Аци анз нæ Цитгин Уæлахези бонбæл цуппаринсæй анзи ке ’нхæст кæнуй, уæдта анз æхуæдæг ба Уæрæсей нимад ке цæуй Фидибæстæ гъæуайгæнæги анзбæл, уой фæдбæл исфæлдистадон изæр «Акъоппити райгургæ æмдзæвгитæ» арæзт æрцудæй нæ республики Национ наукон киунугæдони, амудтонцæ ’й Цæгат Иристони адæмон поэттæ Гуржибегти Иринæ æма Наталья Куличенко.

Ес уæхæн игъустгонд загъд: «Дзармадзантæ ку фæннæрунцæ, уæд музитæ (гъома, аййевадон исфæлдистадæ) ба нигъгъос унцæ…» Е бустæги раст гъуди нæй. Устур Фидибæстон тугъд ку райдæдта, уæд, куд нæ бæсти исфæлдистадон косгутæ дзиллонæй, уотæ финсгутæй дæр хъæбæр беретæ сæ гебогътæ æма финсæн сестæй æмтох кодтонцæ сауæнгæ æ фæууни уæнгæ. Еунæг знаги дзармадзан дæр нæ бафæразта, уони нæргæ дзурд басабур кæнун. Е нæ, фал ма тугъди рæстæгути финсæги фæдздзурдмæ куд æригъосиуонцæ дзиллитæ, уотæ некæд адтæй.

Тугъди фиццаг бонтæй фæстæмæ мингай финсгутæ, куд æфсæддон хæйтти командиртæ, политразамонгутæ æма æфсæддон уацхæсгутæ, æрвист æрцудæнцæ тугъди цæхæрмæ.  Тугъдон финсгутæ æдæрсгæй цудæнцæ тохи циренмæ, тугъд ку фæссабур уидæ, уæдта финстонцæ гæгъæдий гæппæлтæбæл сæ уадзимистæ.

Национ киунугæдони ци исфæлдистадон мадзал арæзт æрцудæй, уоми каст цудæнцæ айдагъ уруссаг поэтти нæ, фал, не ’мзæнхон финсгутæй тугъди ка архайдта, уони æмдзæвгитæ дæр. Бакастæнцæ сæ Ольгæ Резник, Николай Коломыц, Нанити Розæ. Мадта уой хæццæ ба ма си райгъустæнцæ еци æмдзæвгитæй кæцидæртæбæл финст зартæ дæр. Цæгат æма Хонсар Иристони адæмон артист Даурати Эдуарди хæццæ сæ æмзард кодтонцæ зали еугур бадгутæ дæр. Ами ма райгъустæнцæ Афгани тугъди архайгути финст зартæ дæр.

Мадзали архайæг адæм еугурæй дæр хъæбæр бозæй байзадæнцæ æ аразгутæй. Е уой æвдесæн æй, æма нæ адæмæн, алли кари фæлтæртæн абони дæр куд хъазар æнцæ евгъуди цаутæ, уони æвдесæг аййевадон, бæлвурдæй ба поэтикон уадзимистæ.