдта еугурдуйнеуон бадзурдмæ гæсгæ æндæр паддзахади ка службæ кодта, етæ. Æфсæддон службæй уæгъдæгонд цæунцæ паддзахадон наукон аттестаций ахургонди къæпхæн кæмæ ес, е ’фсæддон ихæс æнхæст кæнгæй, ка фæммард æй, уони фурттæ. Ахæстдони ка бадуй, уæдта тæрхонмæ ка æнгъæлмæ кæсуй, еци граждæнти дæр æфсадмæ нæ кæнунцæ.

Е ’ууæнкæдзийнадæ кæмæн нæ амонуй, Уæрæсей бунæттон минкъий адæмихатти минæвар ка æй, уонæн фадуат ес альтернативон службæ кæнунæн, фал е ’мгъуд 1,75 хатти фулдæр æй æма исхезуй 21 мæйей уæнгæ. Кæд æма сæ альтернативон службæ Уæрæсей æфсæддон тухти организацити цæуа, уæдта – 18 мæйи. Фæккарздæр æнцæ, æфсадмæ цæунæй æхе ка тиллеф кæнуй, уони æфхуæруни мадзæлттæ. Хунди гæгъæди райсгæй, æнæ рæуонæй комиссарадæмæ ка нæ фæззиннуй, етæ административон ивар дæс минемæй ба дæс æма инсæй мин сомей уæнгæ бафедунцæ. Æфсадмæ цæунбæл æхе ка фæттиллеф кæнуй, еци граждæнти Уæрæсей Уголовон кодексмæ гæсгæ бафхуæрунцæ 200 мин сомемæй сæ ивар кæнгæй, кенæ ба син раттунцæ дууæ анзи ахæстдони фæббадуни æмгъуд.

Паддзахадон граждайнаг æма муниципалон службæмæ косунмæ бацæунмæ æма царди бæрзонд æмвæзадæмæ  исхезунмæ ка тундзуй, уонæн æфсæддон цард кадгин æма æнæмæнгæгъæугæ рæстæг æй сæ царди. Федæни Фидибæстæ гъæуайгæнгутæн нæ зæрдæ зæгъуй æнæнездзийнадæ, фулдæр æууæнкæ сæхебæл æма æнтæстгинæй баслужбæ кæнун Райгурæн бæсти сæрбæлтау!