Рæхги, ноябри кæрони Мæскуй облæсти æ куст райдайдзæнæй æхсæзæймаг Æхсæндуйнеуон форум «Дигорæ». Куд амæй размæ æнзти, уотæ бабæй нур дæр мадзалмæ æрбамбурд уодзæнæнцæ æхсæнадон-политикон æма социалон-гуманитарон къабæзти æнтæстгинæй ка архайуй, еци æригон ахургæндтæ, эксперттæ, политологтæ, æндæр специалисттæ.

Форум «Дигорæ»-йæн бундор æвæрд æрцудæй 2019 анзи. Уæд фиццаг уæхæн æмбурд арæзт æрцудæй Цæгат Иристони, Уæллаг Фиййагдони. Еци зонадон-практикон мадзали архайгутæ адтæнцæ, социалон-гуманитарон нисанеуæги дæсниæдтæбæл ка ахур кодта, еци студенттæ, уæдта æхсæнадон-политикон къабази архайæг æригон специалисттæ.

Дуккаг форум исаразтонцæ, æ номæн ин ке равзурстонцæ, еци хуæнхон Дигори. Уæд æмбурди программæ зингæ фæуурухдæр æй: косун си райдæдтонцæ фæсевæдон наукон-æртасæн лабораторитæ, авторон къуæрттæ форуми бавдистонцæ цæмæдесаг æма ахедгæ технологон-коммуникацион проекттæ… Фæстæдæр нисангонд æрцудæй сæрмагонд преми «Дигорæ» дæр (лæвæрд цæуй, æхсæнадон-политикон æма социалон-гуманитарон къабæзти ахсгиаг проекттæ ка æнхæст кæнуй, еци политологтæ æма иннæ специалисттæн). Анзæй-анзмæ зингæ ирæзуй мадзали архайгути нимæдзæ, уæдта æ географи дæр.

Уотемæй форум идард ракъахдзæф кодта Иристони арæнтæй – фæстаг æнзти æй исаразтонцæ сахартæ Нижний Новгород æма  Сочий.

Аци анзи форум ба цæудзæнæй Мæскуй облæсти, разамунди управлени «Сенеж»-и æрмадзти. «Дигорæ» бацæттæ кæнунбæл  косунцæ социалон æртæстити экспертон Институт æма фæсевæди гъуддæгути фæдбæл Федералон агентади минæвæрттæ. Берæ æригон политологтæ æма æндæр специалисттæ курдиæдтæ балæвардтонцæ форуми архайгутæ исуни фæдбæл. Уой хæццæ ба ма æригон специалистти къуæрттæ сæ проекттæ балæвардтонцæ сæрмагонд къамиси тæрхонмæ… Форуми цæттæгæнæг комитет куд игъосун кæнуй, уотемæй аци анз преми «Дигорæ» лæвæрд цæудзæнæй æртæ номинациеми: «Политикон æртæститæ», «Политикон технологитæ» æма «Политикон коммуникацитæ».