Бæргæ ’й зонæн, цидæр гъуддаги фæдбæл еу хатт ку зæгъай дæ зæгъуйнæгтæ, уæд бабæй уобæл нæуæгæй дзорун бустæги раст нæй. Фал дæ зæгъуйнæгтæ еугурадæмон ахсгиаг фарстай фæдбæл уогæй дæ игъосæг ку нæ уа, кенæ ба игъосгæ дæ фæккæнгæй лæдæрæг ку нæ уа, уæд бабæй дæ сагъæссæгтæ куд нæ дзордзæнæ!..

Махмæ, республикон газет «Дигори» редакций косгутæ, æма нæ цæстуарзон æрдхуæрдтæмæ дæр уæхæн зæгъуйнæгтæ æгæр дæр ма исберæ ’нцæ. Уой дæр уомæ гæсгæ, æма нæ хъæбæр сагъæссагæй тухсун кæнуй нæ еунæг дигорон газети карнæ ци тæссаг уавæри æй, е. Еци уавæр ба нæмæ уæлæрвтæй æнай-æнойти не ’рхаудтæй, уæдта нæмæ кæцæйдæр еуварсæй дæр не ’рбафтудæй, мадта нæ æдзæстуарзонти фудæй æй, зæгъгæ, зæгъун дæр нæ бон нæй.

Еци сагъæссаг уавæр ба исæвзурдæй фиццагидæр уой фудæй, æма нæхуæдтæ, нæ Дигори дзиллæ цийфæнди цæстингасæй ке кæсæн нæ газет «Дигорæ»-мæ, нæхуæдтæ ибæл устурзæрдæ ке ан. Кæд æма уой рафинсун æма кæсун нæ еугурей ихæс æй, æма уой фæдбæл дзоргутæ нæмæ æгæр берæ дæр ма ’нцæ, уæддæр æй беретæ ба не ’нхæст кæнунцæ. Гъе уомæ гæсгæ бабæй абони сумахмæ дзорæн, нæ Дигори дзиллæ. Уой дæр – нæ фуртухст æма фурзинæй!..

Хъæбæр рагæй дæр, фæлтæрæй-фæлтæрмæ нæ адæм цæмæ бæлдтæнцæ, гъома, куд нæмæ уонцæ дигорон æвзагбæл мухури фæрæзнитæ, еци ахсгиаг гъуддаг кæдæй-уæдæй арæзт ку æрцудæй, дигорон газет «Дигорæ» æма журнал «Ирæф» нæмæ ку фæззиндтæнцæ, уæд еци фарни гъуддаг исаразгутæмæ уотæ кастæй, æма нæ дзиллæ сæ фарсмæ æмхузонæй æрбалæудзæнæнцæ, уодихуаси хузæн син хъазар уодзæнæнцæ нæ дигорон мухури фæрæзнитæ. Фал… Фæффудевгед æнцæ сæ еци бæлдæй… Нур цал æма цал анзей дæргъи еци дзорæги дзорæн, цæмæй сæ фулдæр адæм рафинсонцæ æма кæсонцæ, уæддæр, ка сæ рафинсуй, уони нимæдзæ аллайаги минкъий рауайуй. Ацал-ауал анзей дæргъи, зæгъæн, газет «Дигорæ» сæхе зæрдтæй рафинсунцæ æдеугурæй… 150-200 адæймаги.

Мадта абони дæр уавæр хуæздæр нæй. Иннæ анзи фиццаг æмбесæн газет «Дигорæ» нерæнгæ рафинстонцæ… 97 адæймаги.

Аци нимæдзæмæ гæсгæ куд нæ ниддес кæндзæнæ: гæрр, нæ маддæлон æвзаг Дигори дзиллæй уал адæймагемæй æндæр неке гъæуй?..

Хуарз æма еудадзугдæр нæ фарсмæ æрбалæуунцæ æма нин газет рафинсуни рæстæг хъæбæр фæййагъаз кæнунцæ нæ еузæрдиуон агъазгæнгутæ. Етæ сæ рæстуодæй бавдесунцæ, еуемæй, сæ лæгдзийнадæ цæйбæрцæбæл бæрзонд æй, уой, иннемæй ба нæ маддæлон æвзагæн æцæгæйдæр син мади хузæн хъазар æма уарзон ке æй, зæрдиагæй ке архайунцæ бæлвурд гъуддагæй æ багъæуай кæнун æма райарæзтбæл, уой.

Аци уавæр – кæци æй æдзæллаг, зæгъгæ, æндæр неци хузи исхондзæнæ, адæймаги!.. – айдагъ зæрдмæгур нæ кæнуй, фал ма æй берæ сагъæсти бафтауй. Зæгъæн, мæнæн мæхецæн дæр æма ма нæ редакций косгутæй еугуремæн дæр ес берæ хæстæгутæ æма зонгитæ, сæ алли гъуддаги дæр син гъæугæ æгъдау дæттæн. Еу загъдæй, нимайæн сæ. Етæ ба? Айдагъ нæ еци хæстæгутæ æма зонгитæ æмхузонæй ку рафинсиуонцæ нæ газет, уæд æ тираж кæмити æма кæмити исуидæ!..

Лæдæрæн æй, зин рæстæгутæ æркодтонцæ, адæми гæнæнтæ бустæги искадавар æнцæ, æхцайæй сæмæ ци æрбафтуйуй, етæ син хаттæй-хатт сæ царди æнæмæнгæ гъæугæ гъуддæгути фагæ дæр нæ фæуунцæ. Ка ’й зонуй, уавæр исонибони фæххуæздæр уодзæнæй æма адæми равгитæ дæр фæррæвдзæдæр уодзæнæнцæ. Фал уой хæццæ ба ма ес уæхæн тæссагдзийнадæ дæр, æма уæдмæ нин нæ еунæг дигорон газет æ ниллæг тиражмæ гæсгæ ку нихгæнонцæ. Баууæндетæ, еци бæлах ку æрцæуа, уæд нæ газет нæуæгæй «райгас» кæнун хъæбæр зин исуодзæнæй, мадта уомæй дæр тæссаг æй, æма игон дæр æй нæбал ракæндзæнæнцæ æма æ кой фесæфдзæнæй æностæмæ…

Нæ аци фæдздзурд ка кæсуй, етæ, лæдæрæн æй, есунцæ газет «Дигорæ». Æма син зæрдиагæй арфæ кæнæн, нæ фарсмæ ке ’нцæ, уой фæдбæл. Уой хæццæ ба ма си корæн, æма алкедæр æ хеуæнттæн, æ синхæгтæн, е ’мкосгутæн нæ еци фæдздзурд бакæсун кæнæд. Кæдимайди ба уонæмæ дæр багъаридæ нæ катай, æма нæ дзиллæ æмхузонæй рафинсиуонцæ газет «ДИГОРÆ».

Еу загъдæй, еумæйагæй байархайæн, цæмæй нæ еунæг дигорон газет исуа æцæгæй еугурадæмон æма уой фæрци ба æностæмæ дæр цардгъон!..

Газет «Дигорæ»-йи редакци