Нæ абониккон цардарæзтæн тæссаг ци фуддзийнæдтæй æй, уонæн сæ æверхъаудæртæй еу æй терроризм. Æма цæмæй бундзарæй æскъуд æрцæуа, е æй еугур рæстзæрдæ дзилли сæйрагæй-сæйрагдæр ихæс. Уобæл цудæй дзубанди, æрæги Уæрæсей æдасдзийнади федералон служби директор Александр Бортникови разамундæй терроризми нихмæ тохкæнуйнади Национ комитетæн ци кезуй æмбурд арæзт æрцудæй, уоми. Видеоконференций бастдзийнади фæрци си архайдта нæ республики Сæргълæууæг Сергей Меняйло дæр.

Нæ республики Сæргълæууæги æма Хецауади пресс-службæ куд игъосун кæнуй, уотемæй æмбурди архайгутæ се ’ргом раздахтонцæ Цæгат Кавкази федералон зилди терроризми, неонацизми, дини экстремизм æма æндæр уæхæн фæззиндтити идеологи парахат кæнунæн гæрæнтæ æвæрунмæ.

Александр Бортников æ радзубандий куд фегъосун кодта, уотемæй сæрмагонд службитæ ци тухи æма профилактики мадзæлттæ æнхæст кæнунцæ, уой фæрци фæстаг анз дууæ хатти фæмминкъийдæр æй террористон фудракæндти нимæдзæ. Анзи райдайæнæй нуриуæнгæ сæрмагонд службитæ раргом кодтонцæ террористон фудракæндтæ исаразуни æртинсæй фæлтæрæни.

Александр Бортников ма куд загъта, уотемæй дуйнеуон террористон еугæндтæ æма украинаг сæрмагонд службитæ идарддæр дæр кæнунцæ сæ знаггадæхæссæн архайд, еугур фадуæттæй архайунцæ федералон зилди сабур цард фехалунбæл. Еци архайдæн син агъазгæнæг æй интернети хизæг дæр. Сæ нисан æй ирæзгæ фæлтæри  минæвæртти терроризм æма экстремизми идеологимæ  æздахун, ардаун сæ аллихузон фудракæндтæ аразунбæл.

Æдасдзийнади федералон служби бæрæггæнæнтæмæ гæсгæ, аци анзи райдайæнæй нуриуæнгæ Цæгат Кавкази федералон зилди арæнтæбæл уорæд æрцудæнцæ, фæсарæнтæмæ рандæ ун æма аллихузон террористон æма экстремистон еугæндти иуонг исуни фæндæ кæмæ адтæй, уæхæн 280 æригон адæймаги. Уой хæццæ, уонæн сæ фулдæр иссæнцæ дини карздæр экстремистон фæззиндтити амæттаг.

Еугур еци æууæлтæ рартасгæй, æмбурди сæрдареуæггæнæг бæлвурд фæдзæхститæ байхæс кодта профилон сæрмагонд службитæ æма барадæгъæуайгæнæг оргæнти разамонгутæн. Уой хæццæ ба ма  ахуради, культури, спорти, фæсевæдон политики æма, æригон фæлтæрти хæццæ ка косуй, еци иннæ структурити разамонгутæн фæдзæхст æрцудæй, цæмæй æмбурди ци фарстатæбæл цудæй дзубанди, уони фæдбæл гъæугæ мадзæлттæ аразунмæ еудадзуг æздахонцæ се ’ргом.

Терроризми нихмæ тохи регионалон къамистæн фæдзæхст æрцудæй, цæмæй фæййахедгæдæр кæнонцæ профилактикон кусти мадзæлттæ, ахурдзау фæсевæди ’хсæн террористон æма экстремистон идеологи парахат кæнунæн аккаг нихкъуæрд дæттонцæ.