ГУГКАТИ Чермени конд хузæ «Таурæхъ».

Ес уæхæн загъд: «Евгъуд кæмæн нæййес, уомæн исонибон дæр нæййес!..» Е раст æй. Æма ка куд зундгиндæр æй, уотæ евгъуд рæстæгути уæзгæдзийнадæ лæмбунæгæй рартасуй æма си хуарздзийнадæй ци фæууй, уонæй рæстмæ испайда кæнуй. Уотæ ба уæд уодзæнæй, æма еци рæстæгути æцæгдзийнадæ зонунгъон ку уæн, айдагъдæр уæд».

Уой лæдæргæй, фæстаг рæстæгути фулдæр æргом æздæхт цæуй историон зонундзийнадæ парахатдæр кæнуни гъуддагмæ. Уæлдайдæр ба – ирæзгæ фæлтæрти уобæл æхцул кæнунмæ. Уомæ гæсгæ, ахурдзау фæсевæди ’хсæн ци Еугуруæрæсеуон олимпиадитæ арæзт цæуй, уонæй еу æй историбæл. Уоми фæййархайунцæ нæ республики минæвæрттæ дæр, бавдесунцæ си хуарз зонундзийнæдтæ. Е æхцæуæн æй. Никки æхцæуæндæр ба ма е æй, æма историбæл аци анзи кæронбæттæни мадзæлттæ æрæги (3-10 апърели) арæзт æрцудæнцæ махмæ, Цæгат Иристони. Уонæми архайунмæ нæмæ 350 ахурдзауи æма сæ хæццæ, разамунд син ка дæттуй, уæхæн 150 ахургæнæги нæ бæсти алли регионтæй æрбацудæнцæ.

Мадзæлтти райдайæни игонгæнæн æмбурди архайдта нæ республики разамонæг æма æ радзубандий баханхæ кодта:

– Уæрæсей берæ адæмихæттитæ цæруй, кæрæдзей нимайгæй æма лæдæргæй. Гъе уомæй мах тухгиндæр ан. Аллихузон культуритæ нæ еумæ бæттунцæ. Сумах, нæ кæстæртæ, айтæ нæ бæсти федæн, сумах ин аразетæ æ истори. Махæн ес, берæ æности сæрти нæмæ ка æрхъæрттæй, уæхæн гъæздуг истори æма традицитæ, æма сæ гъæуама мах дæр багъæуай кæнæн, нæ фидтæлтæ сæ куд багъæуай кодтонцæ, уотæ. Истори æнцон наукæ нæй, фал ин бантæсæд берæ фæлварæнти сæрти бахезун. Уæлдай æхцæуæндæр ба е æй, æма аци олимпиади уæлахездзаутæн сæ бон уодзæнæй æнæ фæлварæнтæй ахур кæнунмæ бацæун нæ бæсти цийфæнди уæлдæр ахургæнæндонæмæ.

Еу хатт ма уин уæ зæрдæбæл æрлæуун кæндзинан: олимпиади уæлахездзаутæ æма дипломтæ ка райса, еци ахурдзаутæн цуппар анзей дæргъи барæ уодзæнæй Уæрæсей раззагдæр университеттæ æма институттæмæ сæ профильмæ гæсгæ æнæ фæлварæнтæй бацæунæн.

Олимпиади архайгути номбæл Уæрæсей рохсади министр Сергей Кравцов исæрвиста арфи финстæг, кæцими син зæрдиагæй райарфæ кодта: «Хъазар архайгутæ æма иуазгутæ! Уæрæсей Рохсади министради номæй уин арфæ кæнун, скъоладзаути Еугуруæрæсеуон олимпиади кæронбæттæни ке архайетæ, уой фæдбæл. Е ахсгиаг къæпхæн æй уæ ахури надбæл. Сумах абони ами айтæ уæ хъаурити фæрци. Уæ зонундзийнæдтæ историмæ уарзондзийнадæ, нæуæгдзийнæдтæ базонунмæ тундзундзийнадæ мах разæнгард кæнунцæ, цæмæй идарддæр дæр фæсевæди ителлектуалон гъомуси ирæзтæн мадзæлттæ аразæн. Аци олимпиади ци æнтæстдзийнæдтæ равдесайтæ, етæ ’нцæ уæ архайд æма тундзундзийнади фæстеугутæ. Уæлдай арфæ кæнун, олимпиадæ ка бацæттæ кодта, уонæн. Иуазæгуарзагæ Цæгат Иристон сæрустур æй æ гъæздуг истори æма дессаги рæсугъд æрдзæй. Аци бунат зундгонд æй айдагъ æ бæрзонд хуæнхтæ æма арф кæмттæй нæ, фал æ культурон бунтæй дæр. Уони бунæттон цæргутæ багъæуай кодтонцæ æма фæххастонцæ æности сæрти. Дзæуæгигъæу уæхæн сахар æй, æма си рагон традицитæ æнгом баст æнцæ нуриккон технологити хæццæ. Æрдзæ ба нин хæссуй цийнæдзийнадæ æ рæсугъддзийнадæй. Мæ зæрдæ уин зæгъуй æнтæстдзийнæдтæ олимпиади кæронбæттæн къæпхæни.

Ци мадзали кой кæнæн, е кæстæртæн арæзт ке ’рцудæй, уомæй æ ахедундзийнадæ уæлдай агъазиау æй. Уомæн æма нуртæкки æзмæнст рæстæгути фулдæр архайун гъæуй нæ ирæзгæ фæлтæрти рæстмæ гъомбæл кæнунбæл, цæмæй уонцæ Фидибæстæбæл æновуд, æ сæрбæлтау рæстуодæй архайунгъон уонцæ. Е уоййасæбæл ахсгиаг æй, æма ибæл еудадзуг архайгæ  ’й, гъæуй нæ гъæуй рагъæвзарæ си нæ кæнгæй, уомæн æма гъуддаги хуарзæн цидæриддæр бæззуй, уонæй гъæуама пайдагонд цæуа. Уой фæдбæл нæ газети мухургонд æрцæуй хецæн æрмæгутæ, æнцæ абониккон номери дæр, уæдта сæмæ æргом æздахдзинан идарддæр дæр.