Республикон эндокринологон диспансери рази идарддæр æ куст кæнуй «Диабети скъола». Еци рохситауæн проекти фæлгæти диспансери специалисттæ лекцитæ бакæсунцæ æма æндæр фембæлдтитæ исаразунцæ, сæкæрнез кæмæ фæззиннуй, еци адæмæн.

Цæгат Иристони Æнæнедзийнадæ гъæуайкæнуйнади министради пресс-служби куд радзурдтонцæ, уотемæй «Диабети скъола»-й архайди программæ ахедгæ æма берæвæрсуг æй – диспансери специалисттæ агъазгъæуагæ адæмæн лæмбунæг радзурдтонцæ сæкæрнези хецæндзийнæдти, нез куд æма цæй туххæй фæззиннуй, тоги глюкози æмвæзадæмæ циуавæр цæстдард гъæуй æма æндæр уæхæн гъуддæгути туххæй. Сæрмагонд æргом здæхт цæуй диабети профилактики мадзæлттæ æма амунд незихатт фæккарздæр кæнуни æууæлтæ ма ’руадзуни фарстатæмæ дæр. Ке зæгъун æй гъæуй, лекторий архайгутæн фæууй сæ берæ фарстатæ дохтиртæмæ раттуни фадуат дæр.

Эндокринологон диспансери минæвари дзубандимæ гæсгæ, 2024 анзи «Диабети скъола»-й лекцитæ æма ахуртæ бабæрæг кодтонцæ 2 мин адæймагей бæрцæ (уонæй 43-сувæллæнттæ).

Сæрмагондæй зæгъун гъæуй, «Диабети скъола»-й къæбинеттæ районти центрти медицинон косæндæнтти бундорбæл дæр ке  архайунцæ, уой.

Рохситауæн проект «Диабети скъола»-й сæйрагдæр нисантæ ’нцæ сæйгæ æма диабетмæ æмхец адæмæн незихатти туххæй фулдæр зонундзийнæдтæ раттун, сæйгитæмæ аци карз нези низмæ тохмæ турнундзийнадæ игурун кæнун, дзæбæхгæнæг-профилактикон архайди ахедундзийнадæ бæрзонддæр кæнун.