Цæгат Иристони Сæргълæууæг Сергей Меняйлойæн 3 декабри адтæй «комкоммæ бастдзийнадæ» Цæгат Иристони цæргути хæццæ. Телеканал «Осетия-Иристон»-и комкоммæ эфири республики Сæргълæууæг лæмбунæг æма берæвæрсуг дзуæппитæ лæвардта региони цæргути берæ фарстатæн. Республики разамонæгæн адæми хæццæ уæхæн фембæлд арæзт æрцудæй нур фæндзæймаг хатт.

Дæлдæр мухур кæнæн, «комкоммæ бастдзийнади лини»-йи дзубанди ци ахсгиаг фарстатæбæл рауадæй, уобæл цубургонд рафæлгæст.

ЦÆРÆНУÆТТÆ ÆМА РЕГИОНИ КОМПЛЕКСОН РАЙРÆЗТ

«Комкоммæ бастдзийнади лини»-йи фарстатæй еу баст адтæй сæрмагонд æфсæддон операций архайгутæн цæрæнуæттæ дæттуни хæццæ.

Республики Сæргълæууæг куд фегъосун кодта, уотемæй адæми аци къуари минæвæрттæн берæфадуатгин цæрæнуæттæ дæттуни нисани хæццæ федаргонд æрцудæй сæрмагонд республикон программæ. Куд нисангонд цæуй, уотемæй уой фæлгæти фиццаг цæрæнуатон комплекс аразун райдайдзæнæнцæ Ногири гъæумæ хæстæг. Фæстæдæр уæхæн комплекстæ фæззиндзæнæнцæ Цæгат Иристони еугур районти дæр.

– Сæрмагонд æфсæддон операций архайгутæ æма адæми æндæр къуæрттæн уодзæнæй асландæр аргъæй хе хæдзарæ (зæнхи хаййи хæццæ) балхæнуни фадуат. Æ фæзуат 75-95 квадратон метри кæмæн уа, еци хæдзари аргъ тæккæ фулдæр уодзæнæй 6,5 миллион сомей бæрцæ. Уой хæццæ, сæрмагонд æфсæддон операций архайгутæн уæхæн хæдзæрттæ балхæнунæн фæййагъаз уодзæнæй цæрæнуатон субсиди республикон бюджетæй фæйнæ 2 миллион сомей бæрцæй.

Адæми фарстатти еу хай баст адтæй проект «Долина Симд»-и хæццæ  дæр.

– «Долина Симд» æй региони идарддæри комплексон райрæзти ахедгæдæр проекттæй еу. Амунд проекти сæйраг хецæндзийнадæ е æй, æма цæрæнуæтти хæццæ еци-еу рæстæг арæзт цæудзæнæй еугур гъæугæ иннæ социалон инфраструктурæ дæр. Республики нæуæг фæзуæтти идарддæри райрæзтбæл лæмбунæг бакосун гъæуй, æма еци архайд цæудзæнæй комплексон уагæбæл. Ракæсайтæ: хæдзæрттæ – берæ, квадратон метртæ дæр уотæ… Фал сæ фарсмæ нæдæр скъолатæ æма рæвдауæндæнттæ ес, нæдæр æндæр социалон объекттæ. Комплексон райрæзти проекттæбæл косгæй, еци аййеппитæн бунат нæбал уодзæнæй, – бафеппайдта Сергей Меняйло.

ТРАНЗИТОН ХУÆДТОЛГИТÆ – АЙДАГЪДÆР САХАРТИ ЕУВÆРСТИ

Дзæуæгигъæуи цæргутæй  еуей фарстайæн дзуапп дæтгæй, республики разамонæг лæмбунæг æрлæудтæй, транзитон транспорти змæлд фæннивæбæлдæр кæнунбæл куст куд цæуй, уобæл.

Куд зонæн, уотемæй фæстаг рæстæг федералон нæдтæмæ хæстæг цалдæр рауæнеми фæззиндтæнцæ транзитон транспортæн рæстæгмæ æрлæууæн бунæттæ. Фал Сергей Меняйлой гъудимæ гæсгæ, етæ фагæ нæ ’нцæ.

– Уæрæсей транспорти Министради хæццæ бадзубанди кодтан, транзитон транспортæн уæхæн æрлæууæн бунæттæ ке фæффулдæр уодзæнæнцæ, уобæл. Еугур транзитон транспорт дæр гъæуама цæуа сахартæ æма иннæ цæрæнбунæтти еувæрсти – уæхæн фæткæ æ тухи бацæудзæнæй 2030 анзи уæнгæ. Уæдмæ ба бал гæнæн æма амалæй архайд цæудзæнæй, цæмæй уæззау транзитон транспорт минкъийдæр тухстдзийнæдтæ æвзарун кæна нæ сахартæ æма гъæути цæргутæн, – зæрдæ байвардта региони разамонæг.

ÆХСÆНАДОН ТРАНСПОРТИ ЛÆГГÆДТÆ

Адæми фарстати еу хай баст адтæй æхсæнадон транспорти кусти къулумпидзийнæдти хæццæ, бæлццæнттæ ласæн архайд фæххуæздæр кæнуни хæццæ.

Уонæбæл дзоргæй Сергей Меняйло Транспорти республикон комитети разамундæн баихæс кодта, цæмæй рагъуди кæна Дзæуæгигъæуи Доватори проспектбæл (Барбашови гъæунгæй Цоколай-фурти гъæунги уæнгæ), уæдта æндæр бунæтти нæуæг маршруттæ рауадзунбæл. Уомæй уæлдай, комитетæн амунд æрцудæй, цæмæй аргъгонд æрцæуа, Дзæуæгигъæуæй Беслæни аэропортмæ ци маршрут косуй, е цæйбæрцæбæл пайдайаг æй, уомæн.

– Лæмбунæг æркæсетæ, сахарæй аэропортмæ цæуæг автобусæй бæлццæттæ куд пайда кæнунцæ, уомæ. Уавæр кæми домуй, еци маршруттæбæл фæффулдæр кæнетæ автобусти нимæдзæ, – бафæдзахста Цæгат Иристони Сæргълæууæг.

Æхсæнадон транспорти лæггæдтæ фæннивæбæлдæр кæнуни туххæй Сергей Меняйло профилон ведомствити разамонгутæн равардта æндæр амунддзийнæдтæ дæр.

ÆНÆНЕЗДЗИЙНАДÆ ГЪÆУАЙКÆНУЙНАДИ ФАРСТАТÆ

Æнæнездзийнадæ гъæуайкæнуйнади инфраструктури объектти уавæрбæл дзоргæй, Сергей Меняйло куд фæббæрæг кодта, уотемæй Уæллаг Фиййагдони пульмонологон центри нæуæг бæстихаййи арæзтадæ райдайдзæнæй федæни анзи.

– Уæрæсей Президенти хæццæ фембæлдтитæй еуеми Фиййагдони пульмонологон центри райарæзти туххæй фарста исæвардтон. Æма нур нæ къохи бафтудæй еци фарста бони фæткæмæ рахæссун. Центри модернизаций проекти техникон ихæслæвæрди нимад æрцудæнцæ еугур нуриккон домæнтæ дæр, цæмæй исонибони косæндонæ уа санитарон домæнти аккаг (зæгъæн, нуртæккæ си кæдзосгæнæн-канализацион ефтонггæрзтæ дæр нæййес), – радзурдта Сергей Меняйло.

Центри нæуæг бæстихаййи арæзтади рæстæгмæ агъазгъæуагæ адæмæн пульмонологон лæггæдтæ кæндзæнæнцæ фæсевæдон центр «Барс»-и (е дæр æй Фиййагдони).

Республики Сæргълæууæг сæрмагондæй æрлæудтæй медицинон косæндæнттæ æма сæйгити льготон къуæрттæн хуастæ æлхæнуни гъуддагбæл. Региони разамонæг Æнæнездзийнадæ гъæуайкæнуйнади министрадæн баихæс кодта, цæмæй гъæугæ хуастæ æлхæнуни фæдбæл базарадон процедуритæ æнхæстгонд цæуонцæ рагацау. Уой фæрци гъæугæ хуастæ республикæмæ ласуни гъуддаги къулумпитæ нæ уодзæнæй.

СÆ ИРИСХЪÆ ÆБÆРÆГÆЙ НÆ БАЙЗАЙДЗÆНÆЙ

2025 анзи Дзæуæгигъæуи байгон æй, сæрмагонд æфсæддон операций тæлми æбæрæгæй ка фесавдæй, еци тугъдонти ирисхъæ рабæрæг кæнуни фарстатæбæл косæг центр.

Еци структури сæ хъауритæ æрбангом кодтонцæ Цæгат Иристони æфсæддон комиссарадæ æма бархеуон фæдагорæн къуар «Своих не бросаем»-и минæвæрттæ. Етæ сæ вазуггин архайд æнхæст кæнунцæ Цæгат Иристони Сæргълæууæг æма Хецауади Администраций, федералон фонд «Фидибæстæ гъæуайгæнгутæ»-йи регионалон хайадæ, Уæрæсей Федераций гъæуайкæнуйнади Министради æфсæддон дæлхайæдтæ æма æндæр профилон структурити хæццæ æнгом æмгустади фæрци.

– Исæвзургæ уавæрти сæйрагдæр æй, цæмæй æбæрæгæй исæфт тугъдонти ирисхъи туххæй раст хабæрттæ хъæртун кæнонцæ сæ бийнонтæ æма хеуæнттæмæ. Нуриуæнгæ уæхæн архайдбæл хуæст адтæнцæ цалдæр хецæн къуари, фал нур еци вазуггин куст уодзæнæй еу структури бæрни, – бафеппайдта Сергей Меняйло.

*  *  *

«Комкоммæ бастдзийнади лини» ку цудæй, уæдмæ ма еугур фарстатæ æма курдиæдтæбæл бафтудæй 1,5 миней бæрцæ. Етæ баст адтæнцæ ахурадæ æма æндæр къабæзти райрæзти хæццæ, цæрæнуатон-коммуналон хæдзаради нивæбæлади хæццæ, сахартæ æма гъæути фæлгонцади хæццæ, нæдти цалцæг æма аллибони царди æндæр ахсгиаг фарстати хæццæ. Равдисти рæстæг бунат ци фарстатæн нæ разиндтæй, етæ æрвист æрцæудзæнæнцæ хецаудзийнади республикон æма муниципалон оргæнтæмæ, цæмæй алли тухстаг фарстатæ æма курдиæдтæбæл дæр идарддæр куст æрцæуа.

Æрмæг бацæттæ кодта ХЕКЪИЛАТИ Маринæ