Цæгат Иристони Сæргълæууæг Сергей Меняйло Пятигорски информацион агентадæ «ТАСС Кавказ»-и фембалдæй дзиллон хабархæссæг фæрæзнити минæвæртти хæццæ. Æма сæ бæлвурдæй базонгæ кодта нæ республики абони цардарæзти ахсгиагдæр цаутæ æма хабæртти хæццæ, уæдта радзурдта, идарддæр дæр социалон-экономикон æма культурон къабæзти куст ци фарстати фæдбæл цæуй æма цæудзæнæй, уой туххæй дæр.

Æ радзубанди ци берæ аллихузон гъуддæгути фæдбæл адтæй, уонæй еу – фæлладуадзæн хуæнхон лыжитæй бурæн курорт «Мамисон». Æма куд фегъосун кодта, уотемæй е байгон уодзæнæй нисангонд æмгъудмæ гæсгæ. Нерæнгæ бал си æвзарунцæ бальнеологон рахуæцæнтæ, е фадуат ратдзæнæй курортæн анзи дæргъи косунæн.

Гъæууонхæдзарадон продукций рауагъдадæ республики фæффулдæр æй. Кæд æма 2021 анзи еумæйаг базарадæн исæхгæдтонцæ æ 15 проценти, уæд 2024 анзи ба – 20 проценти. Кустуат  «Казачий хутор»-и фæзуат фæппарахатдæр æй, æма, зæгъæн, фарæ æрæмбурд кодта кæрдтути дзæбæх тиллæг. «Гъаруат Алани»-й исаразунæн харзгонд æрцудæй 18,5 миллиард соми, етæ ’нцæ хецæн адæймæгути инвестицитæ. Аци кустуат исаразгути зæрди ес аллихузи пъамидортæ 25 мин тонни райсун.

Еума æхцæуæн гъуддаг – Цæгат Иристони скъолатæ цалцæггонд куд æрцудæнцæ, уомæй республикæ æй нæ бæсти хуæздæр дæс регионей æхсæн. Уомæй уæлдай, январи федаргонд æрцудæй 26 рæвдауæндони, цалцæг сæ кæндзæнæнцæ кезугай. Аци анз республикæ бавналдзæнæй поликлиникитæ цалцæг кæнунмæ, агъазиау инвестицион проект – терминал «Wildberries»  аразунмæ. Уой фæдбæл харзгонд æрцæудзæнæй 12 миллиард соми. Фæззиндзæнæй нæмæ нæуæг 8,5 мин косæн бунати.

Сагъæссаг фарстатæй еу æй стадион «Спартак»-и уавæр. Æма республики разамонæг куд фегъосун кодта, уотемæй нерæнгæ бал  цæттæ ’й 98 процентей уæнгæ, кæронмæ рахъæртун æй нæ уадзуй бонигъæди рахастдзийнадæ. Инвестор си байвардта 400 миллион соми, футболон клуб «Алани» æнæ ’хцайæй нæ байзайдзæнæй.

Аци анз нæ адæмæн уæлдай ахсгиаг æй уомæй, æма бæрæг кæндзинан нæ Цитгин Уæлахези 80 анзей бæрæгбон. Республикæ разæнгардæй цæттæ кæнуй уой кадгинæй исбæрæг кæнунмæ. 9 маймæ гъæугæ хузи зилд æрцæудзæнæй еугур мемориалтæ, номерæнтæ, циртдзæвæнтæмæ. Комкоммæ уагæй рацæудзæнæй дзиллон мадзал «Æнæмæлгæ полк», уой хæццæ ба ма акци «Сæ цæсгæнттæмæ син бакæсæ»-йæн лæвæрд æрцæудзæнæнцæ региони еугур рекламон фæйнæгутæ. Уоми исæвæрдзæнæнцæ Устур Фидибæстон тугъди архайгути къартæ.

Æ пресс-конференций рæстæг ма Сергей Меняйло лæмбунæг дзуæппитæ равардта берæ аллихузон фарстатæн, æма уони туххæй ба дзубанди кæндзинан нæ газети хецæн æрмæгути.

Аци æрмæг цæттæгонд æй Цæгат Иристони Сæргълæууæг æма Хецауади пресс-служби игъосункæнуйнагмæ гæсгæ