Фæлварæ сæрди Еугонд «Мæскуй равдистити залтæ»-йи галерейæ «Тушино»-й не ’мзæнхон зундгонд скульптор Цæрикъати Биларæн æма хузæгæнæг Санати Ибрагимæн ци равдист арæзт æрцудæй, уой ка бабæрæг кодта, уони еумæйаг гъуди адтæй: сæ аййевадæ дести æфтауй, сæ куститæмæ син ка кæсуй, уони зæрдити æвзурун кæнунцæ рохс зæрдиуагæ, хуæрзуагон сагъæстæ æма гъудитæ.

Æцæгæйдæр уобæл баууæндуни равгæ ба нæ республики аййевадæ уарзгутæн фæззиндтæй – авдисæри, 16 мартъий Дзæуæгигъæуи Цæгат Иристони хузæгæнгути Цæдеси равдистити зали кадгин уавæри игонгонд æрцæудзæнæй Цæрикъати Билари æма Санати Ибрагими еумæйаг равдист, хуннуй «Путь воображаемого». Кæд сæ дууæ дæр Мæскуй цæрунцæ æма косунцæ, уæддæр сæ бастдзийнæдтæ сæ фидиуæзæги хæццæ федар æнцæ, сæ исфæлдистадæ ами дæр комкоммæ хуарз зундгонд æй. Фал син ауæхæн равдист ба сæ дууемæн дæр фиццаг хатт арæзт цæуй.

Цæрикъати Билар райгурдæй Цæгат Иристони Чиколай 1955 анзи. Каст фæцæй Дзæуæгигъæуи аййевæдти училище, 1990 анзи ба Мæскуй В.И. Сурикови номбæл паддзахадон аййевадон институт. Ахур кодта профессор П.И. Бондаревмæ. Архайдта берæ аллихузон равдистити æма симпозиумти.

Цæрикъати Билари исфæлдистадæн бæрзонд аргъгонд цæуй, исаккаг ин кодтонцæ Уæрæсей аййевæдти академий сугъзæрийнæ майдан, 2013 анзи иссæй сахар Мæскуй дизайнерти исфæлдистадон цæдеси юбилейон Æхсæндуйнеуон равдист-конкурси лауреат (номинаци «Скульптурæ»).

Æ куститæ ин фæууинæн ес, куд Уæрæсей, уотæ фæсарæйнаг паддзахæдти берæ музейти, уони хæццæ ба Третьякови Паддзахадон галерейи, æнцæ хецæн адæймæгути коллекцити Уæрæсей дæр æма фæсарæнти дæр.

Цæрикъати Билар нимад цæуй нуриккон скульпторти тæккæ искурдиадæгиндæртæй еуебæл. Æ куститæ ин æрæвæрæн ес, айдагъ Уæрæсей нæ, фал дуйнеуон устурдæр æнтæстити æмвæзадæмæ ка исхизтæй, уони æмрæнгъæ. Æй Мæскуй скульпторти секций иуонг, Мæскуй скульпторти Æхсæнади иуонг. Биларæн аци равдисти фæууинæн ес е ’сконд скульптурон куститæй инсæйемæй фулдæр. Сæ еугурдæр конд æнцæ бронзæй. Æ скульптуритæ ’нцæ хевæрцон, неке хæццæ син ес феййевдзигæнæн.

Санати Ибрагим райгурдæй 1954 анзи Дагестани, гъæу Андалалыйи. Ахур кодта аййевадон скъолай, 1983 анзи ба каст фæцæй Цæгат-Иристойнаг аййевадон училище, фæстæдæр (1984 анзи) ахур кодта Ленингради И.Е.Репини номбæл хузæкæнунади, архитектури æма скульптури Институти, уæдта æ ахури гъуддаг идарддæр (1987-1989 æнзти) æнхæст кодта В.И.Сурикови номбæл хузæгæнгути институти. 1999 анзæй фæстæмæ æй Мæскуй хузæгæнгути Цæдеси иуонг. Архайдта куд Уæрæсей, уотæ фæсарæйнаг бæстити аййевадон равдиститæй беретæми дæр.

Санати Ибрагим æ кустити аййевадон фæрæзнити фæрци æвдесуй, дуйней исконди æма адæми цардарæзти ци æма куд балæдæрдтæй, уой æма æ еци «раргомдзийнæдтæ». Алфамбулай æрдзæ, алли хецæн цаути хæццæ фæззелæнтæ – неци евгъуйуй хузæгæнæги цæстингасæй, алцæмæ дæр къæрцгъос уогæй, ахæссуй дуйней æнæнгъæлти фæззиндтитæ æма сосæгдзийнæдтæ. Æма е ’сфæлдистадæ уæхæн цæстрæвдаугæ уомæн æй.

Санай-фурт – дуйне, æрдзæ æцæгæй куд æй, уотæ хумæтæги хузи æй не ’вдесуй, фал нин нæхе дæр хонуй е ’ргъудигонд дуйнемæ. Бауæргъæдæ æма æнкъарæнтæ кæми исеу унцæ, æ еци дуйне æй райдзаст, æцæгхуз. Хузæгæнæги æрмдзæф æй арф гъудитæбæл æфтауæг, сагъæссаг тематикæ, цидæр æнахур тухæ хæссунцæ сæ медæги…

Цæрикъати Билари æма Санати Ибрагими исфæлдистади алæмæтдзийнадæ уи цæмæй баруагæс уа, уомæ гæсгæ ба син æнæмæнгæ бабæрæг кæнетæ сæ еумæйаг равдист. Федарæй уæ æууæндун кæнæн уобæл, æма хъæбæр агъазиау æхцæуæндзийнадæ исараздзинайтæ уæхецæн!..

ХЕКЪИЛАТИ Маринæ