Æма бабæй нæ Фидибæстæбæл ралæудтæй, æрбалæборæ-æрбалæборæ имæ кæнун бабæй ка байдæдта, æ еци знæгтæй æй багъæуай кæнуни дзаман. Æма бабæй æ сæрбæлтау тохмæ фæд-фæди нæхстæр кæнунцæ нæ дзилли хуæздæртæ, сæрмагонд æфсæддон операций архайгæй, етæ æхсаргинæй æнхæст кæнунцæ сæ цитгин ихæс. Берети ирисхъæ си, гъулæггагæн, уотæ рауадæй, æма сæ багъудæй уой сæрбæлтау сæ æригон цард иснивонд кæнун. Зæрдхъурмæй хъонц кæнæн, зæрдристæй син имисæн сæ рохс нæмттæ…

Уонæй еу – лескейнаг лæхъуæн Уæдати Артури фурт Сослан… Æма абони æ номерæнæн сæрмагондæй æрмæг мухур кæнæн æстæймаг фарсбæл.

Рæстæг алли рист дæр дзæбæх кæнуй, зæгъгæ, зæрдитæ бæргæ февæрæн, æверхъау цау кæбæл æрцæуй, æ хеуонæй-хеуондæр кæмæн бастъæлуй, уонæн. Бæргæ уотæ фæззæгъæн, фал æй, æвæдзи, лæдæргæ фæккæнæн, е æгириддæр раст ке нæй, зæрдрист адæймагæн некæци рæстæг æрнидæн кæндзæнæй æ уодхар, е нæ, фал бæнттæ, мæйтæ, æнзтæ куд евгъуйгæ цæуонцæ, уотæ ’й гъезæмарæ кæндзæнæй.

Уæхæн уавæри ’нцæ абони Уæдати Сослани бийнонтæ, хеуæнттæ, æрдхуæрдтæ, гъæубæстæ – кæд анз рацудæй, æдзард тугъдон лæхъуæни æ уарзон гъæубæсти уæлмæрдти е ’носон бунатбæл ку исæмбæлун кодтонцæ, уæддæр зæрдæ не ’нцайуй æ асдзæгъдæй. Уæлдайдæр ба ма уомæ гæсгæ дæр, æма ибæл аци бæнтти гъæуама исæнхæст адтайдæ æртиндæс æма инсæй анзи…

Æртиндæс æма инсæй анзи… Уæхæн хуæрзцубур рауайдзæнæй æ цардвæндаг, уой æнгъæл ин ка адтæй… Æ тæккæ лæхъуæни цардгъон кари бæргæ бацудайдæ, берæ арфиаг гъуддæгутæй бавдистайдæ æ лæгдзийнадæ. Уомæн æма имæ адтæй сæрæндзийнадæ, рауон-циуондзийнадæ, берæ рæсугъд фæндитæ æма бæлдитæ имæ бæргæ адтæй, æ цардиуагæ зæрдæмæдзæугæй аразун рæстуодæй бæргæ архайдта…

Мадта хеуæнттæн дæр æма гъæубæстæн дæр зæрдтагон адтæй. Уотæ рауадæй, æма сауæнгæ æ сабийдоги, гъулæггагæн, мади рæвдуд нæ бавзурста, исгъомбæл æй æ фиди фидæ Уæдати Морис æма æ нана Бетрозон Венери къохти. Уоййасæбæл зæрдтагон уарзтæй сæ уарзта, æма етæ цардæгас ку нæбал адтæнцæ, уæд еухатт æ кæстæр æнсувæртæн хебарæй ниффæдзахста: «Ци нæ фæууй, куд нæ фæууй, афонæй раздæр ку рамæлон, уæд мæ Бетрозони фарсмæ байвæрдзинайтæ…»

Æгæр, æгæр раги æнхæстгæнгæ рауадæй æ еци уосиат… Æгæр, æгæр раги батагъд кодта æ уарзон нанай размæ…

Тугъд цæйбæрцæбæл æверхъау æй, уой Сослан хестæрти дзубандитæй, æвæдзи, зудтайдæ. Фал æхуæдæг æ туфули ку равзурстæй, уæдта ’й æхе цæститæй фæууидта, е æцæгæй ци ’й, уой. Адзал еци зелæги зелуй тугъдон адæймаги фæдбæл. Æма цийфæнди цардбæллон ку уай, дæхи цийфæнди гъæуай кæнунгъон ку уай, уæддæр си фæййервæзун ба алкæмæн нæ бантæсуй. Уой уингæй, æвæдзи, берæ цæбæлдæрти куд нæ сагъæс кодтайдæ, æма æ фидæ Артурæн дæр хумæтæги нæ бафæдзахста, гъома, ести, уæд ин æ бийнонтæмæ, æ дууæ фурти – авданздзуд Артур æма цуппаранздзуд Азæмæтмæ – æ цæстæ куд фæддара…

Волгогради 255-аг мотоæхсæг полкки размæмпурсæг къуари сæргълæууæг Уæдати Сослан адтæй сæрмагонд æфсæддон операций архайгути раззаг рæнгъити. Æ фæсномугæй æй е ’мбæлттæ худтонцæ Аса. 2024 анзи дууин фарæстæймаг августи Донецки Адæмон Республики сахар Марьинкæмæ хæстæг поселок Доля есгæй бæгъатæрæй фæммард æй Сослан…

Е ’мбæлттæй сæ еу, Поддубный, зæгъгæ, æ фæсномуг, уой фæсте дзурдта:

– Раздзæуæг ун Сосланæн æ тоги адтæй. Æхуæдæг æма е ’мтохгæнгутæ ци дессаги хъаурæ æма æхсарæ, ци æскъуæлхтдзийнæдтæ равдистонцæ, уони радзоруни рæстæг нæма ’рцудæй, фæстæдæр сæ, нæ зæрдæ дарæн, бæлвурдæй фегъосдзинайтæ…

Уæдати Сосланæн æ тугъдон æскъуæлхтдзийнæдти фæдбæл аккаггонд æрцудæй цитгин паддзахадон хуæрзеугутæ – Лæгдзийнади орден æма Суворови майдан.

Уæдати Сослан тугъдон архæйдтитæй еуеми ку фæммард æй æма ’й æ райгурæн гъæумæ ку исластонцæ, уæд бониккон бони ин рохсаг зæгъунмæ æгæрон берæ адæм æрæмбурд æй. Мадта уæлмæрдтæмæ ’й ци надбæл хастонцæ, уой кæрæнтти ба æнæ еу цохæй саударæн рæнгъитæй лæудтæнцæ Лескени астæуккаг скъолай ахурдзаутæ. Еци уæлмæрдти æносон дуйней æ бунат иссæй æ уарзон нанай рази – исæнхæст кодтонцæ Сослани кæддæри уосиат…

Рæстæг, дан, алли рист дæр дзæбæх кæнуй… Нæ, уотæ нæй… Куд æрнидæн уодзæнæй, абони æдеугурæй авд анзи кæбæл цæуй, Сослани еци биццеу Артури зæрди рист, е ’мгæрттæй алкедæр æ фиди хæццæ куд архайуй, уой уингæй æма уонæмæ зæрдхъурмæй хицæ кæнгæй!.. Куд æрнидæн уодзæнæй, абони æдеугурæй цуппар анзи кæбæл цæуй æма æ фиди рæвдуд æнхæстæй ка нæ бавзурста, Сослани еци биццеу Азæмæти зæрди рист, цæйбæрцæдæр рæстæги фæсте ин скъоламæ бацæуни рæстæг ку ’рхъæрта æма уоми устур тургъи бæрæгбони мадзалмæ иннæ сабийтæй алкедæр æ фиди хæццæ цийнæйдзагæй ку ’рбацæуонцæ, уæд уонæмæ хицæ кæнгæй!..

Аци сабийти барæвдаунæн аккаг зæгъдтитæ иссерун зин æй. Айдагъдæр нæ бон æй уотæ зæгъун, æма Сосланæн æ байзæдтæгтæ байрæзæнтæ нивæ-амонди хæццæ, сæ лæгигъæдгун фидæй ба сæрустур уæнтæ, алкæддæр син фæнзуйнаг дæнцæ уæд…

ХУБИАТИ Ларисæ